12 ¹ Woax zanyf, Zâu Ye-hô-wa, bux Apv-ram, mâyh six năngx zuc ninyh gâyh mâyh lâyc nomz stâyz phangz, gâyh cloon mâyh nyăngz jeenb cloon mâyh nyăngz pha, ninyh zoz tauv yaz bênc phunz mâyh woax nomz tync. ² Yaz six sađ pôz phunz mâyh săngh ah đomc pec stingx manyh yangh lub, nzof mâyh yâuc hayh phunz munh tuz pôz gongx. ³ Laiv lanh poou woac phunz mâyh, yaz yâuc oix sađ pôz phunz woax lanh. laiv lanh zaux mâyh, yaz yâuc oix zaux woax lanh. wâyc mâyh yaz songđ oix sađ pôz phunz gungh đi munh. ⁴ Apv-ram, songđ âyz Zâu Ye-hô-wa, bux nyăngz woac seetb jau ninyh, Lotv, yâuc lêpc nănh ninyh, Apv-ram, tuz jeetb săpc ngâuf nyăngv, nănh songđ ninyh gâyh nănh nyăngz pha, Za-ran. ⁵ Apv-ram, songđ ênz nănh nyăngz au, Sa-rai, cloon Lotv, nănh nyăngz stunz yămz Ha-ran, clopb taih woax đomc jax toongx muif hungđ, cloon nănh tuz taih nyăngz muif lanh munh seetb jau ninyh Ca-na-an, stâyz phangz, songđ tauv Ca-na-an, gôh. ⁶ Apv-ram, stunb ninyh tauv Si-zem, stengv, ninyh tauv ah zâyz (njăngx sôih) woax zanyf, Mô-rê, munh yămz Ca-na-an, stâyz phangz. ⁷ Zâu Ye-hô-wa, hynđ yangh seetb taih coong bux Apv-ram, "Yaz oix sađ nâyx nomz stâyz phangz phunz mâyh, woax zanyf, Apv-ram, songđ njăpc ah nomz tync taih nongc congx phunz Zâu Ye-hô-wa, ănz nănh phătc Zâu hynđ yangh woax tix tync. ⁸ Quaix đangz Apv-ram, năngx stuyđ ninyh tauv Bê-tên stengv nyăngz tongz puôngz zoongz hav, nănh zoongz đupx njiuh ănz woa, Bê-tên stengv yămz nănh stiz nyăngz njiuh stez phanx, A-hi, yămz tongz phanx, yămz woa nănh njăpc ah nomz tync nongc jođ Zâu nyăngz bux. ⁹ Apv-ram, năngx ninyh tauv Nê-gepv stengv. Apv-ra-ham yămz Y-yiêpv-tô stâyz phangz ¹⁰ Ca-na-an stâyz phangz, pongh zuc nyâuđ sab, Apv-ram, nănh songđ ninyh yămz Y-yiêpv-tô stâyz phangz. ¹¹ Cayx nzac Y-yiêpv-tô woax zanyf, nănh coong bux nănh nyăngz au, Sa-rai, "Yaz pâyz mâyh six ah lanh munh sab quai vâyc. ¹² Y-yiêpv-tô, munh phătc mâyh nănh stiz songđ hayh coong, "Mâyh six lâyc tauh ya nyăngz au, taih pănh tayx nănh, njâuh phunz mâyh săngh. ¹³ Mâyh six zuc hipđ mâyh ayx yaz nyăngz muc, nănh stiz songđ wâyc mâyh ayx gongx dlayc, wâyc phunz mâyh njâuh tuz yaz nyăngz mengc." ¹⁴ Apv-ram, nzac Y-yiêpv-tô woax zanyf, Y-yiêpv-tô munh seenz phătc Sa-rai quai nzongf. ¹⁵ Pha-ra-ôn, hungh nyăngz zayb munh phătc Sa-rai, quai nzongf, nănh stiz songđ ninyh lănv bux Pha-ra-ôn. quaix đangz nănh stiz songđ ênz Sa-rai, nzac woa Hungh tync ninyh. ¹⁶ Wâyc Sa-rai, Pha-ra-ôn, songđ ayx gongx dlayc phunz Apv-ram, nănh tuz pa-jiz yungh, ngoongh woangh, loh-toh câuh cloon nyâyf, maf lih câu cloon nyâyf, cloon nâuh toonz, nâuh sab. ¹⁷ Wâyc Apv-ram, Sa-rai, Zâu Ye-hô-wa, ayx phunz Pha-ra-ôn nyăngz pyau munh, pongh zuc ah dlapc zâuđ nanc lub. ¹⁸ Hungh stix Pha-ra-ôn, êu Apv-ram taih nănh songđ naic coong, "Mâyh ayx lungđ phunz yaz nâyx yeh? ha săngh laix mâyh bix max lănv bux bây yaz pâyz, Sa-rai, six mâyh nyăngz au? ¹⁹ Săngh laix mâyh bix coong, "Nănh six yaz nyăngz muc? phunz yaz zoz nongc ayx au? mâyh nyăngz au nhlef, ênz ninyh zec gôh. ²⁰ Pha-ra-ôn, songđ seetb lanyf êu nănh nyăngz zayb munh ênz Apv-ram, cloon nănh naih nyăngz muif hungđ seetb stâyz phangz ninyh. Apv-ham cloon Lotv tinyh gâyh