¹ Kulwa ne kusazuminzana kuzwahi mukati keenu? Kazizwi mu mihupulo yeenu yo kulwa mukati ka varumeri kunineenu? ² Musuni, mmi ka mukweete. Mwihaya ne muna, mmi ka muwaani. Mulwa ne kulyi kananisa. Ka kwiina chimukweete mukuti ka mukuumbiiri. ³ Mukumbira mmi kamuwaani mukuti ka mukuumbiri neenza, mukuti mu teendesa kuya chokusuna kweenu. ⁴ Wuunwe mahuulye, kamwiizi kuti kusuna ze inkaanda kulwiisa Ireeza? Mukuti wumwi no wumwi yo lyichita chilyikani ne inkaanda chira che Ireeza. ⁵ Kapa muzeza kuti liinzwi lyi wamba vulyo, ''Luhuho lwa vaa viiki kweetu lwiina ifufa''? ⁶ Mmi Ireeza wuha mikoonde miingi, lyiinzwi licho kuti, ''Ireeza wu kananisa vasi mwiipo, mmi wuha mikoonde ku va shiyeeme.'' ⁷ Lyinu mulyiviike kwe Ireeza. Mukaane satani, mmi kazwe kweenu. ⁸ Mwiize hafwihi ne Ireeza, mmi keeze hafwihi naanwe. Mushaanza maanza eenu, wuune valeuhi, mane mujoloza inkulo zeenu, muvaantu ve inkulo zo vere. ⁹ Muzunguvalyirwa, mulyire, mane muvokololye! Chiseko cheenu chisanduke chilyiro mane kusaanga ive maswavi. ¹⁰ Mulyiviike kuunsi lya Simwiine, mmi ka minyemune. ¹¹ Musiye ku waamba vuvilala cha vamwi, vaakweetu. Muuntu yo waamba vuvilala cha mwaakwe kapa ku nyaansa mwaakwe wu waamba vuvilala cho mulao ne ku nyaansa mulawo. Chikuti wu nyansa mulawo, kahena wu muchiti wo mulawo, kono wu munyansi. ¹² Wumwiina vulyo yo ha mulawo ne kuwatula. Njeyena yo haza ne kusinya. Njoweni, wuuwe yo nyansa mwaako? ¹³ Lyinu teeke, wuuwe yooti, '' Sunu nandi iizona katyeende ku mulyeneng'i, tukumana chirimo kwatei, ni tuwuza, ne kuvulyerwa kuungi.'' ¹⁴ Wiizi kuti iizona kakuve vulye, vuhalo kavuve vulye? Mukuti wukavuundu kavoneka iinakozana mmi cho ku vulyika. ¹⁵ Lyinuaaho, mulukeere kucho kuti, ''Ireeza ha saka, ka tuyeende tuka chite iichi ne iichina.'' ¹⁶ Lyinu hanu mulyi teemba cha maikaerero eenu a shashiyeeme. Kulyiteemba koose wuuko chivi. ¹⁷ Lyinu wuumwi ne wuumwi yi wiizi kuchita vulotu mmi nasa vuchiti, kwaalyi chivi.