¹ Kaya nga mga minamahal na anak, maging katulad kayo sa Diyos. ² Lumakad kayo sa pag-ibig gaya ng pagmamahal ni Cristo sa atin. Ibinigay niya ang kaniyang sarili bilang handog, isang mabangong alay para sa Diyos. ³ Kaya bilang mga namumuhay ng banal, hindi tayo dapat mamuhay sa kalaswaan, sa lahat ng karumihan, at masamang pagnanasa. ⁴ Hindi rin tayo dapat nagsasalita ng kalaswaan, mga walang kabuluhang pag-uusap, o mga pagbibirong nakakasakit sa iba. Sa halip magpasalamat kayo. ⁵ Nakakatiyak tayong hindi nila mamanahin ang kaharian ni Cristo at ng Diyos kung sila'y nakikiapid, may maruming pamumuhay, pagnanasa sa pagmamay-ari ng iba, o sumasamba sa diyus-diyosan. ⁶ Huwag kayong magpadaya sa mga walang kabuluhang pag-uusap dahil ibubuhos ng Diyos ang galit niya sa mga taong sumusuway sa kanya. ⁷ Kaya huwag kayong makibahagi sa kanila. ⁸ Kung kayo noo'y namumuhay sa kadiliman, kayo ngayo'y namumuhay sa kaliwanagan bilang mga anak ng liwanag. ⁹ At ang pamumuhay sa liwanag ay nagbubunga ng lahat ng kabutihan, katuwiran, at katotohanan. ¹⁰ Pinapatunayan ng mga ito kung anong kalugud-lugod sa Panginoon. ¹¹ Huwag kayong makibahagi sa paggawa ng mga masamang gawain kundi ibunyag mo ang ginagawa nila. ¹² Nakakahiyang pag-usapan ang kanilang ginagawa nang palihim. ¹³ Ngunit naipapahayg ang lahat ng ginagawang bagay kung ito'y dinadala sa liwanag dahil ang lahat ay nakikita sa liwanag. ¹⁴ Sapagkat nasusulat, "Gumising kayong mga natutulog at bumangon mula sa mga patay upang magliwanag si Cristo sa inyo. ¹⁵ Kaya't mag-ingat kayo kung paano kayo lumakad. ¹⁶ Samantalahin ninyo ang panahon dahil masasama ang mga araw na ito. ¹⁷ Huwag kayong maging hangal kundi, unawain ninyo kung anong kalooban ng Panginoon. ¹⁸ At huwag magpakalasing sa alak dahil maaring magdulot ito ng masama. Sa halip, mapuspos kayo sa Banal na Espiritu. ¹⁹ Umawit kayo sa isa't isa ng mga salmo at mga himno at mga espiritual na awitin. ²⁰ Magpasalamat kayo lagi sa Diyos Ama sa lahat ng bagay sa pangalan ng ating Panginoong Jesu-Cristo. ²¹ Magpasakop kayo sa isa't isa patunay ng paggalang niyo kay Cristo. ²² Mga asawang babae, magpasakop kayo sa inyong mga asawang lalaki, gaya sa Panginoon. ²³ Sapagkat ang asawang lalaki ang ulo ng babae, tulad ni Cristo na siyang ulo ng Iglesiya. Siya ang tagapagligtas ng katawan. ²⁴ Ngunit kung paanong nagpapasakop ang Iglesiya kay Cristo, gayon din magpapasakop ang asawang babae sa kanilang mga asawang lalaki sa lahat ng bagay. ²⁵ Mga asawang lalaki ibigin ninyo ang inyong mga asawang babae tulad ng pagmamahal ni Cristo sa iglesiya at kung paanong ibinigay ni Cristo ang kaniyang sarili sa kaniya. ²⁶ Ginawa niya ito upang gawin niya siyang banal. Nilinisa niya ang iglesiya sa pamamagitan ng paghugas ng tubig at sa salita, ²⁷ upang maiharap siya bilang isang maluwalhating iglesiya na walang bahid ng dungis o karumihan, kundi manatiling banal at walang pagkakamali. ²⁸ Gayundin, dapat mahalin ng mga asawang lalaki ang asawa nilang babae gaya ng kanilang sarili nilang katawan. Ang nagmamahal sa kaniyang sariling asawa ay nagmamahal din sa kaniyang sarili. ²⁹ Walang tao ang nagagalit sa sariling niyang katawan. Sa halip, inaalagaan niya ito at minamahal katulad ng pagmamahal ni Cristo sa iglesiya. ³⁰ Sapagkat tayo ay mga bahagi ng kaniyang katawan. ³¹ Dahil dito, iiwan ng lalaki ang kaniyang ama at ina at makikiisa sa kaniyang asawang babae at ang dalawa ay magiging isang laman." ³² Ang misteryong ito ay dakila ngunit patungkol ito kay Cristo at sa kaniyang iglesiya. ³³ Gayunman, kailangang mahalin ng bawat isa sa inyo ang kaniyang sariling asawa tulad ng sa kaniyang sarili, at dapat igalang ng asawang babae ang kaniyang asawang lalaki.