4 ¹ Singx-lingh coong manyh pec, đangz phanx naih đomc munh quanyf nănh stiz zeen nyăngz jau, Nănh stiz mungv manđ jaf nănh stiz ninyh lêpc manđ nzaox nyăngz jau. ² Pâyh zac nyâuđ ngokx nyăngz munh nongc bah camx baiz woac jaf munh, wâyc zuc nănh stiz nyăngz stymz nyâuđ six năngđ njab stib plaz munh nâyx. ³ Nănh stiz câmx max phunz ah phanx munh zoongz pyau, yâuc zuc njif nhlync hopb, nâyx đomc nhlync hopb Zâu Tênb-Hungh zâyx phunz zeen nyăngz munh pâyz tuz seenz gâyf, nongc stymz hâuđ Zâu nzuf songđ nhlync tuz. ⁴ Zâu Tênb-Hungh zâyx taih nyăngz muif hungđ six gongx nzuf, max naih laiv hungđ năngx zuc nzêmh, tinyh phanv hâuđ zâu nzuf six nhlync tuz. ⁵ Wâyc zuc mungc Zâu Tênb-Hungh nyăngz woac, cloon đoouc coouv nyăngz woac hayh stav tuz muif hungđ dlăngc nzuf. Ayx Njâuv Zâu nyăngz cumh pâuz gongx ⁶ Six coong Sây năngđ zoz nâyx đomc jau taih nzaox pănh nyăngz yâuf pez, mâyh songđ săngh Njâuv Zâu Yê-su nyăngz pâuz gongx. Nâyx đomc seenz stymz cloon nzaox gâyf nyăngz woac gongx songđ yungf tuz nyâuh nyăngz mengc hoonh zeen yongb staox. ⁷ Nyâuh six zuc pyeenv goib max zeen Tênb-Hungh woax đomc munh nyăngz plix-plaiz lănv câu nyăngz woac, six zuc jâuz stymz yâuc canyx bongc Zâu six năngx gongx têx. ⁸ Jâuz pănh nyăngz stynb songđ hayh stăngc tuz pănh ah phănc, Six jâuz stymz ongx huđ Zâu Tênb-Hungh songđ hayh stăngc tuz pănh muif tyuh jau, tăng yămz nây yangh stâyv, cloon đangz phanx woax stâyv tymb. ⁹ Yaz coong nâyx đomc woac six seenz nyăngz, jic tuz muif lanh munh zeen gongx. ¹⁰ Wâyc zuc yaz ayx nâyx đomc cumh pâuz zâuđ, six wâyc yaz tăpx nâyx đomc njih mungc yămz naih săngh mengc nyăngz Zâu Tênb-Hungh, ayx muif lanh munh nyăngz Njâuv Zâu, tah yeetx six lanyc ayx zeen Zâu munh nyăngz Njâuv Zâu. ¹¹ Mâyh zuc nzaox munh nâyx đomc dlayc. ¹² Năngx gâyf bây laiv lanh phătc mâyh nyăngv tauh gunx bix mangc mâyh stam, six zuc ayx caox gao gongx phunz zeen Zâu nyăngz munh hođ, coong nyăngz woac, cloon seenz stymz six zuc stăngz munh đăngb zengh. ¹³ Seenz zuc nongc nyâuđ tođ Canyx-Stâub nzaox phunz munh mungv, zu yaz ninyh tauv nyâuh woa. ¹⁴ Năngx gâyf pungx đutb mâyh stipx Stênx-stengb munh nyăngz woac, cloon munh côx tăpx puf ănz yâuc poou mâyh woax đomc sâuđ nyâyc. ¹⁵ Mâyh six zuc nzuf stymz nyâuđ ayx năngx nzuf nâyx đomc cumh pâuz, phunz muif lanh munh phătc mâyh ayx cumh pâuz seenz săngh nongc. ¹⁶ Mâyh six zuc năngđ cayb yămz năngx hođ, buôngh cloon mâyh nzaox nyăngz gâyf, mâyh năngđ yămz tuz hođ têx, mungv mâyh nyăngz woac woax đomc munh songđ tuz Njâuv. Cloon pitc lanh yămz ayx laix