8 ¹ Coong tauv nâyx tyuh jau nongc seen quaix, six pănh naih nâyx hungđ stayb-munh stâyv yămz ayx năngx lub quaix woax tauh Tênb-Hungh nyăngz byaoh phanx Tênb-toongh muif tab gungh. ² Nănh yămz woax đăngb zengh nyăngz congz Hungh tync cah njaf, Nănh yămz woax siênz congx Hungh nyăngz đupx njiuh đăngb six max zâyf bamh munh njăpc taih, six Zâu Tênb-Hungh cănh zoongz taih. ³ Muif tauh stayb-munh six njăpc taih nongc nzâyz sâuđ nyâyc cloon stayb lanyh ninyh congx phunz Tênb-Hungh. Năngđ naz nâyx tauh stayb-munh songđ naih dloih muif hungđ congx phunz Zâu Tênb-Hungh. ⁴ Six coong Nănh năngđ yămz nây bamh canz têx, Nănh max ayx stayb-munh, wâyc zuc yămz nây bamh canz cănh naih stayb-munh âyz Đoouc lif gâyf nzaox nyăngz woac ayx. ⁵ Nâyx đomc stayb-munh ayx nyăngz dlayc, cungb ayx âyz yămz Tênb toongh nyăngz caox gao cloon bah cloiz, hănđ Mô-sê lauf năngđ ha, nănh oix njăpc Zâu nyăngz đupx njiuh woax zanyf, Tênb-Hungh zăpx bux nănh coong, “six zuc jâuz stymz ayx muif hungđ dlayc, yâuc zuc ayx âyz yămz woa zoongz zâyc yaz bux woax đomc jix caox. ⁶ Six nâyx zanyf Yê-su ayx stayb-munh nyăngz cumh pâuz năngx njăngb quaix nănh stiz nyăngz, Nănh ayx năngđ mungh tongx munh stăngc pănh jođ Tênb-Hungh cloon nănh nyăngz munh njăpc quaix nâyx đomc nyunc woac six năngx njăngb quaix, năngx wăn têx, yâuc năngx gongx têx. ⁷ Six coong njăpc tah yeetx hâyđ nyunc woac năngđ tuz clakx-clunh têx, songđ max năngx zuc njăpc nyâyc hâyđ. ⁸ Tênb-Hungh yônx Y-sa-la-ên munh ayx longđ woax zanyf Nănh coong, “Cayx tauv săngx huđ yaz cloon Y-sa-la-ên munh, Yu-đa munh nyăngz sây stunz njăpc săngb nyunc woac. ⁹ Max năngđ yaz cloon nănh stiz nyăngz stu stongz njăpc woax đomc nyunc woac, six yaz nzauf nănh stiz nyăngz puf jinb seetb Y-yiêpv-tô stâyz phangz woax zanyf, nănh stiz max âyz yaz njăpc nyăngz nyunc woac ayx. Zâu songđ wynb mynb ănz nănh stiz ¹⁰ Zâu năngx coong, “Nâyx đomc noib lav quaix nzuf, yaz năngx oix cloon Y-sa-la-ên munh nyăngz sây stunz, njăpc nyunc woac six năngđ nâyx, yaz oix zoz yaz nyăngz Đoouc-lif gâyf ja ănz stiz stymz nyâuđ, yaz six ayx nănh stiz nyăngz Tênb-Hungh, nzof stiz yâuc ayx yaz nyăngz pec stingx. ¹¹ Nănh stiz songđ max năngx zuc nzaox stiz nyăngz njăngv sangc munh, mah six nănh stiz nyăngz yâuf pez, lub mah six jeenz, nyâuh six zuc pâyz Zâu, wâyc zuc nănh stiz tinyh đoih lub cloon jeenz songđ cănh pâyz tuz tauv yaz. ¹² Yaz songđ oix quanyf nănh stiz ayx huđ nyăngz dlayc, yâuc max săngx tauv nănh stiz nyăngz stoif.” ¹³ Tênb-Hungh njăpc cah đangz hâyđ six hipđ ayx săngb nyunc woac, nyunc zeetx hâyđ woax đomc nănh six hipđ ayx lôx nyăngz, max lauh songđ hayh platb nzuf. Lôx nyăngz nyunc woac