¹ Vakuetu eni vonja yongola vanjeku vuila malungila, natjolela yange natjilongo tjange, imaneni nanthili muli muene vakuetu votja yongola. ² Njimamuna Yondia, keho njimamuna sintike vakalena mbunge imo lika muli muene. ³ Tjili njikukandelela ove lalo, mukuetu ua tjili uakumukambo , kuatha cvakentu ava muomu vapangele hamo nange kumuthimbu uatjili hamo naKelemente lalo, hamo navakuetu veka vakuvipanga mathina avoni ali mumu kanda ua muono. ⁴ Kaleni na nzolela muli muene thimbu yoshe Keho lalo njihandeka nguange kaleni na nzolela. ⁵ Ngothi yeni isoloke ku vantu voshe muene ali muhiehi hiehi. ⁶ Navimo viahi mumina vimbunge vunoni muvioshe mukulomba na ku kandelela hamo nakushangala, tumbuleni vithango vieni kuli Kalunga. ⁷ Keho tjiyulo tja Kalunga tjiye tjatuvakana mana oshe, tjikanyunga vimbunge vieni navithinga nieka vieni muli Jesu Kilistu. ⁸ Mukumanethela vakuetu nkala viuma via vutjili, nkala viuma viayela, nkala viuma via viuka nkala viuma vili na luthimo lua tjili, nga kuli vumo vuhuanga, keho nga kuli etji tjakushanga thinganiekeni evi. ⁹ Viuma ovio vimua lilongethele, vimuata mbuilile vimuovuile vimua muene muli ange ovio vene vilingeni . Keho Kalunga uatjiyulo akakala neni. ¹⁰ Vunoni nji viukilila na vuana navua muli muene mualolo muku manethela muna tungumuka na ku ndjithinga nieka. Eni tjili mua ndjithinga niekele vene, vunoni komua muene muvulovelelo. ¹¹ Keti ngo honi ndjina handeka vimo vindjina jeneka, muomu nja lilongetha muoshe mu nja fua mukemuo kujolela. ¹² Ndja thivuka kukala kuvundende, keho njathivuka kusumpoko. mutjuma nkala na mu viuma vioshe ndjina lilongetha mangana aje akuikuta na kukala na ndjala, kusumpoko na ku jeneka. ¹³ Ndjihatha vioshe muli ouje ueku ndjikoletha. ¹⁴ Vunoni mualingile vuino mo mua likutile na nge kutu yando tuange. ¹⁵ Neni vavena lalo munathivuka eni vaka Filipu, hakutameka muthimbu uatjili ua Kalunga muye mu ndjatundile mu Mathendonia mbunga naimo yahi yali kuatele nange kutji lika tjakuhana nakutambula vuana vunoni yeni lika. ¹⁶ Muomu nambe Kutesalonika vene eni mua tumine lumo naluvali viye vindja jenekele. ¹⁷ Keti ngo honi ndjithetela vuana vunoni ndjithetela mihako ya yingi kulonda jeni. ¹⁸ Vunoni viuma vioshe ndjili navio ndji sumpoko vene ndjina shulu mondja tambula kuli Epafolonditu viuma vije via tundile ku lieni, vikevio vueko vua kulembuluka tjikombelo tjaku vuaha tjamu ya kumbunge Kalunga. ¹⁹ Keho Kalunga kange aka mihana vioshe vi muka jeneka ngohoni kuvufuko vueni muvumpahu muli Kilistu Jesu. ²⁰ Vunoni kuli Kalunga ketu ikeye tatetu kukale vumpahu kumiaka yoshe ya yaye. Ame. ²¹ Hinduitha voshe vaka ku jela muli Kilistu Jesu. Vakuetu vali nange vana mikunduho. ²² Voshe vakaku jela vana mihinduitha nava kanjivo ya Sezale na vuo vene. ²³ Kavumbi ka muene Jesu Kilistu kakale navi thithimba vieni.