47 ¹ Yô-sepv, songđ nzac ninyh coong bux Pha-ra-ôn Hungh." Yaz nyăngz pha cloon yâuf pez tăng Ca-na-an, stâyz phangz taih tauv Gô-sen, ênz pa jiz yungh cloon ngoongh wăngh, cloon jax toongx muif hungđ taih, nâyx zanyf, nănh stiz yămz Gô-sen, stâyz phangz." ² Yô-sepv, ênz nănh nyăngz pyaz lanh tah ninyh pongh Pha-ra-ôn Hungh. ³ Pha-ra-ôn Hungh songđ naic Yô-sepv, nyăngz tah coong, "Nyâuh ayx laiv hungđ congz nyăngz munh neh? nănh stiz tauz Pha-ra-ôn Hungh, mâyh nyăngz pâuz buz six yungf stanyb hauđ nyăngz munh, cayx năngđ buz nyăngz stu stongz. ⁴ Nănh stiz tauz Pha-ra-ôn Hungh coong, buz taih yămz Hungh stix nyăngz stâyz phangz ah dlapc, yămz Ca-na-an, stâyz phangz, seenz pongh zuc nyâuđ sab zâuđ nzongf, njynh max naih mađ phunz stanyb hauđ yungh ngoongh nhlync, buz jođ Hungh stix phunz buz pyaux taih yămz Gô-sen, stâyz phangz." ⁵ Pha-ra-ôn Hungh coong ănz Yô-sepv, mâyh nyăngz pha cloon mâyh nyăngz yâuf pez toic taih tauv mâyh nây. ⁶ Yămz Y-yiêpv-tô, stâyz phangz mâyh nyăngz cah đangc, mâyh six zuc bênc phunz mâyh nyăngz pha, cloon mâyh nyăngz yâuf pez toic yămz ah nomz stâyz phangz năngx gongx quaix nyăngz nib tâyc, six Gô-sen, mâyh nyăngz yâuf pez năngđ naih laiv lanh jămđ stanyb hauđ yoiz, bix oonz phunz nănh jămđ pănh nyăngz stanyb hauđ. ⁷ Yô-sepv, năngx ênz nănh nyăngz pha Ya-côpv, ninyh Hungh tync lănv bux Pha-ra-ôn Hungh, Ya-côpv, songđ poou woac sađ pôz phunz Pha-ra-ôn Hungh. ⁸ Pha-ra-ôn Hungh naic Ya-côpv, claof côx mâyh yămz tuz sax nyăngv nzof heh?" ⁹ Ya-côpv, tauz Pha-ra-ôn Hungh, Yaz yâuh yangb yămz nây yămz woa, yaz yămz tuz ah pez stamx săpc ngâuf nyăngv nây gôh, yaz yămz yangh stâyv seenz pongh zuc dlauc wâyb nzongf, yaz nyăngz mengc max đao tuz năngđ yaz nyăngz stu stongz." ¹⁰ Ya-côpv, năngx poou woac sađ pôz phunz Pha-ra-ôn Hungh songđ phunz biêtc gâyh. ¹¹ Yô-sepv, songđ ênz nănh nyăngz pha, cloon yâuf pez pyau munh ninyh yămz Y-yiêpv-tô stâyz phangz ah cuyb nib tâyc gongx quaix nyăngz tync Ram-se, nyăngz stâyz phangz, ayx âyz Pha-ra-ôn Hungh nyăngz lanyf. ¹² Yô-sepv, songđ sađ nhlync hopb, phunz nănh nyăngz pha, cloon nănh stiz yămz woax đomc pyau munh yâuf pez tuz caux nhlync. Yô-sepv maif nib tâyc phunz hungh ¹³ Woax dlapc nyâuđ sab nzêux Y-yiêpv-tô, cloon Ca-na-an, stâyz phangz cangf năngx netb têx, pec stingx max naih laiv hungđ nhlync. ¹⁴ Yô-sepv, sâub nzuf Y-yiêpv-tô munh cloon Ca-na-an, munh maif zub woax đomc nyanh nzâyz ninyh tăpx ănz Pha-ra-ôn Hungh tynz nyăngz nyanh coh. ¹⁵ Y-yiêpv-tô, cloon Ca-na-an, phâyz phangz nyăngz munh nyanh pec gaib nzuf taiv pengh, Y-yiêpv-tô munh songđ ninyh pongh Yô-sepv, bux coong, "jođ phatb năngv mâyđ phunz buz nhlync gôh, ha six mâyh cayx phunz buz max naih laiv hungđ nhlync bix zuc tayc yămz mâyh nyăngz cah đangc mah?" ¹⁶ Yô-sepv, tauz, six coong nyâuh năngđ max naih nyanh maif bix zoz stanyb hauđ phunz yaz, nongc wănc năngv mâyđ." ¹⁷ Năngđ naz, pec stingx nănh stiz songđ nzâyz stanyb hauđ taih jaoz phunz Yô-sepv, nănh songđ phunz năngv mâyđ nănh stiz nongc wănc ngoongh wăngh, yungh, cloon pa jiz yungh, ngoongh maf, cloon maf lih, nănh songđ zoz nâyx đomc muif hungđ nongc wănc nzu phatb phunz nănh stiz tuz caux nhlync woax nyăngv. ¹⁸ Woax nyăngv zomc nzuf, đangz nyăngv staox, nănh stiz zâyf ninyh pongh Yô-sepv, jođ coong, "buz max pinyx Zâu laiv hungđ, nâyx zanyf, nyanh yâuc nzuf, stanyb hauđ yâuc nzuf, jangx cungb năngx naih buz nyăngz stynb cloon buz nyăngz nib tâyc. ¹⁹ Buz cloon buz nyăngz nib tâyc six zuc quaiz nzuf yămz mâyh nyăngz cah đangc mah? mâyh bix nongc mâyh blauh mâyđ maif buz, cloon buz nyăngz nib tâyc, buz cloon buz nyăngz njingh tâyc six ayx nâuh phunz Pha-ra-ôn Hungh, mâyh six zuc phunz blauh nhlimb nongc songx zunb nzăngđ tuz mengc săngh, max zâuđ zuc tayc phunz buz nyăngz nib tâyc quengx pênx jêmh buf." ²⁰ Yô-sepv, songđ maif nzuf Y-yiêpv-tô, stâyz phangz pec stingx nyăngz nib tâyc phunz Pha-ra-ôn Hungh, muif lanh munh maic nzuf Y-yiêpv-tô stâyz phangz nyăngz njingh tâyc, wâyc zuc woax dlapc nyâuđ sab seenz netb nzongf, năngđ naz nib tâyc songđ săngh Pha-ra-ôn Hungh nyăngz nzuf. ²¹ Yămz Y-yiêpv-tô nyăngz stâyz phangz muif lanh pec stingx songđ zuc ayx nâuh nzuf. ²² Cungb năngx naih stayb-munh nyăngz nib tâyc, Yô-sepv, bix max maif, wâyc zuc Hungh pâu cănh sađ nyanh lav phunz nănh stiz, nzof nănh stiz songđ cănh naih nyanh maif năngv nhlync, max zâuđ maic nib tâyc phunz Pha-ra-ôn Hungh. ²³ Yô-sepv, năngx coong bux pec stingx, nâyx zanyf, yaz maif nyâuh, cloon nyâuh nyăngz nib tâyc nzuf phunz Pha-ra-ôn Hungh nzuf nzof, nây six blauh nhlimb phunz nyâuh nongc ayx zunb. ²⁴ Tauv sâub jengz zunb nyăngz săngx huđ, nyâuh six zuc seetb sôiv, pyaz phănc, seetb ah phănc phunz Pha-ra-ôn Hungh, năngx yăngc woa pyâyz phănc, six njâuh phunz nyâuh yâuf pez nongc ayx nhlimb, yâuc nongc yungf nyâuh tinyh đoih pyau munh." ²⁵ Pec stingx năngx coong, "mâyh Njâuv tuz seetb buz nyăngz mengc, jođ phunz buz yămz mâyh nyăngz cah đangc tuz ayx gongx dlayc, buz six nyunc ayx nâuh phunz Pha-ra-ôn Hungh." ²⁶ Yô-sepv, njăpc nâyx tyuh gâyf taih yămz Y-yiêpv-tô stâyz phangz songđ seenz nongc seen tuz tauv nâyx yeenh stâyv nyăngz noib, pyaz phănc ah phănc muif hungđ six săngh Hungh pâu nyăngz, cungb stayb-munh nyăngz nib tâyc nzăngđ max săngh Pha-ra-ôn Hungh nyăngz. Năngx gâyf plopx yaz ănz Y-yiêpv-tô stâyz phangz ²⁷ Năngđ naz, Y-sa-la-ên munh yămz Y-yiêpv-tô, Gô-sen, stâyz phangz nănh stiz cănh tuz naih nib tâyc nongc, nzof nănh stiz nyăngz sây stunz yâuc zunx phutx hongđ staox. ²⁸ Ya-côpv, yămz Y-yiêpv-tô stâyz phangz tuz săpc jeetb nyăngv, nănh nyăngz sâuđ nyônh yămz tuz ah pez stâyx săpc jeetb nyăngv. ²⁹ Y-sa-la-ên, cayx quaix stâyv woax zanyf, nănh êu nănh nyăngz toonz Yô-sepv, taih bux coong, "six coong sây năngđ hâuđ lênh pha, bix tăpx mâyh nyăngz puf ănz pha nyăngz stayx bongc bix nyunc coong, "yaz six max plopx (mokb) pha ănz nây Y-yiêpv-tô stâyz-phangz. ³⁰ Tauv yaz quaix stâyv muf yămz pâu cloon stu stongz yămz woax zanyf, sây bix nzâyz yaz nyăngz stynb stayđ seetb gâyh nây Y-yiêpv-tô stâyz phangz, muf plopx (mokb) ănz cloon côx claof nyăngz stâu ngamh, Yô-sepv, nyeenc coong, yaz six ayx âyz pha zăpx nyăngz woac." ³¹ Y-sa-la-ên bux coong, "sây nyeenc cloon pha gôh," Yô-sepv, nhlimc nzeetx, Y-sa-la-ên songđ cumf pyây nzac paix Tênb-Hungh, woa pyây tauh. Poou woac phunz Ma-na-se cloon Epv-ma-im