5 ¹ Muif tauh stayb-munh tuz sên seetb taih, yâuc oonz nănh tayv songx munh canyx bongc Tênb-Hungh, nănh six zuc wâyc songx munh nyăngz stoif, nzâyz sâuđ nyâyc cloon stanyb lanyh ninyh congx phunz Zâu Tênb-Hungh. ² Wâyc zuc stayb-munh lauf hayh naih đungx hungđ đoonh, nănh songđ hayh nongc dlênc nyâuđ (thông camz) phunz woax đomc max pâyz gâyf yâuc ayx longđ nyăngz munh. ³ Wâyc zuc stayb-munh lauf hayh đoonh, nănh songđ zuc nzâyz stanyb lanyh ninyh congx phunz Tênb-Hungh, nongc stav nănh nyăngz stoif, yâuc stav songx munh nyăngz stoif. ⁴ Max naih laiv lanh cănh hayh zanyb nănh ayx lub năngđ stayb-munh, six Tênb-Hungh cănh êu nănh ayx năngđ A-rôn nâyx. ⁵ Lauf tinyh năngđ, Njâuv Zâu max cănh zanyb nănh ayx stayb-munh, six Tênb-Hungh cănh phunz nănh ayx, yâuc bux nănh coong, “Mâyh ayx yaz nyăngz toonz, nâyx noib yaz ayx mâyh nyăngz pha. ⁶ Năngx naih pitc stêtz Canyx-stâub Tênb-Hungh coong, “Mâyh stâyv quâyx ayx stayb-munh, ayx năngđ Mên-ji-sê-đêkv woax hungđ stayb munh nâyx.” ⁷ Yê-su năngx yămz nây bamh canz woax zanyf, nănh haoh êu Zâu yâuc naih mâyc womz njâuc seetb taih, jođ Tênb-Hungh seenz hayh Njâuv tuz nănh gâyh đutb max zâuđ zuc tayc woax tauh, Tênb-Hungh songđ mungv nănh đoouc coouv nyăngz woac. ⁸ Max cun Yê-su ayx Tênb-Hungh nyăngz toonz, six Nănh lauf năngx zuc tanyđ zâuđ nanc, yâuc zuc jâuz mungv woac. ⁹ Tênb-Hungh phunz nănh tuz clakx clunh nzuf, Yê-su songđ ayx coonz phunz yeetx stong mungv woac nyăngz munh songđ stâyv quâyx tuz Njâuv.” ¹⁰ Tênb-Hungh songđ êu nănh ayx stayb-munh năngđ Mên-ji-sê-đêkv, woax hungđ stayb-munh nâyx.” ¹¹ Năngx naih đungx hungđ dlayc yaz oix coong bux nyâuh năngx manyh pec, six zâuđ coong tuz yox, wâyc zuc nyâuh yâuf pez nyăngz bah nomh max saz woac. ¹² Nâyx zanyf nyâuh songđ hopđ zuc hayh ayx stênx-stengb, six nyâuh năngx zuc nongc munh nzaox Tênb-Hungh nyăngz gâyf tah yeetx yămc, nyâuh yâuf pez năngx zuc nongc munh nzaox woac sâub pinyv năngđ munh hopb nu, max zengx nhlync tuz năngv nhlengc. ¹³ Laiv lanh năngx zuc hopb nu năngđ munh sây, woax lanh lauf max zengx pâyz tuz seenz gâyf. ¹⁴ Năngv six njâuh phunz munh lub nhlync, hođ jâuz năngx pâyz tuz laiv hungđ six gongx, laiv hungđ six huđ.