9 ¹ Yaz max zâyf ayx pungx goib nyăngz munh? Yaz yâuc max zâyf ayx cumh pâuz munh mah? Yaz max tuz phătc Zâu Yê-su mah? Max zâyf yaz stăngc Zâu ayx cumh pâuz, nyâuh yâuf pez nzăngđ tuz zeen Zâu Yê-su mah?” ² Max cun pitc lanh munh hănđ max nhleenc yaz ayx cumh pâuz munh, Six nyâuh yâuf pez lauf nyunc yaz ayx cumh pâuz munh, wâyc zuc nyâuh yâuf pez ayx zanyx manyf lănv coong yaz six ayx Zâu nyăngz cumh pâuz munh.” ³ Nây six yaz nyăngz woac tauz phunz nănh stiz thăngx măkx yaz ayx cumh pâuz munh.” ⁴ Buz max naih gâyf nhlync hopb mah? ⁵ Buz max naih gâyf nongc zeen Zâu munh nongc ayx au mah? Năngđ woax đomc cumh pâuz munh, Cloon Zâu nyăngz Yâuf pez Phê-rơ ênz au lêpc ninyh mah?” ⁶ Max six cungb yaz cloon Ba-na-ba nzăngđ zuc ayx cumh pâuz yungf mengc? ⁷ Max naih laiv lanh ayx pengz nyăngz munh bix cănh zuc seetb nyanh lav phunz pengz pyây sta? max naih laiv tauh songx đah wynb tungh cuđ pyâu bix max tuz nhlync Nănh nyăngz pyâu stađ? Max naih laiv lanh yungf Pa-jiz yungh bix max tuz hopb Pa-jiz yungh nyăngz nu mah? ⁸ Yaz max zâyf coong âyz bamh munh nyăngz zux ix đêh, Tênb-Hungh nyăngz Đoouc-lif gâyf lauf coong năngđ nâyx lêc đêh.” ⁹ Mô-Sê nyăngz gâyf lauf ja coong, “Ngoongh zaiđ blauh nyăngz săngx huđ năngx gâyf pongz ngoongh nzetx nengx. Ha six Tênb-Hungh cungb stauh phunz ngoongh mah six?” ¹⁰ Nănh coong nâyx đomc woac, Nănh max zâyf coong wâyc pănh mah? njayh njingh nyăngz munh cloon bopc blauh nyăngz munh songđ naih tync zu mungc tuz sâub nănh stiz nyăngz zunb jengz clao nănh stiz ayx nyăngz congz.” ¹¹ Buz songx Singx lingh nyăngz nhlimb yămz nyâuh yâuf pez nyăngz nyâuđ, ha buz yămz nyâuh yâuf pez woa Sâub buz sămv nongc nyăngz muif hungđ nyâuh numđ đungx yongb max?” ¹² Six coong pitc đomc munh lauf naih gâyf êu nyâuh yâuf pez songc nănh stiz têx, ha buz max zâyf năngx naih gâyf têx êu nyâuh yâuf pez taih songc buz mah? Six ayx lungđ gâyf buz max zengx nongc quaix laiv hâyđ, Phunb đangz buz tanyđ zâuđ wâyc max phunz laiv hungđ tăng Njâuv-Zâu nyăngz cuđ jeenx.” ¹³ Nyâuh yâuf pez max pâyz mah? Laiv lanh yămz gâyf paix toongh ayx cumh pâuz six tuz stipx woax siênz pyau nyăngz nhlync hopb mah? Laiv lanh ayx cumh pâuz yămz woa congx Hungh tync, six tuz stipx woax đomc stanyb lanyh nyăngz A phănc mah?” ¹⁴ Lauf năngđ naz, Zâu êu tinyh phanv laiv lanh lănv cuđ jeenx nyăngz munh, Six tuz cuđ jeenx yungf mengc.” ¹⁵ Six nâyx đomc gâyf yaz max zengx nongc quaix laiv hâyđ, nâyx zanyf yaz ja nâyx đomc woac six max zâyf oix jođ nyâuh yâuf pez laiv hungđ nongc, yaz tayc six năngx gongx têx, wâyc max bây laiv lanh zoz yaz coong nyăngz woac taih aox coong pênx ưrx jeetx woac.” ¹⁶ Yaz lănv cuđ jeenx six yaz max nzeetx blangc, Nây six yaz nyăngz cumh pâuz songđ zuc ayx, Six coong yaz max lănv cuđ jeenx têx yaz songđ numđ zâuđ.” ¹⁷ Yaz coong yaz cănh njăpc tingc nyâuđ oix lănv cuđ jeenx têx, Yaz six tuz stipx congz stynh, Six soong yaz max zâyf oix njăpc tingc nyâuđ ayx têx, Six zâu cănh jaoz phunz yaz ayx.” ¹⁸ Ha songđ tuz laiv hungđ sâuđ nyâyc? (Phânh thươngz) Six năngđ nâyx, yaz lănv cuđ jeenx yaz max êu munh seetb laiv hungđ phunz yaz, Cayx năngđ munh lănv cuđ jeenx nâyx.” ¹⁹ Yaz tuz pungx goib yaz max zuc ayx laiv lanh nyăngz nâuh, Yaz nyunc ayx songx munh nyăngz nâuh, ayx phunz munh đungx tuz Njâuv six cangf năngx gongx têx.” ²⁰ Yaz cloon Yiu-thai munh yămz, Yaz yâuc ayx năngđ Yiu-thai munh nâyx wâyc phunz Yiu-thai Munh tuz Njâuv, Max cun yaz yămz max zâyf yămz Đoouc-lif gâyf cah đi nyăngz munh, yaz songđ lauf yămz năngđ nănh stiz nâyx, Phunz max yămz Đoouc-lif gâyf cah đi nyăngz munh năngx tuz Njâuv.” ²¹ Yaz cloon max naih Đoouc-lif gâyf woax đomc munh yămz, Yaz songđ yămz năngđ woax đomc munh nâyx phunz Nănh stiz tuz njâuv, Yaz max zâyf coong yaz max âyz Tênb-Hungh nyăngz Đoouc-lif gâyf ayx đêh, Six yaz ayx phunz max naih Njâuv-Zâu nyăngz Đoouc-lif gâyf woax đomc munh tuz Njâuv. ²² Yaz cloon zeen max yongb nyăngz munh yămz, Yaz yâuc yămz năngđ woax đomc munh nâyx, ayx phunz zeen max yongb woax đomc munh tuz Njâuv, Yaz songđ ayx năngđ woax đomc munh, Nongc muif hungđ zux ix wâyc stăngc woax đomc munh tuz Njâuv. ²³ Yaz năngđ nâyx ayx Six ayx wâyc cuđ jeenx, Yaz nzof nzăngđ tuz naih cuđ jeenx nyăngz Pôz.” ²⁴ Nyâuh yâuf-pez songđ pâyz tuz munh tinyh tâu tyuv, Six jangx cungb tuz naih ah lanh tuz Sâuđ nyâyc, nănh songđ zuc nzac jab tyuv nzăngđ tuz sađ Sâuđ nyâyc! ²⁵ Tinyh tâu tyuv nyăngz munh muif lanh mănv songđ zuc cănh leđ tuz mănv nyăngz stynb, oix zab tuz nomz bamh canz nyăngz banyh Tênb-mouc, Six năngx hayh huđ, Six pănh nyăngz banyh Tênb-mouc Stâyv quâyx max hayh quaiz.” ²⁶ Wâyc năngđ nâyx yaz tyuv yaz max zâyf tyuv năngđ max naih tync sec nyăngz munh, Yaz bopc max zâyf năngđ munh tinyh phanv nongc puf bopc nzaox.” ²⁷ Yaz hođ tuz yaz nyăngz stynb stayđ yongb, Phunz yaz cănh hayh cun tuz hingh, Six yaz zuc yac nănh ayx nâuh phunz yaz, Phunz yaz nzaox pitc lanh max zuc Tênb-Hungh quanyf yaz.” Bux munh max cuyb paix miuc hanyh