¹ Paulo ak Timoteo, otwogikab Kristo Jeiso, kisirjini tugul che tililen che bo Jehovah eng Kristo Jeiso che mito Pilipi koboto ribikab kaniset ak kiboitinik. ² Kisae kele, ingotebi mieindo kobotok ak kalyet che bunu Jehovah Kwandannyo ak Kiptaiyat Jeiso Kristo. ³ Awekchini Jehovah nennyu kongoi eng kabwatenyu tugul ne abwatok, ⁴ eng sommenyu age tugul agobo akwee tugul , asome eng sautikchu eng boiboiyet kotugul, ⁵ amu yamdaeng'wong eng logoiywek che tililen kong'ete betut ne bo tai agoi betuni. ⁶ Angen komie ng'olyondonito, ale inendet ne kitoi boisiet ne kararan eng akwee koyaei kosulda agoi betutab Jeiso kristo. ⁷ Kararan eng ane abwat ko u nito agobo akwee tugul, amu omi muguleldannyu. Amu eng ratatennyu, ak eng ripset ak kagimetab logoiywek che tililen, ko akwee tugul k oii yamdoik koboto eng mieindo. ⁸ Amu Jehovah baoriandennyu, ko u ole ating'enok akwee tugul emosto eng rirenosiekab Kristo Jeiso. ⁹ Ak ni ko saennyu: ale kotesak chamnyeng'wong missing eng naet ak kaguiyet tugul. ¹⁰ Si kobiit onai komie tuguk che bo kayanet koboto atebto ne mie, si kobiit oegu che matinye kenisiet, che matinye kanagut agoi betutab kristo. ¹¹ Saennyu kotugul oeku che nyitotin logoekab imanda, che bunu Jeiso Kristo, agoi torornatet ak kolosunetab Jehovah. ¹² Ago amache che kitupche, onai ole tuguk che kibwonjo, ko kigotoret logoiwek che tililen koba tai. ¹³ Kot kotook ratennyu agobo Kristo eng askarik tugul che bo kaplaitoriat, ak eng biko alak tugul kole aamdaii logoiywek che tililen chebo Kristo Jeiso. ¹⁴ Ak tinyei che chang eng che kitupche eng Kiptaiyat nyiganatet ne o mising komwaita ng'olyotab Jehovah ama eng kaiyweisiet, amu tinyei kamang'unet agobo ratennyu. ¹⁵ Amdoi alak Kristo eng ng'etgonda , ak suriet koamdoi alak agiche eng kabwatutik che kororon. ¹⁶ Amdoi chu alak eng chamnyet kongen kole kigindeno arib logoiywek che tililen. ¹⁷ Ago chun alak koamdoi Kristo amu magutikwai, ma eng mugulelwek che leelachen, kolen teswo nyalilda eng ratatennyu. ¹⁸ Nee anyun? Kobate kityo eng oret age tugul---ngo eng kenisiet anan ngo eng imanit---Keamdoi Kristo, ak abaibai eng noto. Eeh, ako ta abaibaitu, ¹⁹ Amu angen ale walaksei nito koegu katiagennyu kobun sautikwok ak toretet ne konu Tamirmirietab Jeiso Kristo. ²⁰ Ko u eng kaganyisiennyu ne aganyi mising ak kamang'unennyu ale magigona alillan, ago eng nyiganet tugul, ko u kotugul, ko u noto agine nguno kitorori Kristo eng bortannyu, ngo eng sobondo, anan eng meet. ²¹ Amu eng ane ngasobe ko kristo, ak ngameei ko borotet. ²² Ago ngasobe eng borto, ko choto logoekab boisiennyu. Ago alewen nee anyun? ²³ Amu mangen. Kagigiikcho kwenutab tuguk aeng, atinnye maget awo ketebi ak Kristo, amu kararan noto mising kosiir, ²⁴ ago ngatebi eng borto ko magat mising agobo akwee. ²⁵ Ak atinye kamang'unoni , ak angen ale atebche, ee ak ko ta atebche kobotok akwee tugul, agobo tesengwong bo tai ak boiboiyet eng kayanet, ²⁶ si kobiit kotesak kalosunengwong eng Kristo Jeiso eng ane ngaitu ak ketuiye kogeny. ²⁷ Ago ingoek atebeng'wong ne nyoljini logoiywek che tililen chebo Kristo, si ngot anyo ageerok anan ko ma nyoo, agas agobo atebengwong, kele otonondosi komie eng tamirmiriet agenge, eng kabwatet agenge ogilige tugul kibagenge agobo kayanetab logoiywek che tililen. ²⁸ Amat komuok bunik eng kiy age tugul. Noto ko kaborunet ne toogunot ne bo luseng'wai, ago ne bo saruneng'wong---ago bunu nito Jehovah. ²⁹ Amu kigogonok buch agobo Kristo ma oyan inendet kityo, ago onyalilye agobo inendet kora, ³⁰ otinye lugonoto kiogeere eng ane, ak ogase nguno kele mi eng ane.