4 ¹ Wâyc năngđ nâyx, Tênb-Hungh nyunc phunz pănh tuz nzac sec hitb conv tync woax đomc woac lauf max quaix, six pănh zuc buôngh, sangx max đanyf pănh hayh naih tix lanh ninyh max tuz tauv woa. ² Pănh numđ cuđ jeenx lauf năngđ nănh stiz tuz numđ cuđ jeenx nâyx, six nănh stiz numđ nzuf cuđ jeenx yâuc max stăngc tuz nănh stiz laiv hungđ, six wâyc nănh stiz mungv blătc yâuc max âyz. ³ Pănh zeen nyăngz munh songđ seenz tuz nzac Tênb-Hungh nyunc phunz woax nomz hitb conv tync, woax nomz tync six Tênb-Hungh nyunc woac coong phunz woax nomz tync, “Zâu coong yaz numđ nhleenx songđ zaux nănh stiz coong, “Nănh stiz stâyv quâyx six max tuz nzac woax nomz hitb conv tync, âyz yaz nyunc phunz nănh stiz tuz sec hitb conv woax nomz tync.” Max cun nănh coong năngđ nâyx, six nănh ayx săngh nănh nyăngz cumh pâuz tăng zâyx gungh nib taih woax zanyf nzof gôh* ⁴ Canyx-stâub năngx naih ah nomz tync coong, “Tah jeetx noib, woax noib six Tênb-Hungh sec cumh pâuz noib.” ⁵ Canyx-stâub năngx naih ah zâux woac coong, “nănh stiz stâyv quâyx six max tuz nzac yaz nyăngz hitb conv tync. ⁶ Songđ lauf năngx naih ah po munh tuz nzac Tênb-Hungh nyăngz hitb conv tync, tuz numđ cuđ jeenx đangc yâuc max tuz nzac woax đomc, six wâyc nănh stiz max mungv woac. ⁷ Wâyc năngđ nâyx, Tênb-Hungh songđ năngx oonz ah nomz noib hipđ ayx nâyx noib, quaix đangz batz lauh Tênb-Hungh năngx nongc Đa-vitv hungh coong ănz (Nzungz-đăngb Canyx-stâub) woax đomc woac, six coong nyâuh nâyx noib tuz numđ Tênb-Hungh bux nyăngz woac, six max tuz ayx nyâuđ nhlengc. ⁸ Six coong Giô-sê năngđ phunz nănh stiz tuz sec hitb conv, quaix đangz Tênb-Hungh yâuc max năngx naih coong pitc noib. ⁹ Songđ wâyc Tênb-Hungh nyăngz pec stingx songđ năngx naih pitc nomz tingc congz noib.” ¹⁰ Wâyc zuc laiv lanh tuz nzac Tênb-Hungh nyăngz hitb conv tync, songđ tuz sec cumh pâuz năngđ Zâu Tênb-Hungh tuz sec cumh pâuz nâyx. ¹¹ Năngđ naz, pănh songđ zuc nzac jab ayx wâyc tuz nzac Tênb-Hungh nyăngz hitb conv tync, wâyc max phunz laiv lanh năngđ woax đomc munh max mungv woac songđ max tuz nzac ninyh woax đomc Y-sa-la-ên munh. ¹² Tênb-Hungh nyăngz woac six njayc năngđ iz mynb nzuc đao, hayh nzopb tauv munh nyăngz stymz nyâuđ cloon mengc hoonh, nzopb tauv stymz nyâuđ nyâyh nyăngz dlayc, nzopb tauv stung stymz, cloon stung laub. Cloon stung tinyh taux nyăngz tync. ¹³ Max naih laiv hungđ hayh pinyx tuz vâyv Tênb-Hungh, muif hungđ dlayc six hynđ yangh yămz Zâu Tênb-Hungh nyăngz cah đangc. Pănh yâuc zuc zoz pănh yămz yangh stâyv ayx nyăngz dlayc lănv bux Nănh. ¹⁴ Năngđ naz, songđ zuc zeen wăn pănh nhlimc nyăngz gâyf, wâyc zuc pănh naih tauh ayx năngx lub têx stayb-munh woax tauh six Yê-su Tênb-Hungh nyăngz toonz, muf yămz woa Tênb-toongh woax tauh. ¹⁵ Pănh nyăngz stayb-munh max zâyf max pâyz tuz pănh đoonh nyăngz tync, wâyc Nănh tuz stâyv quaix muif hungđ, pănh lauf năngđ woa nâyx zuc stâyv, six Nănh max pamf stoif. ¹⁶ Wâyc năngđ nâyx pănh songđ zuc ninyh năngx tauv Tênb-Hungh sađ pôz nyăngz tync, yămz woa pănh sămv zuc nyăngz săngx huđ, songđ tuz Tênb-Hungh hâuđ lênh pănh, yâuc sađ pôz phunz pănh.