¹ Lyinu uuwe, waambe ziyenderenzana ne taero ye nniti. ² Uu rute vakwame va kulwana kulyi woonda, kulyi vavalyera, ku va ne maano, ne vusakusima mwi itumero, kulisuna, ne nkulonde. ³ Che inzira iswana, urute vakulwakazi vakulwaana vave ne muhupulo wushiyeeme, vasiye kusooha ne kukolwa ahulu iwayini, mmi vave varuta zishiyeeme, ⁴ ne kuruta vakulwakazi va siri vahwire ku suna va mwihyavwaavo ne kusuna vaana vaavo, ⁵ vave ne maano, ku jolola, va tokomera mazuvu aavo, ne ku kuteka va mwihyavwavo, kuti lyiinzi lye Ireeza lyisiye kuwaambwa vuvilala. ⁶ Che inzira iswana mukumbulusa valombwaana ku va ne maano ashiyeme. ⁷ Inaako zoonse wulyi woonde neenza che inzira ishiyeeme kuva mutala kuvamwi. Mukuruta kwaako, utoondeza chiriti, vuuntu, ⁸ ne mulayezo wo vusakusima wusena kanyanso, kuti wumwi ne wumwi yo ku kananisa a fwe insoni mukuti kakwiina chivilala cheti cho vawamba cheetu. ⁹ Vahyikaana va kuteke vanfumwaavo muchimwi ne chimwi, kuva saangisa ne kusa va kananisa, ¹⁰ kusa ve viira, kono va toondeza itumero ishiyeeme, kuti munzira zoonse va lyeete ku teembwa kwe ituto kaha Ireeza Muhazi weetu. ¹¹ Mukuti mikoonde ye Ireeza iveziri kuhaza vaantu voonse. ¹² Chituruta ku kaana vuvilala ne kunungwa ze inkaanda, ne kuliwoonda, kuzima sinte, ne kuhala che inzira ishiyeeme mwezinu inako, ¹³ chitusilyindire kutambula mikoonde yitusepiswa, kuvona kuverenga ko vukaando vwe Ireeza ne Muhazi Jeeso Kirisi. ¹⁴ Jeeso a va lyineri chevaka lyeetu kuti a woolye kutu hulula muvu vilala vweetu kuti a lyijolweeza vaantu vaakwe vasepahala vasuni kuchita misevezi milotu ¹⁵ Waambe cheezi ziintu, ushoshorekeza vaantu va zichite, ne ku kalyima che ziho zoonse. Kaanzi kuvi ne yo kunyansa.