¹ Nyâuh ayx Zâu nyăngz Munh lex! nyâuh six zuc ayx pengh stymz ayx nyâuđ dlênc phunz nyâuh nyăngz nâuh. yâuc zuc săngx, wâyc zuc nyâuh yâuf-pez cungb naih ah tauh Zâu yămz woa Tênb-toongh. ² Six zuc muif dlih vaic clo Zâu, coouv Tênb-Hungh. ³ Săngx clo-Zâu jođ Tênb-Hungh phunz Yaz naih congv lănv Njâuv Zâu pinyx max phunz plongx yangh nyăngz dlayc, Yaz nâyx zanyf wâyc nâyx đomc cumh pâuz zuc yămz nzauh. ⁴ Six zuc clo-Zâu stăngc phunz yaz hayh lănv nâyx đomc plongx yangh nyăngz dlayc năngđ yaz hopđ zuc coong nâyx. ⁵ Six zuc muif dlih cloon max zeen nyăngz Munh tinyh tongb, yâuc max nongc quanyf săngx huđ. ⁶ Nyâuh yâuf-pez six zuc coong cuyb mungv nyăngz woac yungf Munh, năngđ ănz đau phunz tax hungđ naih mic nâyx, wâyc phunz nyâuh yâuf-pez hayh pâyz tauz tuz hopđ Munh naic nyăngz woac. ⁷ Pănh Stăngz nyăngz yâuf-pez Ti-zi-cơ, nănh six naih stymz ayx Njâuv Zâu nyăngz cumh pâuz Munh, nănh six cloon yaz songc congz ayx cumh pâuz nănh yâuc oix lănv nzuf yaz ayx nyăngz dlayc. ⁸ Yaz songđ paiđ nănh ninyh nyâuh yâuf-pez woa, oix phunz nănh lănv bux nyâuh yâuf-pez pâyz tuz yaz yămz nây six năngđ laix, yâuc phunz nănh oonz nyâuh yâuf-pez nyăngz nyâuđ. ⁹ Năngx naih ah lanh stăngz nzongf nyăngz yâuf-pez Ô-nê-sim naih stymz cloon nănh ninyh. Nănh stiz iz lanh six oix lănv nzuf yaz yămz nây nyăngz dlayc bux nyâuh yâuf-pez. ¹⁰ Cloon yaz zuc yămz nzauh woax tauh A-ri-takc, Makv cloon Ba-na-ba, zaoh tayđ nyâuh yâuf pez ô stayx. Six coong Makv, năngđ tauv nyâuh woa, nyâuh six zuc stipx nănh năngx gongx. ¹¹ Yê-su năngx naih pitc nomz bux hipc ayx (Dukv-tu) lauf zaoh tayđ nyâuh yâuf pez ô stayx. Nây đomc zeen Zâu nyăngz Yiu-thai Munh cloon yaz songc ayx Tênb-toongh Côkz nyăngz cumh pâuz Munh nănh stiz yâuc oonz yaz nyăngz nyâuđ. ¹² Ê-phapv-ra, six ah tauh songc yaz ayx Njâuv Zâu Yê-su nyăngz cumh pâuz Munh yâuc zuyz woac tayđ nyâuh yâuf-pez ô stayx, Ê-phapv-ra muif dlih nzac jab clo Zâu jođ Tênb-Hungh phunz nyâuh yâuf-pez lub taih hayh zeen tuz wăn, hayh âyz nzuf Tênb-Hungh clakx clunh nyăngz zux ix. ¹³ Yaz pâyz tuz tah mâyh ayx cumh pâuz zâuđ wâyc yâuf-pez yămz Lau-đi-sê, cloon Hi-ê-ra-phô. ¹⁴ Pănh stăngz nzongf nyăngz mađ stăngc Lu-ca, cloon Đê-ma zuyz woac tayđ nyâuh yâuf-pez ô stayx. ¹⁵ Jođ zuyz woac bux yămz Lao-đi-xê, nyăngz yâuf-pez cloon ô nim-pha cloon huyđ-toongh Munh nzomf yămz ô nyăngz pyau. ¹⁶ Nyâuh toc tuz nâyx zây jeenx songf, jođ zuyz ninyh phunz yămz Lao-đi-xê huyđ toongh nyăngz Munh toc, nyâuh yâuc zuc toc Lao-đi-xê, huyđ toongh zuyz taih nyăngz jeenx. ¹⁷ Lănv bux A-zipv coong, “six zuc ayx năngx songf Zâu paiđ phunz nyăngz cumh pâuz. ¹⁸ Yaz Phao-lô, nongc puf ja nâyx zây jeenx zaoh tayđ nyâuh yâuf-pez ô stayx, jođ nyâuh săngx tauv yaz yămz nây nzauh. Jođ Zâu sađ pôz cloon nyâuh yâuf-pez ô stayx yămz.