¹ Mas inportanti ki nu sta fla é ki nu ten un Sumu Saserdóti, ki xinta na direita di tronu di Majestadi na séu; ² El é servu di Santu Lugar i verdaderu tabernakulu, ki Sinhor konstrui, i nou omi. ³ Tudu sumu saserdóti é skodjedu pa oferesi oferta i sakrifisiu. Pa es mutivu é nisisariu ke tinha algun kuza pa oferesi. ⁴ Si Kristu staba na téra, E ka ta serba saserdóti, pamodi izisti saserdóti ki ta oferesi oferta di akordu ku Lei. ⁵ Kel sirvisu kes ta fazi é kopia i sonbra di kuzas selestial sima Moizes avizadu pa Deus kantu e staba ta konstruiba tabernakulu: "Odja si bu ta fazi tudu sima modelu ki bu mostradu na monti". ⁶ Má, gósi, Kristu resebi un ministériu supirior, pamodi El é Mediador di un aliansa midjor, ki foi stabilisidu riba promesas midjor. ⁷ Pamodi, si prumeru aliansa ka tinha difetu ka era nisisariu buskaba un sigundu. ⁸ Pamodi kantu Deus riprendi se povu, É fla: "Dias ta ben", Sinhor fla, "N ta fazi novu aliansa ku kaza di Izrael i ku kaza di Judá ⁹ É ka ta ser sima aliansa ki N fazi ku sés antipsadus, na kes dia kin pegas na mó, pan gia-s pa fora di téra di Egitu. Pamodi es ka permanesi na nha aliansa, i N ka ta da-s mas atenson", Sinhor ki fla. ¹⁰ "Pamodi es aliansa ki N ta ben fazi ku kaza di Izrael dipôs di kes dias. Sinhor ki fla. "N ta koloka nha Lei na ses menti i tanbé N ta skrebi na ses kurason. N ta ser ses Déus i es nha povu. ¹¹ Ningen ka mesti inxina sé vizinhu i nen sé irmon, ta fla: 'Konxi Sinhor'; pamodi tudu ta ben konxe-n di pikinoti ti mas grandi. ¹² Pamodi, N ta mostra mizerikórdia pa ku sés atus di injustisa i N ka ta ben lenbra mas di ses pekadu". ¹³ Na ta fla "novu," E torna kel primeru aliansa ultrapasadu, kel ki sta ultrapasadu sta prontu pa disaparesi.