¹ Va kumbulusa kulyiviika kunsi lya vahitizi ne vo mulao, ku va kuteka, ku lyivakanyeza musevezi wushiyeeme, ² ni va seena iva tuka, ne kusa hwerera kulwa, ni valyi santite, ku toondeza vuuntu ku wumwi ne wumwi. ³ Mukuti naaswe zimwi innako kana tu veena maano ne kusa zuwa. Nitu ziyezwa ne kuhikaaniswa minati ihitiriza. Tu valyi kuhalyira mu vuvilala ni tu chita kuti vantu va tutoye naaswe tuva toye. ⁴ Mmi kushiyama kwe Ireeza Muhazi weetu ne rato lya vaanti china lya voneka, ⁵ kaheena che miteendo ishiyeeme ituvachiti, kono nche insee zakwe kwetu, cho kushanzwa ko kuzalwa chihya ne che kuvusuluswa cho Luhuho Lujolola. ⁶ uulo Ireeza ava tulwitiri chovuuingi cho Muhazi wetu Jeeso Kirisiti, ⁷ kokuti hakuti chitwa jolozwa che mikoonde, to woolye kuva valyavuswa veena isepo yo vuhalo vusamani. ⁸ Aa manzwi a sepahala. Ni saka kuti muzwiire havusu cheezi ziintu, ko kuti vana va vazumini kwe Ireeza va woolye kuvona kuti vachita miteendo milotu. Iizi ziintu zishiyeeme mane zisakahala ku wumwi ne wumwi. ⁹ Mmi mukauhane ne inkaani ne mang'ang'a ezoluzuvo ne inkaani ze inkoondo ne kusazuwaana che mulawo. Izi ziintu kazi vozekeza mane kazina ituso. ¹⁰ Uu kaane wumwi ne wumwi yo mikauhanya, mumasulye o kukalyimera kamwiina kapa ko vere, ¹¹ kwiziva kuti wuuzu muuntu cha vazwi muvulotu mmi cho chita vuvilala mmi ulyi nyansa mwiine ¹² Chiina nini tumine Artemasi kapa Tichikasi kwaako, no hweere wize kwaangu kwa Nikopolisi, kuni lyikaerere kwikala malyiha woonse. ¹³ Wu chite chimwi ne chimwi cho woola ku vatumina Zenasi we loya ne Apolosi, kuti kaanzi va vulyi chimwi. ¹⁴ Vaantu veetu valyitute kuteenda misevezi milotu ilyeeta cho vuhweeru zisakahala, kuti va siye kusava ne musula. ¹⁵ Voonse veena naame va kurumeresa. U rumeresa va tusuni mwi tumero. Chisheme chive naanwe muvoonse.