44 ¹ Yô-sepv, bux jămđ nănh nyăngz pyau woax đomc pâuz coong, "woax đomc munh nzâyz tuz buc laiv bix taox buc woa phunz nănh stiz, yâuc năngx zuc zoz cloon nănh stiz woax đomc maif blauh nyăngz nyanh toiv ănz nănh stiz muif lanh munh nyăngz zub tayh. ² Nyâuh yâuc năngx zuc zoz cloon yaz woax nomz nyanh zan, cloon woax tauh yâuf đany maif zub nyăngz nyanh, pungx ănz Bên-ya-min, nyăngz zub tayh cah nzeetx ninyh, woax đomc cumh pâuz munh songđ ayx âyz Yô-sepv, bux nyăngz woac. ³ Nyâyc đoomz njâu, woax đomc yâuf pez nănh stiz songđ zâyh maf lih seetb jau phunb đangz lauf. ⁴ Nănh stiz seetb ninyh gâyh stengv max zengx côz, Yô-sepv, coong bux nănh nyăngz pâuz, căn nyâuh nyoongz quef ninyh luiđ woax đomc munh, nyâuh ninyh luiđ tuz saic woax zanyf, nyâuh bix naic nănh stiz coong, "nyâuh săngh laix bix ayx huđ clao gongx? săngh laix nyâuh bix nymc buz nyăngz Zâu woax nomz nyanh zan?" ⁵ Nyâuh nymc buz nyăngz Zâu nâyx nomz nyanh zan, max zâyf nănh nongc hopb, yâuf nongc ayx quax woax nomz zan mah? nyâuh ayx nyăngz dlayc seenz huđ nzongf gôh." ⁶ Woax đomc pâuz luiđ saic nănh stiz woax zanyf, pâuz buz songđ âyz Yô-sepv zăpx nyăngz woac coong ănz nănh stiz. ⁷ Woax đomc yâuf pez tauz woax đomc pâuz coong, "Tah lex, săngh laix nyâuh bix coong năngđ nâyx ănz buz weh? buz max naih laiv stâyv munh nyâyh tauv ayx nâyx đomc dlayc năngđ nâyx đêh. ⁸ Buz năngx tăng Ca-na-an, stâyz phangz nzâyz buz phătc woax đomc nyanh taih toiv phunz zâu, ayx laix năngx hayh laic buz nymc zâu nyăngz sămz six nyanh neh? ⁹ Six coong nyâuh năngđ lov tuz pongh woax nomz nyanh zan yămz toix laiv lanh nyăngz tayh, six phunz woax tauh zuc tayc, nzof buz yâuc jođ ayx nâuh phunz nyâuh nyăngz Zâu. ¹⁰ Woax đomc pâuz tauz coong, "ha six ayx âyz tah buz coong nyăngz woac, toix laiv lanh zoz woax nomz zan six zuc ayx buz nyăngz nâuh, năngx naih woax đomc six tuz pungx stymz phunb đangz." Stiv ănz Bên-ya-min nyăngz tayh ¹¹ Năngđ naz, muif lanh munh songđ coonx pâuh zub tayh nzac nib taih coib tex mangc. ¹² Woax đomc pâuz songđ clunđ tăng munh côx tauv munh gunx nyăngz tayh, clunđ nzuf blăng tauv Bên-ya-nin, nyăngz tayh songđ phătc woax nomz zan yămz nănh nyăngz tayh. ¹³ Woax đomc yâuf pez numđ nhleenx, songđ zeb nănh stiz nyăngz gwuyz quav, yâuc pâuh zub tayh ănz staox maf lih, phunb đangz nzac stengv ninyh. ¹⁴ Yu-đa, cloon nănh stiz nyăngz yâuf pez nzac Yô-sepv, nyăngz pyau ninyh, nănh lauf yămz woa. Nănh stiz songđ quâyc nzac Yô-sepv nyăngz cah đangc ninyh. ¹⁵ Yô-sepv naic nănh stiz, tah lex nyâuh ayx lungđ dlayc nâyx yeh? nyâuh max pâyz tuz ah lanh munh năngđ hayh ayx quax mah?" ¹⁶ Yu-đa, tauz, Zâu lex, buz năngx naih lungđ woac săngh coong?" "buz ayx laix năngx hayh coong buz max naih stoif, Tênb-Hungh bêc clunđ nzuf buz ayx longđ nyăngz dlayc nzof, nâyx zanyf max zâyf cungb nymc zan woax tauh zuc ayx nâuh, njynh cloon buz tinyh đoih năngx zuc ayx nâuh nzuf." ¹⁷ Yô-sepv, tauz, yaz max zâyf ayx năngđ naz đêh, six lov pongh zan yămz laiv lanh nyăngz tayh woax lanh nzăngđ zuc ayx nâuh phunz yaz lêc đêh, năngx yăngc woax đomc six tuz pengh oonz phunb đangz muf nyâuh pha woa." Yu-đa jođ phunz Bên-ya-min ¹⁸ Yu-đa, ninyh stătx Yô-sepv, songđ coong, "Buz nyăngz Zâu lex, yaz jođ cloon mâyh coong ah zâux woac, wâyc zuc mâyh yâuc ayx lub năngđ Pha-ra-ôn Hungh, mâyh năngx gâyf siv nhleenx căn ănz mâyh nyăngz pâuz. ¹⁹ Zâu naic buz mâyh nyăngz pâuz, nyâuh năngx naih pha cloon tix lanh yâuf max naz?" ²⁰ Buz tauz Zâu coong, "buz năngx naih pha, six nănh côx yongb nzof, buz pha yâuc nyăngv njăngb nzongf nzăngđ stengb tuz woax tauh yâuf đany, woax tauh yâuf đany năngx naih ah lanh tah, nănh stiz songc nzif, tuz nănh stiz pha hâuđ lênh nzongf, six nănh yâuc tayc nzof gôh. ²¹ Zâu yâuc bux buz coong, “Nyâuh bix ênz nănh taih nây phunz yaz mangc nănh nyăngz mynb. ²² Buz songđ tauz buz nyăngz Zâu coong, "Woax tauh yâuf six max tuz gâyh nănh nyăngz pha, năngđ gâyh nănh nyăngz pha, nănh nyăngz pha six zuc tayc." ²³ Six mâyh yâuc bux buz mâyh nyăngz pâuz, six coong nyâuh năngđ max ênz cloon nyâuh nyăngz yâuf đany lêpc nyâuh taih nây, nyâuh six max zâuđ năngx mungc tuz phătc yaz nyăngz mynb. ²⁴ Buz songđ nzâyz mâyh nyăngz woac, muf lănv bux mâyh nyăngz pâuz buz nyăngz pha mungv nâyx đomc woac. ²⁵ Buz nyăngz pha bux êu buz năngx zuc taih nây maif blauh mâyđ. ²⁶ Buz năngx tauz coong, "six coong buz nyăngz yâuf năngđ max cloon buz ninyh têx, buz six max hayh ninyh tuz đêh, wâyc zuc năngđ max naih buz nyăngz yâuf đany cloon buz ninyh, buz ninyh six max hayh tuz phătc woax lanh munh nyăngz mynb. ²⁷ Buz pha bux buz coong, "Nyâuh max pâyz tuz yaz nyăngz au cungb stengb tuz iz lanh đokc toonz phunz yaz mah? ²⁸ Naih ah lanh seetb gâyh, pha nyâyh coong, "Nănh zuc tix hungđ yez tăpc zeb a nhlync nzof, tauv nâyx zanyf, yâuc max phătc nănh phunz đangz lauf." ²⁹ Six coong nyâuh năngđ năngx staix ênz cloon nâyx tauh ninyh bix zâyf bây pongh zuc huđ dlayc taih hoiđ nănh, nyâuh six phunz yaz nâyx nomz pyây pec stauh tuz tauv tayc muf yămz pâu gôh." ³⁰ Wâyc zuc buz pha hađ nâyx tauh yâuf đany nyăngz mengc seen nzongf, six coong nâyx zanyf, buz muf buz pha woa bix max naih nâyx tauh yâuf đany lêpc buz muf. ³¹ Buz pha max phătc buz nyăngz yâuf cloon buz muf woa têx, buz pha songđ zuc tayc gôh, buz songđ ayx phunz buz pha côx pyây pec munz stymz stauh tuz tayc muf yămz pâu gôh. ³² Wâyc zuc buz baoz đamz nyunc jămđ phunz nâyx tauh yâuf đany tuz pengh oonz phunb đangz muf phunz buz pha, wâyc zuc buz năngx coong, "buz năngđ max ênz tuz nâyx tauh yâuf lauf phunz pha têx, buz cănh jiuc đamz toongz buz nyăngz stoif ah stâyv munh." ³³ Yaz jođ yămz nây ayx nâuh tayv nâyx tauh yâuf đany, jođ pungx phunz nănh lêpc lâyc đomc yâuf pez phunb đangz muf. ³⁴ Six coong năngđ max naih nâyx tauh yâuf đany lêpc buz muf, buz ayx laix hayh nzađ muf buz pha woa? buz max oix mangc buz pha munz stymz tuz tayc." Yô-sepv lănv zac bux nănh nyăngz yâuf pez