¹ Songx yâuf-pez lex! nyâuh cănh pâyz tuz buz ninyh tayđ nyâuh yâuf-pez nyăngz jau six max zâyf max săngh nongc. ² Nyâuh yâuf-pez pâyz tuz dlênh noib buz ninyh tayđ nyâuh yămz Phi-lipv stengv, buz zuc dlauc huđ năngđ nyâuh yâuf-pez pâyz nâyx, buz zuc Munh đungx coong peo ayx peo, zengv buz, six Tênb-Hungh stăngc buz pungx stymz nzônh cuđ jeenx phunz nyâuh yâuf-pez ô stayx mungv. ³ Buz êu nyâuh yâuf-pez nyăngz woac max zâyf oix naih njih phâyz puv maoh bah lotb jaf nyâuh yâuf-pez. ⁴ Buz nzônh cuđ jeenx six wâyc zuc Zâu Tênb-Hungh jaoz nâyx hungđ cumh pâuz phunz buz, buz lănv cuđ jeenx, six max zâyf ayx hopđ bamh Munh nyăngz stymz nyâuđ, six buz ayx hopđ stâyv yaz stymz nyâuđ woax tauh Zâu Tênb-Hungh. ⁵ Nyâuh yâuf-pez pâyz tuz yaz ninyh nyâuh woa yaz max nongc woac camz jaf laiv lanh Munh, yâuc max naih nyâuđ pinyx mauh nyanh tax hungđ, nây six Zâu Tênb-Hungh cănh stăngc ayx zanyx manyf phunz buz coong nyăngz woac six seenz nyăngz. ⁶ Buz max lov Munh tanv buz, max lov nyâuh yâuf-pez yâuc max lov laiv lanh. ⁷ Max cun buz ayx Njâuv Zâu nyăngz pâuz, buz naih gâyf wâyb nyâuh yâuf-pez, yaz cloon nyâuh yămz nyăngz săngx huđ, nongc dlênc nyâuđ jămđ nyâuh năngđ nzif jămđ nănh nyăngz sây. ⁸ Wâyc zuc buz stăngz nyâuh yâuf-pez, buz songđ lănv Zâu Tênb-Hungh nyăngz cuđ jeenx phunz nyâuh, njynh cloon buz nyăngz stynz Mengc. Yâuc numđ nyađ wâyc phunz nyâuh yâuf-;pez, wâyc zuc nyâuh six seenz ayx buz stăngz nzongf nyăngz Munh. ⁹ Songx yâuf-pez lex! naih dlih nyâuh lauf năngx tauv buz ayx congz zâuđ, buz lănv Zâu Tênb-Hungh nyăngz cuđ jeenx phunz nyâuh yâuf-pez woax zanyf, buz săngh noib săngh munf ayx cumh pâuz dlauc wâyb phunz nyâuh yâuf-pez. ¹⁰ Buz năngx yămz nyâuh yâuf-pez mungh tongx congv woax zanyf, buz ayx nyâuđ zanyx max naih tync nzêmh, Zâu Tênb-Hungh cloon nyâuh yâuf-pez cănh stăngc buz ayx zanyx manyf pâyz năngđ nâyx. ¹¹ Nyâuh yâuf-pez pâyz buz nênf nyâuh năngđ Pha cloon nănh nyăngz sây nâyx. ¹² Buz stăngc nyâuh songx Munh zoongz jab dlungf nyâuh nyăngz stymz nyâuđ yâuc oonz nyâuh yâuf-pez nyăngz nyâuđ, Quynb nyâuh yămz nây stâyv sangc six zuc yămz payh Zâu Tênb-Hungh, six êu nyâuh yâuf-pez taih nzac nănh Gwăngz-eng nyăngz Côkz woax tauh. ¹³ Năngx naih ah tyuh buz muif dlih hâuđ Zâu Tênb-Hungh, six wâyc zuc buz lănv Zâu Tênb-Hungh nyăngz gâyf phunz nyâuh yâuf-pez mungv nzuf nyâuh songđ numđ nyađ stipx, nây six max zâyf bamh Munh nyăngz gâyf, seenz six Zâu Tênb-Hungh nyăngz gâyf, yămz nyâuh stipx Zâu nyăngz Munh nyâuđ njaf ayx cumh pâuz woax hungđ gâyf. ¹⁴ Songx yâuf-pez lex! nyâuh pongh zuc dlauc wâyb nyăngz dlayc, six năngđ yămz Yiu-đê stengv nyăngz huyđ toongh zeen Njâuv Zâu Yê-su nyăngz Munh pongh zuc dlauc wâyb nyăngz dlayc, wâyc zuc nyâuh cănh pongh zuc nyâuh nyăngz phănc jeenđ yâuf pez ayx peo, năngđ nănh cănh zuc Yiu-thai munh ayx peo nănh zuc dlauc huđ woa nâyx. ¹⁵ Nănh stiz Yiu-thai Munh tayx Zâu Yê-su, Cloon Tâuc woac Munh, zinyx nănh stiz luiđ buz seetb Côkz, nănh stiz ayx nyăngz dlayc phunz Tênb-Hungh numđ mâux, yâuc cloon muif lanh Munh naih yônz zaz. ¹⁶ Nănh stiz lov jau tăng max phunz buz nzaox bây max zâyf Yiu-thai Munh tuz Njâuv, nănh stiz yâuc muif dlih pamf stoif tuz pong câuv, nâyx zanyf nănh stiz songđ zuc Tênb-Hungh hănđ. ¹⁷ Songx yâuf-pez lex! buz nyăngz stynb stayđ gâyh nyâuh yâuf-pez ah dlapc côz, six buz nyăngz stymz nyâuđ max gâyh côz. buz songđ cox găngx ninyh tayđ nyâuh yâuf-pez ah hâyđ tymb. ¹⁸ Yaz Phao-lô, seenz oix ninyh tayđ nyâuh yâuf-pez ah hâyđ tymb, six zuc Sax-tanx tăng. ¹⁹ Njâuv Zâu năngx taih woax zanyf, laiv hungđ phunz yaz naih tync mungc, phunz yaz naih oonz loc, phunz yaz năngđ naih ah nomz banyh Tênb mouc, wâyc nyâuh yâuc-pez max? ²⁰ Nyâuh yâuf-pez seenz zâyf ayx yaz nyăngz Gwăngz-eng, yâuc ayx buz nyăngz oonz loc.