11 ¹ Ninyh cayx tauv Ye-lu-sa-lem woax dlih, clăngv quaix ô-liu zoongz ninyh Bêtv-pha-ri cloon Bê-tha-ni njăngv, Zâu Yê-su êu Nănh iz lanh stâyb-sây ninyh đangc, ² Bux nănh stiz coong: "Ninyh nzac yămz cah đangc woax tyuh njăngv, nzac njăngv woax dlih, nyâuh phătc ah tauh maf lih jeenz pang ănz woa. Nâyx tauh maf, max zengx naih mănv zâyh quaix. Bix zay jinb lauf nây. ³ Năngđ naih munh naic coong: Săngh laix nyâuh ayx năngđ nâyx?' Bix tauz stiz coong: 'Zâu sămv zuc nongc nănh, stiz songđ phunz nyâuh jinb lauf," ⁴ Iz lanh stâyb-sây ninyh, songđ phătc ah tauh maf lih jeenz pang ănz woa jengh cah đangc, yămz woa jau synh, stiz songđ zay jinb lauf. ⁵ Naih iz pôz lanh munh yămz woa cah synh naic stiz coong: "Nyâuh zay maf lih jeenz ayx lungđ?" ⁶ Stiz âyz Zâu Yê-su nyăngz woac tauz, woax đomc munh songđ phunz stiz jinb lauf. ⁷ Stiz ênz maf lih jeenz lauf phunz Zâu Yê-su, stiz songđ zoz nănh stiz nyăngz gwuyz gomf taih timc maf lih cah tănf phunz Zâu Yê-su zâyh. ⁸ Munh đungx nongc stiz nyăngz gwuyz gomf pâub ănz woa jau, naih ah phanx ninyh zoz njăngx quah timc ănz woa jau đămc. ⁹ Ninyh đangc cloon yămz đangz woax đomc munh tinyh đoih hamv coong: "Hô-sa-na! jođ Zâu Tênb-Hungh sađ pôz phunz tym Zâu nyăngz bux taih woax tauh. ¹⁰ Jođ Zâu Tênb-Hungh sađ pôz phunz mâyh njăpc nyăngz côkz, six buz nyăngz stu stongz, Đa-vitv hungh nyăngz côkz! Hô-sa-na yămz njăngb quaix woax tauh." ¹¹ Zâu Yê-su ninyh tauv Ye-lu-sa-lem stengv, Nănh nzac congx Tênb-Hungh nyăngz pyau njaf ninyh mangc iz pôz nganc nyăngz muif hungđ, woax zanyf yâuc nzămc nzof, Nănh songđ ninyh Bê-ta-ni njăngv, cloon săpc nyâyc lanh stâyb-sây. Yê-su zaux vănx tauh njăngx (Ma-thi 21:18-19) ¹² Nyâyc đoomz seetb Bê-ta-ni njăngv woax zanyf, Zâu Yê-su yâuc numđ nyâuđ sab. ¹⁴ Zâu Yê-su coong ănz woax zâyz njăngx; "Blătc nây staox ninyh, max naih mănv tuz nhlync mâyh nyăngz pyâu gôh!" Zâu Yê-su coong nâyx đomc woac, stâyb-sây buz lauf tinyh đoih numđ. Yê-su nzâux dlăngc Tênb-Hungh nyăngz pyau (Ma-thi 21:12-17; Lu-ca 19:45-48; Giăng 2:13-22) ¹³ , Nănh mangc phătc naih ah zâyz vănx tauh njăngx gâyh côz côz ha, noomh njămx mengz, Nănh ninyh tex jađ naih pyâu max; six ninyh tauv stătx max phătc naih pyâu cungb phătc naih noomh, wâyc zuc max zengx tauv zunb săngh pyâu. ¹⁵ Ninyh tauv Ye-lu-sa-lem stengv, Zâu Yê-su nzac congx Tênb-Hungh nyăngz pyau njaf ninyh luiđ maif maic woax đomc munh seetb ninyh nzuf, lokc nzuf wănc nyanh nyăngz đah mâyf, blanc njynh cloon maic noc copz nyăngz tăngx. ¹⁶ Nănh max phunz mănv đayc huv clăngv quaix singh jengh cah đangc. ¹⁷ Zâu Yê-su nzaox songx munh coong: "Canyx-stâub ja coong: Yaz nyăngz pyau six hipđ ayx jođ Zâu nyăngz pyau phunz muif stingx nyeenh mănh, năngđ naz nyâuh pyênv nâyx cuyb tync săngh stac nyăngz ngamh." ¹⁸ Stayb-munh cloon nzaox gâyf stênx stengb numđ nâyx đomc dlayc, nănh stiz songđ ta ix lov jau tayx Zâu Yê-su, zâyf numđ cumh nzav Nănh, wâyc songx munh numđ Nănh nzaox nyăngz woac njingc nzongf. ¹⁹ Nzămc nzof, Zâu Yê-su cloon stâyb-sây buz zâyf ninyh gâyh woa stengv. Yê-su nongc vănx tauh njăngx caođ nzaox stâyb-sây (Ma-thi 21:20-22) ²⁰ Tah nyâyc đoomz, yăngh jau ninyh woax dlih stâyb-sây buz phătc woax zâyz vănx tauh njăngx caođ tauv đungh; ²¹ Phe-rơ săngx tauv Zâu Yê-su coong nyăngz woac songđ coong ănz Yê-su: "Stâyb-pha lex mangc geh! Mâyh zaux lâyc zâyz vănx tauh njăngx caođ nzec!" ²² Zâu Yê-su tauz: "Nyâuh six zuc zeen coouv Zâu Tênb-Hungh. ²³ Yaz coong seenz bux nyâuh, toix laiv lanh zeen max plungh plănb têx, nănh êu nâyx nomz zoongz stuyđ nzac coiđ ninyh, songđ naih dlayc seetb taih toix nănh zeen nyăngz jau, zoongz zâyc songđ nyoongz quef stuyđ nzac coiđ ninyh. ²⁴ Wâyc năngđ naz, yaz bux nyâuh: "Nyâuh jođ laiv hungđ, six zuc zeen nyâuh tuz woax hungđ, six seenz tuz gôh. ²⁵ Nyâuh jođ woa dlih, năngđ săngx tauv naih toix laiv lanh ayx longđ nyâuh, six zuc quanyf phunz nănh, nyâuh nyăngz Tênb toongh pha songđ quanyf phunz nyâuh ayx longđ nyăngz stoif. ²⁶ Six năngđ coong nyâuh max quanyf phunz munh têx, nyâuh nyăngz Tênb toongh pha lauf max quanyf phunz nyâuh ayx longđ nyăngz stoif." Laiv lanh phunz Yê-su naih gâyf ayx nănh nyăngz dlayc (Ma-thi 21:23-37; Lu-ca 20:1-6) ²⁷ Zâu Yê-su cloon stâyb-sây buz ninyh Ye-lu-sa-lem stengv. Nănh ninyh congx Zâu Tênb Hungh nyăngz pyau cah njaf yăngh woa, stayb-munh cloon nzaox gâyf stênx stengb, cloon munh côx taih, ²⁸ Naic Nănh: "Mâyh naih nhleenz tâuv gâyf ayx nâyx đomc dlayc? Nâyx đomc gâyf mănv phunz mâyh?" ²⁹ Zâu Yê-su tauz: "Yaz lauf naic nyâuh ah zâux. Nyâuh năngđ tauz tuz toix, yaz songđ coong bux nyâuh, toix laiv tauh phunz yaz naih gâyf ayx nâyx đomc dlayc. ³⁰ Giăng ayx quaix womz nyăngz gâyf, tăng Zâu Tênb-Hungh phunz Nănh, max six tăng bamh munh phunz Nănh?" ³¹ Stiz songđ lanh naic lanh, pănh năngđ tauz coong tăng Zâu Tênb-Hungh phunz, ha Nănh zâyf coong, săngh laix nyâuh yâuc max zeen Giăng!' ³² Pănh năngđ coong tăng bamh munh, yâuc cumh nzav songx munh, wâyc zuc muif lanh pâyz Giăng six săngh ah tauh Stênx stengb lub. ³³ Năngđ ha, nănh stiz tauz Zâu Yê-su: "Buz lauf max pâyz đêh!" Zâu Yê-su coong bux stiz, yaz lauf max coong bux nyâuh toix laiv tauh phunz yaz naih gâyf ayx nâyx đomc dlayc." Tungh cuđ lauđ wynb nyăngz woac pây (Ma-thi 21:33:46; Lu-ca 20:9-19)