¹ Lyinu ze innako ne zirimo, vaakweetu, ka kusakahalyi kuti muzi ng'olyerwa. ² Mukuti wuunwe mwiizi siinte kuti iizuva lya Simwiine lyikeeza siina musa kumasiku. ³ Ha vacho kuti, ''Iikozo ne kuvavaleseha,'' kono kusinywa cho kuvawiira cho vuhweeru. Kakuve siina zitavi zo kuhuzumuka zo mukulwakazi yo lyihindite. Kakwiina mweeti ni vahalwiire. ⁴ Mmi,wuunwe, vakweetu, kamwiina mukerima kuti iizuva lyimu lyimiwiire sina musa. ⁵ Mukuti muvoonse muvana ve iseri ne musihalyi. Kaheena tuvana va masiku kapa keerima. ⁶ Lyooho, tusiye kulala muvachita vamwi. Kono, tulyindire ne ku lyiwoonda. ⁷ Mukuti valala vachita vulyo masiku, navana vakolwa vachita vulyo masiku. ⁸ Mmi mukuti to vo musihalyi, tulukera kulyiwoonda ne kuva ne itumero ne irato nichiri chisirerezo cheetu chaha chizuva, isepiso yo kuhazwa ive ihuusi yeetu. ⁹ Mukuti Ireeza kana ava tusumpiri kusinywa, kono ku tambula kuhazwa cha Simwiine Jeesu Kirisiti, ¹⁰ ya va tufwiiri kuti, chituhala kapa tufwiire, kuhalye naye. ¹¹ Lyinuhanu mulyi koza inkulo ne kulyizaka, sina mu mukweete muchita. ¹² Tu mikumbira, vakweetu, kwizivisa va muteenda naavo ne vamiyeenza mwa Simwiine ne va milawula, ne vamiziwulula, ¹³ ne kuvakuteka ahulu che irato chevaka lye musevezi waavo. Mu zuwaane mukatikeenu. ¹⁴ Tu mukutaza, vakweetu: Mukalyimere va kata, mukoza va lyitovohete, mutusa va kaangitwa, muve ne inkuloonde kuvaantu voonse. ¹⁵ Muvone kuti kaanzi kuvi ne yo vozekeza muuntu vuvi cho vuvi. Kono, mususuweza chiyeeme kweenu ne kuvamwi. ¹⁶ Musaange innako zoonse. ¹⁷ Murapere ni musahuzi. ¹⁸ Mulyitumere muchimwi ne chimwi. Mukuti njo kusuna kwe Ireeza cha Kirisiti Jeeso. ¹⁹ Musiye kuviinda Luhuho. ²⁰ Musiye kufwiisa iinsoni chiporofita. ²¹ Mulyike ziintu zoonse. Muwoondesa zi shiyeeme. ²² Muzwe kuziintu zoonse zivi. ²³ Ireeza wina chisemo a mijoloza koonse. Luhuho lweenu loonse, inkulo, ne muviri zivavalyerwa ni ziseena kunyaanswa ha kwiiza kwa Simwiine Jeeso Kirisiti. ²⁴ Iiye ya va misuumpi wu sepahala, njeye yeti na chite. ²⁵ Vakweetu, naaswe mutu raperere. ²⁶ Murumeresa vakweetu voonse cho kulyi koota kushiyeeme. ²⁷ Ni mikumbiira cha Simwiine kuti iilyi ing'olo lyika valyirwa vanakweetu voonse. ²⁸ Mikoonde ya Simwiine Jeeso Kirisiti ive naanwe.