¹ Ma, prumeru aliansa tinha si regra pa kultu i pa santuariu ki sta na tera. ² Pamó un tabernakulu fazedu, ku prumeru parti, undi ta fika kondelabru, mesa ku pon konsagradu, e ta txomadu di Santu Kou. ³ I pa tras di sugundu kurtina, tinha un otu sala, ki ta txomadu di Santu di Santus, ⁴ ki tinha un altar di oru pa insensu i arka dia liansa, kubertu tudu pa oru. Dentu del tinha un jaru ku mana nel, vara di Aron ki nasi flor nel i tabuas di aliansa. ⁵ Riba di arka, kirubins di gloria ta kubri prupisiatoriu. Di kes kuzas li, un ka podi papia, gosi li, ku ditalhi. ⁶ Dipos di kes kuzas li sta prontu, saserdoti di tenpu en tenpu ta entraba na sala antis di tabernakulu, ku obijetivu di fazi kultu. ⁷ Ma, na sigundu sala ô sumu saserdoti ki ta entra, un bes pa anu, i ka podi falta sangi, pa oferesi pa el i pa pekadu di falta di kunhesimentu di povu. ⁸ Spritu Santu kreba mostra ki kaminhu di Santismu Lugar ka podeba ser mostradu, si ind ten prumeru tabernakulu. ⁹ Keli e ixemplu pa kel mumentu li, kes dosm oferta ku sakrifisiu ki sta oferesedu gosi, ka ten kapasidadi pa midjora konsiensia di ken ki ta oferesi-l; ¹⁰ es e regras pa karni, ligadu a kumida, bebida i munti lavaji serimonial, ti ki nobu regra bn pa fika na si lugar. ¹¹ Ma Kristu ben moda Sumu Saserdoti di rikezas ki sta ben, pa meiu di kel mas grandi i perfetu tabernakulu, ki ka foi fetu pa mó di ômis, ô seja, ka kdes mundu kriadu li, ¹² nen pa meiu di sanji di kabritu ku bixeru, ma pa sangi di Kristu, ki entra na Santu di Santus, dun bés pa senpri, i e kunsigi-nu iternu salvason. ¹³ Pamodi, si sangi di kabritus i toru i sinza di bixeru spadjadu riba di kenha k sta inpuru ta sapara-l pa Deus, ta torna ses korpu puru, ¹⁴ inda mas sangi di Kristu, ki , pa Spritu iternu, integra ael me sen manxa pa Déus ta linpa nos konsensia di obras moru pa nu sirbi Déus bibu! ¹⁵ Pa kel motivu li, El e Mediador di nobu aliansa pa meiu di se morti, pa tra pekadu di kes ki sta baxu di primeru aliansa, pa ki kes ki txomadupodi rasebi eransa iternu. ¹⁶ Pamodi, na undi nu teni testamentu, nu mesti prova morti ki kenha ki faze-l; ¹⁷ Pamodi testamentu so e validu pa morti, ka ten validadi si kenha ki faze-l inda sta bibu. ¹⁸ Purisu, nen prumeru aliansa foi fetu sen sangi. ¹⁹ Pamodi kantu Moizez da tudu mandamentu lei pa kes gentis, e pega sangi di bixerus i di kabritus, ku agu, la burmedju i isopu, i e spadjal riba di propi livru i riba tudu gentis, ²⁰ e fla: "Keli e sangi di aliansa, ki Déus ordena nhos". ²¹ DI mesmu manera, e spadja sanji na tabernakulu i tudu vasilha ki ta usadu na kultu saserdotal. ²² I, di akordu ku Lei, kuazi tudu kuza e purifikadu ku sangi; i, si sangi ka diramadu , ka ten perduason di pekadu. ²³ Mesteba, purisu, ki imaji di kuzas ki sa na seu ser purifikadu ku sakrifisiu di kes animal; ma, kuzas selestial, pa el me, ten ki ser purifikadu ku sakrifisiu mutu midjor. ²⁴ Pamó Kristu ka entra na santuariu ki fazedu pa mô di ômi, ki e kopia verdaderu; ma sin, na propi seu, undi gosi ta konparesi na prizensa di Déus pa nos. ²⁵ E ka entra la pa oferesi Se kabésa txeu bes, sima sumu saserdoti ta fazi, ki ta entra na Santu di Santus, anu en anu, ku otu sangi. ²⁶ Si ka era si, e tinha ki sufri txeu bes desdi ki mundu kriadu. Mas gosi, so un bes, o ki tenpu finda, e ki El ta ser mostradu pa tra pekadu pa meiu di se propi sakrifisiu. ²⁷ Asi sima tudu argen ten ki mori un bes, i dipos ta ben julgamentu, ²⁸ Kristu tanbe, kel ki oferesedu un bes so pa tra pekadu di munti, ta parsi otu bes, sen pekadu, pa salvason di kes ki pa El sta spera.