¹ Mi ive ichi: mu mazuva a ma manimani ka kuvi ne zivaka zi kukutu. ² Mukuti vantu ka ve izulye kulyi suna kahavuhavo, vasuni malyi, ni ve izwiire kulyiteemba,kulyinyemuna,vatukana, ni vasa zuwi vuzaazi, ni va seena vuitumero, ne va sa jololyi. ³ Ka va vulye chisemo ku marapa avo, ni va sa woolyi ku hala che ikozo ni vamwi, veihayi, ni vasa woolyi kulyiwonda, ni valyi va kalyi, ni va sa suni vulotu. ⁴ Ka vave vantu ve wooza, nva chita zintu ni vasa naheene, ni va nahana ha veena vutuka ku vamwi vantu, ni va suni monati kunze lye ku suna Ireza. ⁵ Ka vave ne chiswano che vuireza, mi ka va lyi sampulye ziho zakwe. Sandumukere ava vantu. ⁶ Mukuti vamwi vaavo vantu ve injira mu marapani cho ku shonga ahulu vakulwakazi va seena maano. ⁷ Ava vakulwakazi ve izwire zivi zi vasa woolyi ku zimika ku zi chita ne ku yereza ku chita chivi che inzira zi siyeene siyeene. Ava vakulwakazi va valyiriri mi nanta ni va siika ha kwi iziva vusakusima. ⁸ Che inzira iswana Jenisi ne Jamburasi mu va kananisa Mushe, ava varuti vapama naavo mu va kananisa vusakusima. Vantu ve ingana zi sa jolweere, mane kuya che itumero vava shupi kuti itumero yavo ka hena yo vusakusima. ⁹ Mi keeti ni lyatiri halye. Mukuti vuhafu vwaavo ka vu vonwa ne umwi ne umwi, siina vulyo mu ku vavi kwa Jenisi ne Jamburasi. ¹⁰ Mi haili uwe, u va teekese nenza ku ruta kwangu, kulyiwonda, ivaka lyo vuhalo, itumero, manyando,chisemo, inkulo nde, ¹¹ kunyandiswa, masukuluka, ne chi va ni chitahalyiri kwa Antiyoka, kwa Ikhoniyamu, ne kwa Lisitara.Ni va zimanini kunyandiswa. Mwawo onse, Simwine a va ni haza. ¹² Vonse va sa ku hala mwi inzira ye Ireza mwa Kirisiti Jeso ka va nyandiswa. ¹³ Vantu va vilaala ne va salyi njovo ka va zwe mu vuvi kuya mu ku vihala, ni va hambusa vamwi naavo kaha vuhavo mu inzira. ¹⁴ Mi haili uwe, shalye mu zintu zo valyi tuti ne kuzi zumina. Wiizi yo va lyi tuti kwaalyi. ¹⁵ Wiize kuti kuzwa mu vuniini vwaako wi zivite mingolo i jolola. Iyi mingolo i woola kuku talyifiseza kuku vulukwa che itumero mwa Kirisiti Jeso. ¹⁶ Mungolo onse u va huzirwa ne Ireza. U shiyameere ituto, ku tondeka milaandu, ku vakanya, ne ku tapiswa mu kushiyama. ¹⁷ Kwiina vulyo ku chitira kuti murumeri a lyi tukuseza ku maninine ku chita misevezi milotu umwi ne umwi.