¹ Lyinu uwe, mwanangu, kolye mwi inse yiina mwa Kirisiti Jeso. ² Zintu zo u va zuwi kwaangu mukati kko vushupi vungi, zihe vantu va sepehala veti ni va woolye ku zi ruta vamwi naavo. ³ Nyandire mukaavo naame siina isolye lya Kirisiti Jeso. ⁴ Ka kwiina isolye lyi woola ku tendera ni lyi si lyiyitwa ne indava zo vonu vuhalo, vulyo kuti a woolye ku sangisa mukulwana kwaalyi. ⁵ Naako, haiva imwi na zambisana niiri mungombolyi, ka zavikwa mbwita ha zambisana kuya che milawo. ⁶ Kwinamusula kuti mulyimi yo tenda ahulu a tambulye imbalyi yakwe ye zivwaalo intanzi. ⁷ Nahana chini wamba kahacho, mukuti Simwine ka kuhe kuzuwiseza mu chimwi ne chimwi. ⁸ Kumbulukwa Jeso Kirisiti, kuzwa kwi imbuto ya Daafita, ya va vuuswa mu vafu. Ichi kuya che mulayeza wa manzwi angu, ⁹ u ni kweete ku nyandira mu ni woola ku wondwa che maketani siina muntu yo wiina mulandu. Mi lyinzwi lye Ireeza ka lyi wondetwa. ¹⁰ Lyinu ni lyi kozekeza zintu zonse kwavo va salyitwa, vulyo kuti naavo va woolye ku tambula kuhazwa kwa Kirisiti Jeso, ne iwulu. ¹¹ Uku kuwamba kusepahala: '' Haiva tu va fwi naye, ka tu halye naye. ¹² Haiva ne tu kola, ka tu vusa naaye. Haiva ne tu mu sampula, naye ka tu lyi sampule. ¹³ Haiva ne tu sa sepahalyi, u shala na sepahala,mukuti ka woolyi ku lyi sampula.'' ¹⁴ Zwirire ha ku va kumbulusa izi zintu. Va tiiza havusu vwe Ireza kaha kulwa che manzwi; ka kwina musula, kunze lyo kwi ihaya avo va teekete. ¹⁵ Chite monse mo woolyere kuti u lyi wonde nenza kwe Ireza sina muntu yo zuminwa, muvereki ya seena ivaka lyo ku swava, yo ruta lyinzwi nenza lyo vusakusima. ¹⁶ Chirisa menso ako muwambiro o seena mu wina, u twaala mu ku vulaireza kungi. ¹⁷ Muwambiro waavo u hasana siina ikensa. Mukati kaavo nje Hemniyasi ne Filitasi, ¹⁸ va humbukite mu vusakusima. Va wamba kuti kuvuka kwa vafu cho ku va chitahalyi, mi volyo va ihaya itumero ya vamwi. ¹⁹ Nehakuvavolyo, mutero u kolyete we Ireza u ziimene. wiina uwu mungolo: '' Simwiine wiizi avo vaakwe'' mane '' Vonse va sumpa izina lya Simwiine u lukeere ku siya vuvilaala.'' ²⁰ Mu irapa lya vahumi ka kwina zigwetere ze ihawuda vulyo ne Silifeera. Kwiina ne zigwetere ze chisamu ne iringo. Zimwi zaazo njize ku tendo u kuteketwa, mi zimwi kusa kutekwa. ²¹ Hiava umwi na lyi joloza mu ku tendeswa kusakutekwa, chigwetere chi kuteketwa. U alyirwa he imbalyi, wiina musula kwa mfumwe, mane u lyi tukuseza musevizi umwi ne umwi u shiyeme. ²² Tiye ikerezo ze vuwiire. Shalye mu masulye kushiyama, itumero, chisemo, ne ikozo naavo va sumpa kwe Ireza kuzwa kwi inkulu i jolola. ²³ Mi kana mapuzo a seena maano ne zi seena muzina. Wiizi kuti zi zaala inkani. ²⁴ Muhikaana wa Simwiine ka lukeere kulwa. Kunzelyovulyo, u lukeere kuva muhuvirira ku vonse, na woola ku ruta, ne inkulo inde. ²⁵ U lukeere ku ruta che inkulo inhuvirira avo va mu kananisa. Ireza mwendi u woola ku vaha kulyinyansa ko kwi iziva vusakusima. ²⁶ Mwendi va woola ku vola ni va vukuluka mi cho ku shutuka mu kaswa ka Satani, ha mana ku va ziyezekeza ku chita ku suna kwaakwe.