¹ Thingi thagho hashimbire yirughana yokutura pofotji mayendithitho ghoyinu eyi yaroghera kuyikumithamo mukatji ketu, ² Thikadighawa tapire kukwetu kutundera kowa hatangere hashupi no harughani gho nando. ³ Yamonekire ghuwa kukwange name, yoyishi nakengurure yoyihe thiwana kutundera kumatangero, mukutjanga makurando ghoye, thikumenena ghuwa Theophilius, ⁴ podiyo mwakudimuke nunderero dhoyinu eyi hamuhonga. ⁵ myaka dhoghufumu waHerod muJudea, pakarire mupristeri Zechariah ghopadiko dyaAbijah; mukadidhiko dyendi Elizabeth ye ne kerekandongo waAaron. ⁶ waheya hakarire ha hungami kughutho waNyambi, mu kukutha miragho nomahimeno ghaFumu. ⁷ mbadi ha konine kuwana mwana yoyishi Elizabeth ne mbadi wa kureta, awo ruvedhe ruya ne hana kurupara. ⁸ Zechariah gheyire kughutho waNyambi no gha rughane yirughana yendi yoghupristeri kukutha edi ha mu torora. ⁹ Kukutha muthitjo thomatorwero ghoghupristeri noyirughana yendi, Lot gha mu torore gha ngene mutembeli dhaFumu gha ka tape muyambo. ¹⁰ Hanu ha rapererire panunda ruvedhe ruya romuyambo. ¹¹ Kapupi kamanana muEngeli waFumu gha monekire kwendi kurudyo rothinyaku thomuyambo ghu. ¹² Zechariah gha hakamanine nowoma weyire mumwendi apa gha monine muEngeli yu. ¹³ Ene muEngeli gha mu tongwere eshi, "Mbadi ghu yape, Zechariah, yoyishi ndapero dhoye ne dhina pu kutambura. Mukadidhiko dyoye Elizabeth ne mbo ghana reta mwana ghokatughuru. Mbo ghu mu te John. ¹⁴ Mbo ghuna kara noyishamberera no hanu mbo hana shamberera pamushamurukero wendi. ¹⁵ Aye mbo ghana kara muhungami kughutho waFumu. Nokamanana temba mbo gha nwe vinyu endi marovu, aye karo mbo ghana pu kuyaritha naMupepo Ghokupongoka oku ye shime mudira. ¹⁶ Thingi thohakerekandongo waIsrael mbo hana huka kwaFumu Nyambi wawo. ¹⁷ Aye mbo ghana karera po Fumu pamupepo nomungcamu dhaElijah, mu kupirura mitjima dhawakuru kwawanuke no kupirura hathiko hakare hanyanyami mughuhungami-- mu kuroghithera Fumu hanu wendi." ¹⁸ Zechariah kokuhutha kwendi eshi, "Ngepi sho ni dimuke eshi mbo yina hokoka? ame ne na kurupara, mukadidhiko dyange naye kemo." ¹⁹ MuEngeli ko kuhutha eshi, "Yame Gabriel, nemana kughutho waNyambi. Na pu kutuma ni rete mbudhi dhi dhodhiwa kukoye. ²⁰ Keho we ne mbo ghuna kara thipurupuru, mbadi sho kone kughamba kare yinu yi mbo yi hokoke. Yoyishi ghuna mbadi ghuna tawa yi na kutongwera, agha mbo gha pwa kukumithamo paruvedhe rokughogheyapo." ²¹ Hanu wa hakarire panunda ha tatererire Zechariah. Hanu wa ha hakaminine yoyishi gha dhiyamine thikuma mutembeli. ²² Apa gha shwayire mbadigha ghambire nawo. Hanu ha dimukire eshi ghana ka mona thirota mutembeli. Gha rughanithire yidimukitho mbadi gha konine kughamba nawo. ²³ Apa gha pwire mayuwa ghendi ghoyighana, gha yendire kudighumbo dyendi. ²⁴ Munyima dhomayuwa gha, mukadidhiko dyendi Elizabeth gha kariere nodira, ghure tughonda kwoko mbadi gha monekire kwawanu. Gha ghambire eshi ²⁵ "eyi ne yo ghana ni rughanena Fumu muneke dhendi yoyishi ghana shana kunidimukitha kwawanu." ²⁶ Mukaghonda koghukwoko nokofotji, Nyambi gha tumine muengeli Gabriel mudoropa dhomuGalilee dhodina Nazareth, ²⁷ kwa mbuyamba ghodjaho yu ghapwa kwandekera kwa katughuru gho dina Joseph, gho kerekandongo waDavid, dina dyo mbuyama yu ne Mary. ²⁸ MuEngeli gheyire kwendi no gha ghambire eshi "Ghurumere, ghuna wana neke kwaNyambi, Fumu noye ghadi." ²⁹ ene aye gha hakamanine no mbadi gha tjwathanine eshi dirumeritho munye dyo kemo. ³⁰ MuEngeli gha mu tongwere eshi "mbadi ghu yape, Mary, ghuna wana neke kwaNyambi. ³¹ Mbo ghuna kara no dira no mbo ghuna wana mwana ghokatughuru. Mbo ghu mu te 'Jesus.' ³² Mbo ghana kara muhungani no mbo hana mwitha eshi mwana Shokuru. Fumu Nyambi mbo ghana mu pa thipuna thoghufumu thakerekandongo wendi David. ³³ Mbo ghana raghura diko dyaJacob kuroreya, ghufumu wendi ne wapira mahurero." ³⁴ Mary ko kuhutha kwendi eshi "Ngepi keho mbo yi hokoka, ame ne mbadi na kara rumweya na katughuru?" ³⁵ MuEngeli naye gha huthire eshi "Mupepo ghokupongoka mbo gha neya papoye, ngcamu dhaShokuru nadho mbo dhi neya poye. Apa mbo gha pwa kushamuruka mwanuke yu ghokupongoka mbo hana mwitha eshi Mwana Nyambi. ³⁶ Thiro thoye Elizabeth naye ghadi no dira dyomwana ghokatughuru mughukurupe wendi. Aye ne ghadi notughonda kwoko-fotji, aye ne gha karire mbadi wa kureta. ³⁷ Yoyishi kwaNyambi ne mbadiko tho kupira kuhokoka." ³⁸ Maria kokuhutha kwendi eshi "Nomupika Nyambi me. Yi hokoke thika di ghuna yi ghamba." munyima muEngeli po gha muthiyire. ³⁹ Munyima, Mary po gha yendire kumarundu muditunga diya, mudoropa dhomu Judea. ⁴⁰ Ghengenine mudighumbo dyaZachariah gha ka rumerithepo Elizabeth. ⁴¹ Paruvedhe rofotji, apa Elizabeth gha yuvire dirumeritho dyaMary, mwanuke ghomudira dyendi gha reghire, Mupepo Ghokupongoka gheyira mwaElizabeth. ⁴² Elizabeth gha kuyererire eshi "ghufumane pakatji kawakathi, gha fumane yu ghadi mudira dyoye. ⁴³ Pamurandu munye yina hokoreka eshi nyina Fumu wange ne gha neya kwange? ⁴⁴ Yoyishi apa na yuvu dirumeritho dyoye ne, mwanuke ghomudira dyange ne ghana reghi no ghana shamberera. ⁴⁵ Gha fumane mbuyama yu gha tawa mayarithero gho yinu yi ha mu tongwere yo kutunda kwaFumu." ⁴⁶ Mary kokuhutha eshi "Mudhimu wange ghuna kukugha Fumu, ⁴⁷ no ghuna shamberera mwaNyambi Mukomononi wange. ⁴⁸ Yoyishi aye gha monine kunyanda kwamupikendi ghombuyamba. Kutunda pano, hanu waheya mbo hana nitha eshi na fumana. ⁴⁹ Yoyishi mukangcamu dhodhiheya gha ni rughanena yinu yoyikuru, dina dyendi dya pongoka. ⁵⁰ Neke dhendi kuyerana kwaheya ho kutenda mahimeno ghendi. ⁵¹ Gha neghedha ghutanavu no dyoko dyendi; gha mana kuhanya hakakukuyeyura muyighayara yomumitjima dhawo. ⁵² Gha shwayitha hafumughana payipuna yawo no kuturapo hakakunyanda. ⁵³ Gha pa hakakunyanda yinu yoyingi ene hatungine kuwathiya haka yende nyara-nyara. ⁵⁴ Gha ghamwena Israel mupikendi, no kufera neke ⁵⁵ (thikadi gha tongwerire hakerekandongo wetu) Abraham no hanendi waheya kare kuroruheya." ⁵⁶ Mary gha karire tughonda tuhatu naElizabeth kughutho gho kuhuka kudighumbo dyendi. ⁵⁷ Ruvedhe rwaElizabeth rokureta rwakuminepo, gha retire mwanuke ghokatughuru. ⁵⁸ Hakamukunda nohapendi ha mu shambererithireko apa ha yuvire eshi Fumu gha ferere neke. ⁵⁹ Mudiyuwa dyokwoko no dyoghuhatu, ha retire mwanuke yu kumakeneno. Ha shanine kumuta 'Zachariah' dina dyawihe, ⁶⁰ ene nyina gha ghambire eshi "Tuna kumuta John." ⁶¹ Ha muhuthere eshi "Mbadiko mwapoye gho dina di." ⁶² Ha rughanithire yidimukitho hepure wihe eshi ngo dina munye ghana shana ha mu te. ⁶³ Ghepurire ko diwe dyokutjangera no gha tjangire po eshi "Dina dyendi ne John." Waheya ha tetukire kuthihokoka thi. ⁶⁴ Paruvedhe roro rofotji kanwa kendi ka yandhurukire no rudimi rwendi rwa pwire kushutura. Gha ghambire no kukugha Nyambi. ⁶⁵ Hakamukunda wawo ha yapire. Yihokoka yi ya kuhanyene muditunga dyodiyeha dyaJudea. ⁶⁶ Waheya wa ha yuvire yihokoka yi ha vungutire mumitjima dhawo eshi "Mwanuke yu ne dye mbo gha kara?" yoyishi dyoko dyaFumu dya karire nendi. ⁶⁷ Wihe Zachariah wa mu yarire Mupepo Ghokupongoka no gha pumbire eshi ⁶⁸ "Gha fumane Fumu, Nyambi waIsrael, yoyishi gha neya mukutughamwena no ghana kumithamo makomweneno ghohanu wendi. ⁶⁹ Ghana reta nyiha dhomakomweneno ghetu mudiko dyamupikendi David ⁷⁰ (thikadi gha ghambire kupitera mwa porofeta wendi hokupongoka hokarekare), ⁷¹ makomweneno kwawakanore dhenu nawaheya wa ha tu nyenga. ⁷² Mbo ghana rughana thikadyo mu kuneghedha hatukuru wetu neke no kukutha thiturithapo thendi thokupongoka, ⁷³ medhero ghendi kwawihetu Abraham. ⁷⁴ Gha turirepo eshi, munyima dho kutukomonona kwawanyathi wetu ne mbo tuna mukarerapo noghutjima ⁷⁵ mughupongoki noghuhungami kuroruheya. ⁷⁶ Kemo, nowe, mwanuke mbo hana kwitha eshi muporofeta waShokuru, mbo ghuna yendi kughutho waFumu mu kumuroyithera mayira ghendi, kuroyithera hanu kumwiyero wendi, ⁷⁷ kutapa ghudimuki ghomakomweneno kwawanu wendi kupitera muma thiyerero ghomaharwero ghawo. ⁷⁸ Eyi mbo yi na hokoka pamurandu ghoneke dhodhikuru dhaNyambi wetu, pamurandu gho neke dhi kuva kodiyuwa kuneya mu kuna tu ghamwena, ⁷⁹ no kutapa munyenge kwawa hahungumana mudikokore no mumumvure ghoyifa. Mbo ghana yi rughana mu kutuneghedha ndhira dhothiraro. ⁸⁰ Mwanuke yu gha kurire no gha tanarire papupepo, aye gha karire mumamboyeya kare diyuwa dyokwiya no gha moneke kughutho waIsrael.