¹ Paulu, un apóstulu - ka un apostulu di párti di ómi, nen di ninhun ómi, ma pa Jizus Kristu i Déus Pai, ki risusita-L di mórtu, ² i tudu irmons ki sta ku mi na igreja di Galásia: ³ Grasa i paz, di parti di Déus Pai i di nos Sinhor Jizus Kristu, ⁴ ki intrega pa nos pekádu pa liberta-nu des ténpu maliginu, di akórdu ku vontadi di nos Deus i Pai. ⁵ Pa el tudu glória, pa tudu ténpu. Amén. ⁶ N sta spantadu ku nhos ki sta ta muda ton faxi pa un ivanjéliu diferenti, ki sa ta afasta nhos di kenha ki txoma nhos pa grasa di Kristu. ⁷ Ka ten otu ivanjéliu, má, ten uns géntis ki sa ta ranja kunfuson i es kre distorsi ivanjéliu di Kristu. ⁸ Má, sikré nós, ô un anju di séu ben i proklama nhos un ivanjéliu diferenti di kel ki nu proklamaba nhos, ki es ser amaldisuadu. ⁹ Sima nu flaba antis, gosi nta torna fla nhos: "si algén proklama un ivanjéliu diferenti di kel ki nhos aseitaba, ta ser amaldisuadu". ¹⁰ Nhos ta atxa gósi ma n kre aprovason di ómi ô di Deus? Ô n sta prokura agrada ómi? Si n sta tenta inda agrada ómi, ami n ka é sérvu di Kristu. ¹¹ Nhas irmons, n ta dizeja pa nhos sábe, ki invanjéliu ki n proklama entri nhos é ka di orijen umanu. ¹² N ka resebe-l di ómi, i nen ningen ka inxina-m, má, invés di kela, Jizus Kristu revela-l pa mi. ¹³ Nhos obi ta fladu di mó ki n ta viveba antis na judaismu, moki n ta pirsigiba ku tudu violensia igreja di Deus, pa n kababa ku el. ¹⁴ N krese na judaismu mas ki munti judeu di nha idadi, ami era mas rigurozu na tradison di nhas antipasadus di ki es. ¹⁵ Ma, kantu ki Deus skodje-m desdi bariga di nha mai, E txoma-m pa sê grasa ¹⁶ pa revela Se Fidju na mi, pa anunsia-L pa tudu kes algén ki ka konxe Deus. N ka konsulta nem kárni nen sángi; ¹⁷ nen n ka subi pa Jiruzalen pa kes ki era apóstulus antis di mi, invés di kel-la, n bai pa Arábia i n volta pa Damasku. ¹⁸ Nton, dipos di trés anu n subi pa Jiruzalen pa vizita Séfas i n fika ku el kinzi dia. ¹⁹ N ka odja ninhun di kes otus apóstulus, anonser Tiágu, irmon di Sinhor. ²⁰ Na kel ki nta skrebi nhos, n ta garanti nhos, dianti di Déus, ki n ka sa ta konta mintira. ^{21 24} Dipós, n bai pa zona di Síria i di Silísia. ²² Inda es ka konxeba mi pesualmenti na igrejas di Judeia ki staba na Kristu, ²³ ma só es obi ki kél ki antis ta pirsigiba igreja gosi sa ta proklama fé ki antis e ta prokuraba distruiba. I es glorifika Déus pamodi mi.