¹ Ngotjo vene nga tjili ku mamuna muli Kilistu tjimo tja tjilemo nga kuli kuata tjimo tja Spilitu nga nkeke na ngothi. ² Shulitheni ndjolela yange , ngotjo pueni vaka mbunge imo lika. Kaleni na tjilemo tjimo lika litavathane ni kumo nambunge imo lika. ³ Navimo viahi mukalinga via kuli tepetha ndi ngo honi mu lipamba eni vavena. Vunoni muku konkama umo ayongole mukuavo mukakutu vakana endi vavena. ⁴ Keti muli hakele yeni vavena tjinka, vunoni hakeleni vakueni tjinka. ⁵ Kaleni na mbunge ngo honi Kilistu Jesu uakele na uo lalo. ⁶ Ikeye muakele na muvila ngo honi Kalunga. Kayonguele ku pua mumona Kalunga kali thininikile vapue kumona Kalunga. ⁷ Vunoni ua likehethele vavena, ua tambuile muvila ua vundungo vamupangele na tjifua tja vantu. ⁸ Keho muakele na tjifua tjamuntu ualihakele kuvundende, uononokele kukutha. tjili vene kutha tja tjilindakano. ⁹ Ngotjo vene Kalunga ua muhakele kuvukama vuakutuvakana navua. Uamuhanene lithina lije lia kutuvakana mathina oshe. ¹⁰ Ngotjo mulithina lia Jesu mavuli oshe aka thikama, ovio vili muilu nevi vili hathi. navije vili muithi lia mavu. ¹¹ Keho malimi oshe aka litava nga tjiye Jesu Kilistu ikeye muene. mukulingitha vumpahu vua Kalunga ishe. ¹² Ngotjo vene vaka tjilemo tjange, ngohoni muomu nonoka ku liange, Keti mo tjilikolika vunoni mualolo muna tu va kana nambe ndji uahi pangeni kukuovoka kueni naliova na ku ngangama. ¹³ Muomu Kalunga ikeye mu ka kupanga mulieni tjithango natjipanga. mutjakushu vimbunge vieni. ¹⁴ Lingeni vioshe na kuli nienieta kuahi nambe vimpata viahi. ¹⁵ Linga mupue vaka ku yeneka hakupayela, na ku vihitha kuahi vana vaKalunga vaka kuyela tjipenga ha kati katjikota tja kuhenga na kuviha. Ha kati kavo vamimone ngohoni vieke viahano hathi. ¹⁶ Muku vaminikila lijui lia muono ngotjo ndjika kala nenvi vindji kalipamba navio kuli tangua lia Kilistu. Konja shatukile ngotjo nambe kupanga mavokovoko. ¹⁷ Tjili vene nambe va tjikombeleya ku tjikombelo na tjipanga tjakuthelela tjeni, tjiku yolela tjiku viukilila hamo neni voshe. ¹⁸ Keho nga tjiye vene yoleleni eni lalo viuklileni hamo nange. ¹⁹ Vunoni ndji kutalela muli muene Jesu kutuma Timoteo kulieni mualolo vene, linga ange tjimone kulilembetheka tjika thivuka kukala tjeni. ²⁰ Muomu kanjethi na muntu ueka uambunge imo nange, aleme mbunge tjili mukukala nendi. ²¹ Muomu voshe vathetela viavo kati evia Jesu Kilistu. ²² Vunoni eni muna thivuka vatinafu, ikeye ngohoni munove uekupangela ishe. Nga tjiyevene ikeye napanga nange mukushuene tha kulutue thimpande thiyetha tjili. ²³ Ngotjo vene ikeye itjina yongola kutuma mu mualolololo. omo nja kumone vati njikua kulinga. ²⁴ Vunoni njathelela muli muene nga tjiye ange vavena lalo njina hete kuthimbu ya indende. ²⁵ Vunoni njina thinganieka nguange muatjili mondjina tumu mukuetu Epafolonditu muanetu na mukuetu kuvipanga ikeye muanetu lisualale. Ikeye mukua manda ueni namuka kunjipangela vije vindjina jeneka. ²⁶ Endi nami vuluka navua muva voshe, keho uomine mbunge muomu uovuile nga nji je ikeye ua vavalele. ²⁷ Muomu tjili vene ua vavalele nuhiehi nakutha. Vunoni Kalunga ua muvuile ko ngothi, kati ikeye lika vunoni nange lalo kuteua ndjivandkane vuthiua kuvuthiua. ²⁸ Ngotjo vene njina mutumu vuathi muaku mumona lalo mukua ku viukilila. Keho vuthiua vua nge vuna tepuluka. ²⁹ Ngotjo vene mutambuleni muli muene na tjolela yoshe. Keho lemetheni va nga tjije. ³⁰ Muomu vipanga via Kilistu andende athe. Uakovelethele muono uendi muku tjihana-hana vije vinja jenekele ku vipanga vieni kuliange.