¹ Mwiize lyinu, uunwe mu vahumi, mulyire mane muvokololye mukuti masukuluka a mizirire. ² Vuhumi vweenu chi vuva volyi, mane zaparo zeenu chi zivalyiiwa munanzi. ³ Yi gauda ne isulufera chizivashinyehi mane kuwuuta kwaazo ka kuve vushupi kweenu. Ka kulye inyama yeenu siina mulyiro. Muva lyiviikiri vuhumi munnako za mamanimani. ⁴ Muvone, malyi a muvalyiviikire a vavereki va valyi kusiinza luwa lweenu a lyira havusu vweenu. Chilyiro chi vasiinza chi vaasiki mu matwi a Simwiine wo vuungi. ⁵ Mu vahalyi vuhalo vo kulyikola zo muunkaanda ni mwalyi naankanya ne minati. Mu vanunisa iinkulo zeenu maneri iizuva lyo kwihayiwa. ⁶ Muva nyaansa ne kwihaya vaantu va shiyeeme. Ka mikanani. ⁷ Lyinu, muve iinkulonde, vakweetu, mbwiita hakuti Simwiine cho sika. Muvone mulyimi mwa lyindira zilyo zilotu zizwa mwiivu mane wiina iinkulo iinde chaazo, mbwiita hazi tambula iinvula ya mashewulo ne ya ma manimani. ⁸ Wuunwe, naanwe, muve ne iinkulo iinde. Mukoza iinkulo zeenu mukuni kwiiza kwa Simwiine chikwiina hafwihi. ⁹ Vakweetu, musiye kulyi virerera, muveene, kuti kaanzi ni munyaanswa. Muvone, muwatulyi wuziimene ha mulyaango. ¹⁰ Muhiinde mutala, vakweetu, mu kusukuluka ne iinkulo iinde ya vaporofita, vana vavalyi kuwaamba che iizina lya Simwiine. ¹¹ Muvone, veena mikoonde vana vava lyineeri mu milyiko. Muvazuwi iinkulyo iinde ya Jobo, mwiizi maikaerero a Simwiine, mweena kuzuwira vutuku ne iinse. ¹² Ku zoonse, va kweetu, musiye ku koonka, nangati chewulu kapa che iinkaanda, kapa kukoonka cho mukoonkero wuhi ne wuhi. Kono, ''Eeni'' yenu ave ''Eeni'' ''Nee'' wenu ave ''Nee,'' kuti musiye kuwiira mwi katulo. ¹³ Mukati keenu aa kwiina yo sukulukite? A rapere. Kwiina yo sangite? A ziimbe iinzimbo. ¹⁴ Wuumwi kweenu wulwalyite? A suumpe vakulwaana ve kereke, va muraperer. Va mudonsekeza ioyili ha mutwi che zina lya Simwiine. ¹⁵ Itapero ye itumero yihoza muuntu yo lwaala, mane Simwiine wu muvusa. Chikuti ava chiti chivi, Ireeza wu muwoondera. ¹⁶ Lyinu lyiwaambe zivi zeenu ne kulyi woondera mane mulyi raperere kuti muhozwa. Iitapero yo muuntu yo shiyeeme yiina ziho ha ichitwa neenza. ¹⁷ Elija avari muuntu sina soswe. A va raperi ahulu kuti yisiye kusoka, mmi kana yi vasoki munkaanda zirimo zotatwe ne myeezi yimana yiyaanza ne munwe wumwiina. Elija cho kurapera hape. ¹⁸ Yi wuulu cho kusosa iinvula, mane iinkaand ni yazwiisa zilyo. ¹⁹ Va kweetu, chikuti wuumwi weenu wuzwa mu vusakusima, mmi wuumwi cho ku muvooza munzira, ²⁰ wuuzo muuntu eezive kuti wumwi ne wumwi yo ziwulula mulewuhi mu nzira zaakwe zisashiyeeme wu muhaza mulufu mane wuwuungula zivi zaakwe ziingi.