¹ Kakusasana ahulu hakati kee nsuunda, niveeza kwiikumbu, kulyeetu zinunka vulotu zivava vaakeenya. ² Ni vawana iivwe lyizyeendi kumbalyi lye kuumbu. ³ Ni veenira, mmi kana vava waani muviri wa Simwiine Jeeso. ⁴ Ni kwaachitahala kuti, chiva sikomoketwa, cho vuhweeru, vakwaame vovere ni vaziima havalyi muzizavalo ziverenga. ⁵ Vakulwakazi ni vaa chachalyika cho kusungamina haansi, ni vaacho vakulwakazi kuti, ''Chiinzi hamusaka vahala kuva fwiire? ⁶ Ka heena hanu, mmi wa vuuswa! Muzeze mwaa valyi ku milwiira havasiina naanwe chosiina mwa Galilia, ⁷ naacho kuti Mwaana wo Muuntu kaheewa mu maanza a vaantu va vilala kuti avambulwa, mmi mwiizuva lyo vutatu cho kuvuuka.'' ⁸ Vakulwakazi ni vaazeza maanzwi aakwe ⁹ cho kuzwa kwiikuumbu ni va kalwiira iizo ziintu kuveena iikumi no wiimwiina ne vaantu voonse. ¹⁰ Lyinu Maria Magadelina, Joanna, Maria inyina Jakobo, ne vamwi vakulwakazi haamwiina chooka kalwiira va apositola iizo ziintu. ¹¹ Mmi mulaezo ni wawanika siina iinsumo ku vaapositola, mmi kana vavazumini vakulwakazi, ¹² Pitorosi chokuziima na ng'ombwera kwiikuumbu, mmi, naa ziima choku zuunza mukati, chokuvona vulyo majira a daansi haansi, Pitorosi naa voola kumuzi, na komoketwa chaachitahala. ¹³ Muvone, vaavo vovere vavalyi kuya kumuzi wusuumpwa Emmausi, avalyi makumi a mana iiyaanza ne kumi lyiimwiina lya mamaili kuya kwa Jerusalema. ¹⁴ Va valyi kuya vukandeka cheezo ziintu ziva chitahalyi. ¹⁵ Ni kwa chitahala kuti, chivaya vukandeka ne kulyi vuuza ipuzo, Jeeso iiye mwiine naava chutira nayeenda naavo. ¹⁶ Mmi meenso aavo ni eyalyika ku mulyemuha. ¹⁷ Jeeso navacho kuti, ''Ziizi zimuya vukandeka wuunwe muvovere?'' Vavaa ziimi ni vazuwiire vutuku. ¹⁸ Wumwi waavo, yosuumpwa Kliopasi, naamwiitava, ''Njowe wooweena mwa Jerusalema ya seezi ziintu ziva chitahalyi mwaanu mazuva.'' ¹⁹ Jeeso na vacho kuti, '' ²⁰ Ziintu zihi? vapirisita vakaando ne vahitizi mu vava mumuhi ku atwiirwa lufu ne kumu kokotera ha chifapaano. ²¹ Mmi tuvasepete kuti njeye yeeti na hululye Isiraere. Eeni, lyinu kushere nzi, iizuva lyo vutatu suunu zoonse iizi ni zichiteheere. ²² Mmi naaho, vamwi vakulwakazi veetu va tukomosa, chiveena kwiikumbu kakusasana. ²³ Chinga vaka vula muviri waakwe, chooka voola, nivaa chokuti vakavona mang'iloi naavacho kuti wuuhala. ²⁴ Vamwi vakwaame va veena naaswe chokuya kwiikumbu, niva kawaana momona muvaavacho vakulwakazi. Mmi kana vava muvoni.'' ²⁵ Jeeso na vacho kuti, ''Mawee vaantu vaholo mulyiyeha vulye kuku zuminina zivzwaambwa ne vaporofita! ²⁶ Kana ku vaswaneere kuti akirisiti a sukuluke mweezi ziintu, ne kwiinjira muku veera kwaake?'' ²⁷ Kuzwa kwa Mushe kuya ku vaporofita, Jeeso a va vataluseza zoonse zo mu mang'olo zi muama. ²⁸ Chi chiva chuutira kumuzi wuvavalyi kuya kuulyi, Jeeso cho kuchita iiri wuvahita kuvusu. ²⁹ Mmi ni vamukuumbira, ni vaati, ''Wi kalye naaswe, mukuti cheeri chitengu mmi iizuva chliimina.'' Jeeso ne njira ne kala naavo. ³⁰ Ni kwa chitahala kuti, chinge kala haansi kulya naavo, na hiinda vuroto, na rapera, na vugamoona, naa vuvaha. ³¹ Lyinu meenso aavo cho kwiiwuka, ni va mulyemuha, cho kuzwa mumeenso aavo. ³² Ni valyicho kuti, ''A inkulo zeetu seke kazi hiisa mukati keetu, chowaamba naaswe naatu taluseza za mang'olo?'' ³³ Mpohonaaho cho kukatuka ni vaavola kwa Jerusalema. Ni va waana veena iikumi no wumwiina ne va veena naavo, ³⁴ nivaati, ''Simwiine chavuuka toota, walyishupa kwa Simoni.'' ³⁵ Ni vawaamba ziintu ziva chitahalyi muunzira, ne Jeeso mwavalyi toondeza kuvalyi cho gamoona vuroto. ³⁶ Chivasi waamba iizi ziintu, Jeeso iiye mwiine cho kuziima mukati kaavo, naava cho kuti, ''Chishemo chive naanwe.'' ³⁷ Mmi vava tirimuki ne kwiizula lyoowa cho kuzeeza kuti va vona iisaku. ³⁸ Jeeso na vacho kuti, ''Chiinzi ha mutiite? Chiinzi mihupulo yiina vulyo hainjira munkulo zeenu? ³⁹ Muvone maanzaangu ne mateende aangu, njeeme nimwiine. Muni woonde muvone. Mukuti iisaku kalyiina inyaama ne zifwaha, moona mu muni vyeene kuti niina.'' ⁴⁰ Chinga mana kuwaamba, naa va toondeza maanza aakwe ne mateende. ⁴¹ Kana vavalyi kuzumina cheevaka lyo kusaanga, mane vava komoketwa. Jeeso na vachokuti, ''Mwiina chilyiiwa? ⁴² Ni vamuha chibalyi cheenswi yijichitwa, ⁴³ na yihiinda naalya havusu vwaavo. ⁴⁴ Na vacho kuti, ''Kamaanzwi a Ni vawaambi chinisiina naanwe, kuti chimwi ne chimwi chiva ng'olyetwa mu mulawo wa Mushe ne Vapoofita ne Lisamu a lukeere kwiizuzirikizwa.'' ⁴⁵ Mmi navewula italuhanyo, kuti vazuwiseza mang'olo. ⁴⁶ Na vacho kuti, ''Muku ng'olyetwa, kuti Kirisiti wulukeere kusukuluka ne kuvuuka muvafu hape mwiizuva lyo vuutatu. ⁴⁷ Kusikuluha ne kuwoonderwa kwe zivi kulukeere ku kutazwa mwiizina lyaakwe ku chisi choonse, kutaanga mwa Jerusalema. ⁴⁸ Muvashupi veezi ziintu. ⁴⁹ Muvone, Ni mitumina chava sepisa Taayo. Mmi mwiikalye mwi toropo mbwiita hamuwuumbwa ziho zizwa kwiwulu.'' ⁵⁰ Jeeso na vahitira mane mbiita kafuhi ne Bethani. Na nyemuna maanza naava tohonolofaza. ⁵¹ Ni kwaati, choosiva tohonolofa, naavasiya ne kunyemwiinwa kwiiwulu. ⁵² Cho kumufukamina ni vaavolyera kwa Jerusalema ni sangite ahulu. ⁵³ Vaaveena vulyo mwi tempere, ni vateemba Ireeza.