¹ Yaz oix nongc nyâuh yâuf-pez pâyz tuz yaz nzac jab ayx congz wâyc nyâuh yâuf-pez yămz Lau-đi-sê, Cloon max zengx tuz pongh yaz nyăngz Munh. ² Yaz oix nongc nyâuh yâuf-pez zeen tingc, hopđ stymz dlongh âyx lanh Stăngz lanh. Hayh zeen tingc, songđ pâyz nzuf Tênb-Hungh max zengx plongx yangh nyăngz dlayc six yămz Njâuv Zâu. ³ Muif hungđ saix nyăngz Tongb-manyh cloon bănh sangz six zaub ănz nănh nyăngz tync cah njaf. ⁴ Yaz coong nâyx đomc woac phunz nyâuh yâuf-pez, wâyc max phunz nzeetx blangc nyăngz Munh nongc cuybmungv nyăngz woac jaf zuc nyâuh yâuf-pez. ⁵ Max cun Yaz nyăngz stynb max cloon nyâuh yâuf-pez yămz. Six yaz nyăngz stymz nyâuđ yămz stătx nyâuh yâuf-pez. Yaz tuz phătc nyâuh yâuf-pez nyăngz seenz stymz zeen wăn Njâuv Zâu. Yaz seenz numđ nyađ nzongf. ⁶ Wâyc zuc nyâuh yâuf-pez tuz stipx Njâuv Zâu Yê-su ayx Zâu. songđ zuc săngh yămz nănh cah njaf. ⁷ Six zuc nzac đungh năngx đôz zâyv quaix taih zeen wăn. Năngđ Munh nzaox nyâuh quaix nâyx yâuc naih nyâuđ clo ănz. ⁸ Six zuc stêu stymz, max nongc phunz laiv lanh nongc bamh Munh nyăngz tongb-Manyh nyâyh seetb taih nyăngz gâyf jaf nyâuh yăngh longđ jau. Jaf Munh nyăngz jau six tăng cun đamx gungh woax tauh manđ nyâyh seetb taih wengh nyâuh. Wâyc âyz bamh Munh nyăngz stongz zez tâuh. Max zâyf tăng Njâuv Zâu taih. ⁹ Wâyc zuc Tênb-Hungh nyăngz stymz nyâuđ nyâyh muif hungđ six yămz njâuv Zâu nyăngz stynb dloih nzuf. Tăng nănh năngx săngh yămz nây nib mync. ¹⁰ Nyâuh yâuf-pez naih dloih nzuf muif hungđ nyâuh sămv nongc nyăngz tax’ hungđ yămz Njâuv Zâu nyăngz cah njaf, Nănh six muif hungđ nyăngz Hungh. muif hungđ nyăngz Zâu. ¹¹ Nâyx zanyf nyâuh yâuf`-pez tuz stipx ah hungđ quaix catz nyăngz gâyf săngb yămz nănh cah njaf, max zâyf nongc Munh puf catz, Quaix catz nyăngz Gâyf six yămz Njâuv Zâu Yê-su nănh zuc Tayc nyăngz jau, nyâuh yâuf-pez nyăngz stynb tuz zay đutb pănh pamf Stoif nyăngz lanyf. ¹² Nyâuh yâuf-pez quaix womz nyăngz gâyf songđ tuz plopx cloon Njâuv Zâu Yê-su yâuc tuz cloon nănh săngh phunb stengb taih quaix seenz stymz, six Tênb-Hungh nyăngz lanyf, seenz hayh ayx phunz Njâuv Zâu Yê-su Tayc blătc năngx săngh phunb stengf taih nyăngz lanyf. ¹³ Cah đangc wâyc nyâuh yâuf-pez pamf Stoif yâuf max (Quaix catz nyăngz gâyf) max quanyf pamf stoif nyăngz stymz nyâuđ, nyâuh songđ longđ Tayc gôh. six Tênb-Hungh phunz nyâuh yâuf-pez cloon Njâuv Zâu săngh phunb stengb songđ quanyf nyâuh nyăngz stoif zaix. ¹⁴ Nănh stotb quanyf pănh zuc tingc stoif nyăngz zaix tanz, six cloon pănh tinyh nzengz nyăngz gâyf, zoz Ninyh tingz ănz săpc đăngc zax. ¹⁵ Tênb-Hungh phunz nănh yămz săpc đăngc zax nyăngz gâyf tuz Hingh quaix cun đamx yâuh naih jab naih lanyf cun dlayc woax đomc, Năngx toongx songx Munh ênz nănh stiz ninyh năngđ zuc zab tuz taih nyăngz Munh nâyx, phunz yămz nây bamh canz tuz phătc yaz nyăngz lanyf. ¹⁶ Wâyc năngđ naz nongx gâyf bây laiv lanh wâyc pănh nhlinc hopb nyăngz jau, Quaix stêtz nyăngz gâyf, mah six quaix săngb lav nyăngz gâyf, mah six tingc congz Noib nyăngz gâyf tingc nyâuh. ¹⁷ Nâyx đomc dlayc six cungb ayx bah cloiz goib yangh đangz phanx oix seetb taih nyăngz dlayc. Seenz cănh nănh nyăngz stynb six Njâuv Zâu. ¹⁸ Nongx gâyv bây laiv lanh yônx nyâuh yâuf-pez yâuc nongc nănh stiz nyăngz zux ix yac nyâuh yâuf-pez nhlimc ayx jeenz canyx paix Stynz-Munh. Woax đomc Munh cungb ninyh lov mâyc phătc nyăngz dlayc, yâuf âyz bamh Munh oongx nzongf nyăngz zux ix zanyb lub. jaf phunz nyâuh yâuf-pez nyăngz sâuđ nyâyc tuih. ¹⁹ Woax hungđ Munh yâuc max coouv Njâuv Zâu ayx pyây. Pyây yâuc ayx coonz phunz stynb taux tuz hopđ, jaz taux jaz, nyoiz taux nyoiz, âyz Tênb-Hungh nyăngz zux ix clopb taih săngh ah nomz stynb stayđ lub taih. ²⁰ Ha nyâuh yâuf-pez cloon Njâuv Zâu Tayc tuz gâyh đutb cun đamx yâuh naih jab naih lanyf cun dlayc nyăngz manđ nzof, ha săngh laix nyâuh yâuf-pez yâuc năngx yămz năngđ bamh canz Munh? nyâuh wâyc săngh laix lauf năngx lêpc bamh Munh njăpc taih nyăngz gâyf? ²¹ Nănh stiz coong, “năngx gâyf nhlync nâyx đomc, yâuc năngx gâyf đopx woax đomc, yâuc max tuz lumz woax hungđ.” ²² Six nâyx đomc yeetx stong tax hungđ năngđ nzuf songđ pac, nâyx đomc cungb pênx bamh Munh njăpf taih nyăngz tax hungđ cloon bamh canz Munh Nzaox nyăngz woac. ²³ Nzăngđ phătc six năngđ Munh naih tongb-manyh, canyx paix âyz nănh stiz nyâyh seetb taih nyăngz gâyf, jaf nhlimc ayx jeenz, ayx phunz stynb zuc zâuđ, six Nâyx đomc tax hungđ max naih lungđ stuyh muc max stăngc cun tuz Munh nyăngz stynb sangc oix ayx nyăngz jau!.