¹ Cun lauh yaz numđ zu max tuz nzof, yaz songđ tingc nyâuđ ah lanh yămz A-tiên stengv. ² Buz paiđ Ti-mô-thê ninyh nyâuh yâuf-pez woa, nănh six stăngc buz nzônh Zâu Tênb-Hungh nyăngz cuđ jeenx, buz paiđ nănh ninyh oonz nyâuh yâuf-pez nyăngz nyâuđ phunz naih seenz stymz zeen wăn Njâuv Zâu. ³ Wâyc max bây nyâuh yâuf-pez laiv lanh pongh zuc nâyx đomc wănh nanc bix nămx nyâuđ, nănh tingc đangc phunz nyâuh yâuf pez pâyz tuz nyâuh zuc pongh nâyx đomc wănh nanc ⁴ Buz năngx cloon nyâuh yâuf-pez yămz nyăngz săngx huđ, yaz bêc lănv bux nyâuh yâuf pez quaix đangc nzof gôh, nyâuh songđ seenz zuc pongh nâyx đomc wănh canyz năngđ yaz coong nâyx. ⁵ Wâyc năngđ nâyx yaz numđ zu max tuz nzof, yaz songđ paiđ Ti-mô-thê ninyh nyâuh yâuf-pez woa, tayđ pâyz nyâuh yâuf pez nyăngz seenz stymz six năngđ laix, wâyc zuc yaz cumh nzav cungb woangb jaf Munh woax tauh ya manđ jaf nyâuh ayx bây yaz ayx nyăngz cumh pâuz zâuđ tuih nzuf. ⁶ Six Ti-mô-thê nzăngđ tăng nyâuh yâuf-pez woa phunb đangz lauf, nzâyz nyâuh yâuf pez naih seenz stymz nyăngz cuđ jeenx lauf lănv bux yaz Coong, “Nyâuh yâuf-pez muif dlih lauf săngx tauv yaz, seenz oix pongh năngđ yaz oix tuz pongh nyâuh yâuf-pez woa nâyx. ⁷ Songx yâuf-pez lex! Max cun buz hănđ pongh zuc laiv hungđ zâuđ nanc dlauc wâyb, six buz numđ lănv coong nyâuh yâuf-pez naih seenz stymz songđ oonz tuz yaz nyăngz stymz nyâuđ. ⁸ Buz nyăngz Mengc tuz clakx-clunh, six wâyc nyâuh yâuf-pez zeen wăn Zâu. ⁹ Yaz ayx laix naih woac caux hâuđ Zâu Tênb-Hungh wâyc nyâuh yâuf-pez? Yaz hâuđ nănh wâyc zuc nyâuh yâuf-pez phunz yaz naih oonz loc yămz Zâu Tênb-Hungh nyăngz cah đangc. ¹⁰ Yaz săngh noib săngh munf nongc nzuf stymz nyâuđ clo jođ Zâu, phunz buz hayh tuz ninyh tayđ nyâuh yâuf-pez ah hâyđ tymb, nyâuh nyăngz seenz stymz yêmv laiv hungđ yaz songđ stăngc pâu phunz nyâuh yâuf-pez tinyh đoih. ¹¹ Nâyx zanyf yaz jođ pănh nyăngz Nzangc Pha Zâu Tênb-Hungh, Cloon Zâu Yê-su, coib jau phunz yaz hayh tuz ninyh tayđ nyâuh yâuf-pez ô stayx. ¹² Jođ Zâu stăngc phunz nyâuh yâuf pez lanh stăngz lanh, yâuc stăngz songx Munh yongb staox, năngđ yaz stăngz nyâuh yâuf-pez woa nâyx. ¹³ Yaz jođ nănh njăpc wăn nyâuh yâuf pez nyăngz stymz nyâuđ, zu tauv Njâuv Zâu năngx nzac taih woax zanyf, Cloon yeetx stong pênx nănh nyăngz Munh, songđ hayh tuz yămz Nzangc Pha Zâu Tênb-Hungh nyăngz cah đangc đăngb zengh nzuf max naih tync nzêmh.