43 ¹ Yămz Ca-na-an, stâyz phangz lauf năngx jynh đangh nyâuđ sab hongđ. ² Ya-côpv, nyăngz pyau munh nhlync nzuf ninyh maif Y-yiêpv-tô stâyz phangz nzâyz lauf nyăngz blauh mâyđ, Ya-côpv, coong bux nănh nyăngz toonz, nyâuh ninyh maif tikx cay blauh mâyđ nzâyz lauf phunz pănh nhlync tymb gôh." ³ Yu-đa, coong ănz nănh stiz pha, woax lanh munh năngx coong niđ bux buz, six coong nyâuh năngđ max ênz cloon nyâuh nyăngz yâuf đany lêpc nyâuh taih tauv nây, nyâuh six max hâuđ mungc năngx tuz phătc yaz nyăngz mynb. ⁴ Six coong pha năngđ phunz buz nyăngz yâuc lêpc buz ninyh, buz six max stăngc pha nzac woa ninyh zoz tuz blauh mâyđ. ⁵ Pha năngđ max phunz buz nyăngz yâuf đany lêpc buz ninyh têx, buz six max hayh ninyh gôh, wâyc zuc woax tauh munh bux coong, "Nyâuh năngđ max ênz nyâuh nyăngz yâuf đany lêpc nyâuh taih tauv nây, nyâuh six max hâuđ năngx mungc tuz phătc yaz nyăngz mynb nzof gôh. ⁶ Y-sa-la-ên, coong, "Nyâuh ayx lungđ bix hoiđ yaz tuz zâuđ nâyx yeh? nyâuh săngh laix bix lănv bux woax lanh munh coong nyâuh năngx naih ah lanh yâuf nâyx yeh?" ⁷ Nănh stiz tauz, woax lanh munh songđ năngx naic tauv buz cloon pănh nyăngz pyau munh, nănh năngx naic coong, "nyâuh nyăngz pha năngx yămz max? nyâuh năngx naih tix lanh yâuf pez max? buz songđ zuc âyz nănh naic nyăngz woac tauz nănh, buz ayx laix hayh pâyz tuz nănh, năngx êu buz zuc ênz cloon buz nyăngz yâuf ninyh? ⁸ Yu-đa, coong ănz nănh stiz pha Y-sa-la-ên, phanv phunz buz nyăngz yâuf lêpc buz ninyh, nâyx zanyf buz songđ nyoongz quef ninyh gôh, phunz pănh pha sây songđ max zâuđ zuc tanyđ nyâuđ sab tayc. ⁹ Buz cănh baox đamz ênz nâyx tauh yâuf lauf tauv nây phunz pha, six coong buz năngđ max ênz tuz buz nyăngz yâuf pengh oonz lauf phunz pha têx, buz cănh đamz toongz buz nyăngz stoif ah stâyv munh. ¹⁰ Six coong năngđ max ngaih buz săngx huđ, buz bêc ninyh tuz nyâyc hâyđ lauf nzof gôh." ¹¹ Nănh stiz nyăngz pha Y-sa-la-ên, bux stiz coong, "six coong năngđ seenz zuc ênz nănh ninyh têx, nyâuh six zuc ayx năngđ nâyx, nzâyz nâyx nomz stâyz phangz gongx nyăngz muif hungđ ninyh sangđ phunz woax lanh munh, nzâyz tikx cay yâuh đangz, cloon namh box, njăngx stungz đangz, cloon mâyf toongh, (pyâu claoh, cloon An-man pyâu) nzâyz ninyh nongc ayx sâuđ nyâyc. ¹² Nyâuh six nzâyz nyanh ninyh năngx đungx têx, cah đangc woa hâyđ iz phănc, năngx zuc nzâyz cloon pêuz ănz woa zub tayh cah nzeetx woax đomc nyanh ninyh, sangx max đanyf nănh stiz ănz longđ yâuc max pâyz, ¹³ Phanv nyoongz quef ênz cloon nyâuh nyăngz yâuf ninyh lov woax lanh munh gôh. ¹⁴ Yaz jođ dliênc quaix nyăngz Zâu Tênb-Hungh phunz nyâuh yămz woax lanh munh nyăngz cah đangc, yâuc tuz nănh hâuđ lênh nyâuh, phunz nyâuh coong tuz ênz bên-ya-min, cloon Sê-mê-ôn, phunb đangz lauf nây, six coong pha năngđ năngx stâyb cloon nâyx đomc sây tymb têx, yaz songđ jiuc gôh." ¹⁵ Woax đomc yâuf pez songđ bênc nzâyz ninyh nyăngz muif hungđ, yâuc nzâyz nyanh ninyh năngx đungx têx, ninyh đangc woax hâyđ iz phănc, yâuc năngx ênz cloon Bên-ya-min, lêpc ninyh, nănh stiz songđ coonx nzac Y-yiêpv-tô stâyz phangz ninyh lov Yô-sepv. Giô-sepv nyăngz yâuf pez nzac nănh pyau ¹⁶ Yô-sepv, mangc phătc Bên-ya-min, lêpc nănh stiz ninyh, nănh songđ bux jămđ nănh nyăngz pyau woax đomc pâuz coong, "Nyâuh ênz lâyc đomc munh muf yaz nyăngz pyau, yâuc tayx tix tauh stanyb hauđ ayx a, nâyx noib yaz six cloon nănh stiz songc nhlync đămx noib." ¹⁷ Woax đomc pâuz songđ âyz Yô-sepv, bux nyăngz woac ayx, ninyh ênz nănh stiz nzac Yô-sepv, nyăngz pyau muf." ¹⁸ Pâuz ênz nănh stiz nzac Yô-sepv, nyăngz pyau ninyh woax zanyf, nănh stiz numđ cumh nzav songđ yămz nyâuđ nyâyh lanh coong bux lanh, nănh stiz ênz pănh nzac nây taih, six wâyc zoz nyanh ănz pănh woa tayh nzeetx woax đomc nyanh, nănh stiz bix oix lov dlayc nzac taih jâux pănh, zoz pănh nzâyz ninyh ayx nâuh, mah six oix zoz pănh nyăngz maf lih nzâyz ninyh." ¹⁹ Ênz ninyh tauv woa singh jengh cah đangc, nănh stiz songđ coong bux jămđ Yô-sepv, nyăngz pyau woax đomc pâuz munh. ²⁰ Tah lex, jođ phunz buz naic mâyh ah zâux woac, đangc dlih buz taih nây maif zub. ²¹ Buz muf tauv zeb pyau sec bah nzămc, coib zub tayh, mangc phătc buz maif zub woax đomc nyanh pêuz ănz woa tayh nzeetx, buz songđ nzâyz cloon woax đomc nyanh taih toiv phunz nănh. ²² Buz cănh lanyc nzâyz nyanh taih nongc maif zub, six đangc dlih max pâyz mănv zoz woax đomc nyanh nzâyz taih ănz buz woa tayh cah njaf. ²³ Woax tauh pâuz tauz coong năngx gâyf numđ stauh yâuc cumh nzav, Nyâuh nyăngz Tênb-Hungh, cloon nyâuh pha nyăngz Tênb-Hungh zoz woax đomc nyanh ănz nyâuh nyăngz zub tayh, nyâuh maif zub nyăngz nyanh buz nongc caux nzuf nzof gôh, coong nzuf cun pyau quanz năngx ênz Sê-mê-ôn, taih pongh nănh stiz. ²⁴ Woax tauh pâuz ênz woax đomc yâuf pez nzac pyau muf, zoz womz phunz nănh stiz đaox staux, yâuc lov mađ nzâyz ninyh phunz nănh stiz nyăngz maf lih nhlync. ²⁵ Nâyx đomc yâuf pez bênc săngh sâuđ nyâyc zu nongc sangđ phunz Yô-sepv, wâyc zuc nănh stiz pâyz tuz nănh stix six tuz cloon Yô-sepv, songc nhlync đămx noib. ²⁶ Yô-sepv, lauf tauv pyau, nănh stiz songđ zoz nzâyz taih nongc sangđ phunz Yô-sepv, woax đomc sâuđ nyâyc nzâyz nzac pyau njaf taih, yâuc quâyc nzac nib ninyh paix nănh. ²⁷ Nănh zah naic nănh stiz, nyâuh lauh yămz zoongx lêc sta? nyâuh coong nyâuh pha côx nzongf naz, nănh năngx yămz zoongx max? nănh năngx yămz yangh stâyv max?" ²⁸ Nănh stiz tauz, mâyh nyăngz pâuz, buz nyăngz pha lauf năngx yămz gongx lêc đêh, nănh stiz songđ quâyc nzac nib ninyh paix nănh. ²⁹ Yô-sepv, zaub mynb mangc phătc Bên-ya-min, nănh nyăngz yâuf, cloon nănh songc ah nzif woax lanh toonz, nănh naic coong, "lâyc tauh ya zâyf nyâuh nyăngz yâuf đany max? nănh năngx coong, "jođ Tênb-Hungh hâuđ lênh yâuc sađ pôz phunz nyâuh." ³⁰ Coong nzuf Yô-sepv, songđ tyuv seetb cungh ngwoaic ninyh lov pitc đoif tync yămz woa haoh. ³¹ Đaox mynb songf, nănh njomz mâyc womz seetb cungh ngwoaic taih, bux nănh nyăngz pâuz coong, "Bênc năngv nhlync gôh." ³² Nănh stiz bênc phunz Yô-sepv, cănh nhlync lanyc ah hynh, woax đomc yâuf pez cănh lanyc ah hynh, yămz Y-yiêpv-tô taih tayđ nhlync năngv woax đomc munh cănh yămz lanyc ah hynh, wâyc zuc Y-yiêpv-tô munh max oix cloon Hipc-lu munh songc hynh nhlync năngv. ³³ Yô-sepv, woax đomc yâuf pez cloon nănh stâyv toix nganc, nănh stiz stâyv payh hangh tăng munh côx tauv munh gunx stâyv tiny limb, woax tauh yâuf đany cănh stâyv nănh nyăngz tync, nănh stiz nyâyh ganc songđ lanh mangc lanh. ³⁴ Nănh stiz nyăngz nhlync hopb muif hungđ, pâuz buz tăng Yô-sepv, nyăngz hynh zoz nzâyz taih, six Bên-ya-min, tuz pâu năngx đungx têx pyaz phănc, nănh stiz songđ tuz pungx stymz numđ nyađ cloon Yô-sepv, nhlync năngv. Giô-sepv nyanh zan gaih