¹ Mamanimani, vaakweetu, tulyikuwera kwenu ne kumisusuweza kwa Simwiine Jeeso. Moona mu muvatambulyi iitayero kweetu mu muswaneere ku halyira, ne ku sangisa Ireeza, ne mweyi inzira, kuti muwoolye kuchita kuzamba. ² Mukuti mwiizi yitayero zituvamihi cha Simwiine Jeeso. ³ Mukuti iichi kusuna kwe Ireeza, ku jolozwa kweenu, kuti mulyivavalyere ku vuhuulye, ⁴ kuti wumwi ne wumwi weenu eezive kutokomera chibya chakwe mu kujolola ne ikute, ⁵ ising'i mukunuungwa zivilala (siina Veenkaanda vasezi Ireeza). ⁶ Kaanzi kuvi muuntu yo fosekeza mwaakwe chowuu mukwa. Mukuti Simwiine ulyikanisa muziintu zoonse, moona mutuva milwiiri ne vupaki. ⁷ Mukuti Ireeza kana a va tusumpiri mikwamivilala, kono kujolola. ⁸ Lyinu, iiye yo kana iichi kaakani vaantu, mmi Ireeza, yo miha Luhuho lwaakwe Lujolola. ⁹ Kaze irato lyi vasikweetu, ka kusakahalyi kuti wumwi a ming'olyere, mukuti wuunwe muveene murutwa ne Ireeza kulyisuna. ¹⁰ Mane muchita vulyo ne ku vaakweenu veena mwa Makedonia. Mmi tu mikutaza, vakweetu, muchite vulyo mane ne kuzaamba. ¹¹ Mane tumikutaza kuti mulyike kuhala ni mutontweere, mutokomere zeenu, ne kulyiteendera cha maanza eenu, moona mu tuvamilyiiri, ¹² kuti muwoolye kuhala siinte kwavana veena kuunze ni museena chimuvula. ¹³ Kutusuni kuti musiye kwiziva, vakweetu, chava valala, kuti musiye kulyira siina vamwi, vaseena isepo. ¹⁴ Mukuti chikuti tuzumina kuti Jeeso a vafwi na vuuka hape, Chikwiina vulyo Ireeza kalyeete Jeeso navana vava lalyilyi kwaalyi. ¹⁵ Tumicho vulyo che lyiinzwi lya Simwiine, kuti wuuswe tuhala, to vashaalyilyi kwiiza kwa Simwiine, keeti ni tuhitire vana vava laalyi. ¹⁶ Mukuti Simwiine iye mwiine ka suuke kuzwa kwiwuulu. Keeze cho mulyumo, we lyiinzwi lyo mukulwaana wa mang'iloi, che intorombita ye Ireeza, mmi vava fwiiri kwa Kirisite kava vuuke intaanzi. ¹⁷ Lyinu wuuswe tuhala, tusheere, katu hindirwa hamwiina mumakope naavo kuka kopanyeza Simwiine muluhuho. ¹⁸ Chikwiinavulyo, mulyikoza inkulo chaa maanzwi.