10 ¹ Songx Yâuf pez lex, Yaz oix nongc nyâuh pâyz tuz pănh nyăngz stu stongz lêpc Mô-sê woax zanyf, Naih laiv hungđ dlayc seetb taih phunz nănh stiz, nănh stiz tinyh đoih yămz woax tâu vănx cah đi clăngv quaix woa coiđ stib.” ² Nâyx đomc dlayc six năngđ quaix womz nyăngz gâyf phunz lêpc Mô-sê woax đomc munh.” ³ Nănh stiz songc nhlync Singx lingh phunz nyăngz nhlync hopb.” ⁴ Nănh stiz hopb Singx lingh phunz nyăngz womz, wâyc zuc lêpc nănh stiz ninyh woax nomz njauz pyây nyăngz womz six Njâuv Zâu. ⁵ Nănh stiz munh đungx ayx max hođ Tênb-Hungh nyăngz nyâuđ, songđ zuc quanyf mengc ănz pong woa stâyz phangz blănf.” ⁶ Nâyx đomc dlayc seetb taih ayx caox gao tôn phunz pănh hođ, max phunz pănh naih nyâuđ oix ayx huđ nyăngz dlayc năngđ nănh stiz nâyx.” ⁷ Max cuyb paix miuc hanyh năngđ nănh stiz naih đomc munh ayx nâyx, năngđ Canyx-Stâub ja lănv coong nâyx, “Nănh stiz stâyv nzac nhlync hopb, “Nyoongz quef tyuh longc yâuc tih stanv.” ⁸ Pănh năngx gâyf ayx pongx lauh năngđ nănh stiz ah phanx munh ayx nâyx, cungb ah noib gungh, naih nhlic săpc stamz tynb lanh munh zuc tayc wâyc woax đomc Stoif.” ⁹ Pănh yâuc năngx gâyf stâyv Njâuv-Zâu, năngđ naih ah đomc munh nănh Stiz ayx songđ zuc nangz tăpc tayc.” ¹⁰ Yâuc năngx gâyf Yônx Zâu năngđ ah phanx munh yônx nâyx, tauv Zâuv zuc Stynz-munh tayx tayc.” ¹¹ Nâyx đomc dlayc seetb taih nongc ayx njih houđ tôn pănh, Yâuc tuz ja lănv phunz pănh yămz nâyx nzêuh Gungh-đi, yâuc yămz stătx môtc zapz noib nyăngz munh.” ¹² Laiv lanh nyâyh coong yaz hayh stâuđ tuz wăn, six zuc buôngh stymz, năngđ cayb max đanyf hayh glinyf.” ¹³ Nyâuh yâuf pez pongh zuc muif hungđ stâyv nyâuđ nyăngz dlayc, bamh munh muif lanh six lôx lauf hayh zuc pongh, Six coouv tuz wăn nyăngz Tênb-Hungh. Nănh max phunz nyâuh yâuf pez zuc stâyv blătc nyâuh nyăngz jab đêh, zuc stâyv woax zanyf, Nănh six coib jau phunz nyâuh yâuf pez hayh naih jab tanyđ tuz hingh.” Pyeenv goib max cuyb paix miuc hanyh ¹⁴ Yaz stăngz nyăngz yâuf pez lex, six zuc pyeenv goib max tuz paix miuc hanyh.” ¹⁵ Yaz cloon nyâuh yâuf pez naih Tongb-manyh nyăngz munh coong, “Nyâuh cănh zuc nyâyh mangc jađ yaz coong nâyx đomc woac.” ¹⁶ Pănh wâyc woax nomz hâuđ Zâu nyăngz zan, max zâyf pănh naih phănc cloon Njâuv-Zâu nyăngz samđ mah? Pănh tinyh đoih watz nzu nhlync, max zâyf pănh naih phănc songc cloon Njâuv-Zâu nyăngz stynb nzof mah?” ¹⁷ Wâyc zuc cungb naih ah nomz nzu, max cun hănđ naih munh đungx, Six pănh pênx ah nomz stynb, wâyc zuc pănh songc nhlync woax nomz nzu.” ¹⁸ Y-sa-la-ên munh lex! nyâyh mangc geh! Nhlync congx phunz gongc homb woax đomc munh, Nănh stiz songđ naih phănc cloon gongc hoomb max zâyf mah?” ¹⁹ Yaz coong nâyx âyz gâyf six coong laix? Congx phunz miuc hanyh nyăngz muif hungđ naih âyz gâyf săngh nongc max?” ²⁰ Six yaz lănv coong, “Đâuf congx phunz miuc hanyh nyăngz stanyb lanyh six congx phunz manđ, Max Zâyf congx phunz Tênb-Hungh nyăngz stanyb lanyh, Yaz max oix nongc nyâuh yâuf pez cloon manđ naih phănc.” ²¹ Nyâuh yâuf pez max hayh hopb Zâu nyăngz zan, yâuc hopb manđ nyăngz Zan, nyâuh yâuc max hayh songc nhlync Zâu nyăngz hynh, yâuc songc nhlync manđ nyăngz hynh.” ²² Pănh yâuf pez oix nhlec phunz Zâu siv nhleenx max? Pănh nyăngz jab năngx yongb têx Zâu mah?” Pănh oix zuc ayx muif phungđ phunz munh pâyz Tênb-Hungh ²³ Pănh tuz dluyh stymz ayx muif hungđ, Six max zâyf muif hungđ naih săngh nongc, Pănh naih gâyf ayx tuz muif hungđ, Six max zâyf muif hungđ hayh stăngc tuz pitc lanh.” ²⁴ Max zâyf cungb tâuh cănh tuz gongx, six zuc ayx phunz pitc lanh cungh ngwoaic munh tuz gongx.” ²⁵ Naih laiv hungđ A maic yămz woa caiz sangc six tinyh phanv maif nhlync, Stymz nyâuđ max nongc thăngx măkx naic jađ nzađ nhlync max nzađ.” ²⁶ Nyâuh yâuf pez naih gâyf nhlync muif hungđ, “Wâyc zuc yămz woa Nib mync nyăngz muif hungđ six săngh Zâu Tênb-Hungh nyăngz nzuf.” ²⁷ Six coong năngđ naih ah lanh max zeen Zâu nyăngz munh taih banh nyâuh yâuf pez ninyh cloon nănh stiz nhlync năngv, Bix nyâuh yâuf pez yâuc nhlimc nzeetx ninyh, Nănh stiz bênc laiv hungđ taih six tinyh phanv nhlync, max cuyb naic lungđ.” ²⁸ Six coong năngđ naih laiv lanh bux nyâuh yâuf pez coong, ‘Nâyx đomc six congx phunz miuc hanyh nzof gôh, Bix năngx gâyf nhlync, wâyc stăngc bux phunz nyâuh yâuf pez woax lanh munh, Max zâuđ yămz nyâuđ cumh nzav nănh coong longđ.” ²⁹ Nây yaz max zâyf coong nyâuh yâuf pez six yaz coong pitc tauh. Wâyc max phunz pitc lanh taih coong pănh ayx saih. ³⁰ Six coong yaz năngđ đoouc coouv Zâu bix nhlync nâyx đomc muif hungđ, ha săngh laix munh yâuc hayh yônx yaz coouv Zâu nhlync nâyx đomc muif hungđ six longđ? ³¹ Max cun nyâuh yâuf pez nhlync mah six hopb, mah six ayx laiv hungđ, six zuc ayx phunz Zâu naih manyh yangh Gwăngz-eng. ³² Năngx gâyf ayx laiv hungđ phunz Yiu-thai munh mah six max zâyf Yiu-thai munh Tênb-Hungh nyăngz huyđ-đăngb munh hayh pamf Stoif. ³³ Six zuc ayx năngđ yaz nâyx phunz songx munh numđ nyađ, max zâyf ayx tâuh cănh tuz gongx, yaz ayx laiv hungđ, six wâyc ayx phunz nănh stiz tuz Njâuv. Munh nzif pongz pyây