¹ Kunyima dhoyi kwakarire mukandi wawaJuda, naJesusi ghayendire kuJerusalema. ² Pano muJerusalema pathero dho ndjwi padi tishi, oyu hetha muAramaic eshi Bethesda,no dhakara no ndhugho dhodhimbiru. ³ Mbunga dhodhikuru dhohanu hokukorwa, hakunga, harema nowa hadjokuvama hakarire hana rara po. Kutatera mayendithero gho meyu. ⁴ Mu engeli waFumu ghaghurumukire no gha dhungire meyu ghaya manako ghamwe no kehe yu ghadjatire mumeyu oku ghone pakughadhora gherukire kukehe dihamba gha nyandire. ⁵ Katughuru ghumwe ghakarire po oyu ghakariretjitju myaka makumi mahatu no myaka kwoko nodhihatu. ⁶ Apa Jesusi ghamumonine ghana rara po, no apa ghanongonone eshi ghakarire po rure, ghaghambire kukwendi,''Ghuna shana ghukare ndjewa-ndjewa?'' ⁷ Katughuru gho mukorwi,''Mukadikuto, kadi nidi nokeheyuno gho kukona ghaniture mukandhugho omu meyu hanakughadhunga. Apa neya, thinema thimwe pamuve kughutho wange me.'' ⁸ Jesusi ghaghambire kukwendi,''Wimane, shimbe ghudidi ghoye, no kayende.'' ⁹ Popo katughuru gherukire, noghashimbire ghudidi wendi nokayenda. Diyuwadi kwakarire dyoMapeghu. ¹⁰ Podiyo haJuda haghambire kukwendi oyu gherukire,''Dyarero ne Mapeghu no kadi hakutawedhera mukushimba disharo dyoye.'' ¹¹ Ghahuthire,''Oyu ghana nitendinikare ndjewa ndjewa ghana ghamba kukwange,''Dhamune disharo dyoye no kayende.''' ¹² Hamwipure ye,''Yidye katughuru yu ghana yighamba kukoye,'Dhamune no kayende'?'' ¹³ Ngambi kemo, oyu herure kadi ghadimukire eshi yidye yoyishi Jesusi ghayendire mughudhindo, pakarire mbunga padyango paya. ¹⁴ Kunyima, Jesusi ghamuwanine mutembeli no ghaghambire kukwendi,''Kenge, ghuna kara ndjewa-ndjewa! Kadighuharure karo, podiyo yinuyokupiterera yakukuhokokera we.'' ¹⁵ Katughuruya ghayendire kwaJuda no katongora eshi Jesusi yodiye ghamwirure. ¹⁶ Pano pamurandu ghoyinu yi haJuda haketire Jesusi, yoyishi ghatendire yinu yi muMapeghu. ¹⁷ Jesusi ghawahuthire,''Tate ne kuna kurughana ngambi kengeno, name,karo,kuna kurughana.'' ¹⁸ Pamurandu ghoyi, haJuda haghayare yingi mukumupagha kadi ghatjorire diyuwa dyo Mapeghu, ene karo ghethire Nyambi gho Wihe thinda, mukukutenda thinda pofotji kwaNyambi. ¹⁹ Jesusi ghawahuthire,''Ghushemwa, ghushemwa, Mwana kadiko yokutenda yithinda,kutundithako eyi ghamonanga Wihe ghana kutenda, kukehe yino ghana kutenda Tate, Mwana naye ghakona kuyitenda. ²⁰ KwaTate ghahaka Mwana no kumuneghedha yoyihe eyi yithinda ghana tendanga, no kumuneghedha yinu yoyikuru kupitakana yi yakumutetukitha. ²¹ Thika Tate kupindura hafu nokuwapa moyo, na Mwana naye kutapa moyo kwakeheyuno kowa ghana himi. ²² Tate ne kadi mukakutheka noyofotjitemba, ene ghatapa mathekero ghomahe kwa Mwana ²³ podiyo keheyuno ghamukutekere Mwana thika di hakutekera Tate. Kehe yuno ghokupira kukutekera Mwana kadi ghakutekera Wihe oyu ghamutuma. ²⁴ Ghushemwa, ghushemwa, keheyuno gho kuyuva manando ghange no kutawa oyu ghanituma aye kuwana moyo ghororuheya no kadi hakumutetera ndhango, ene gha pita kutunda mukufa kukupara. ²⁵ Ghushemwa, ghushwemwa, nakumutongwera eshi ruvedhe ne kuna kwiya, no popano, apa hafu hakuyuva diywi dya Mwana Nyambi, nowa hakumuyuva nanyi hakupare. ²⁶ Thika Tate ghakara no moyo mumwendi thinda, podigho ghatapire karo kwaMwanendi podiyo ghakare no moyo mumwendi thinda, ²⁷ na Wihe ghamupire Mwanendi muragho mukushimba makengwerero yoyishi aye ne yo Mwana Munu. ²⁸ Mwatetuka kuhatera yi, porudi ruvedhe runa kwiya oru keheyuno gho mumbira nanyi ghakuyuve diywi ²⁹ dyendi no nanyi nakushwaghe: kowa harughana ghuwa kumuvumbukero gho yipara, no kowo hatenda ghuyi kumuvumbukero gho matheko. ³⁰ Kadiko yokutenda papange. Apa nakuyuva,ame kukengurura, no makengwerero gho mahunga yoyishi kadi nakushana yihima yange nothinda ene yihima yoyu ghanituma me. ³¹ Ngeshi ni kutongonone kuhatera nothinda, matongweneno ghange kadi wakukona ghakare ghushemwa. ³² Poghadi makutongweneno kuhatera me, no nadimuka matongweneno agha ghanipa kuhatera me ne ghushemwa. ³³ Hamutuma kwa Johanessi, no ghatongonona ghushemwa. ³⁴ Ene matongweneno agha nawana kadi ghokutunda kwakatughuru. Ame kuna kughamba yinu yi podigho mwe mupwe kughamwena. ³⁵ Johanessi ghakarire ramba oyu ngamunekanga no kusheghenyena, no mwahimine kuhafa muthishe thendi paruvedhe. ³⁶ Matongweneno gha nidi nagho ghapitakana ghaJohannesi, payirughana yi ghanipire Tate no kumithemo, yirughana yi narughananga, kushupa kuhatera me eshi Tate yoghani tuma me. ³⁷ Tate yu ghanituma me thinda ghakutongora kuhatera kwange. Pamwe mwayuva diywi dyendiendi kumumona ye kutunda kehe ruvedhe. ³⁸ Kadi mwakara no nando dhendi dhamuthigharera mumwenu, amwe kadi muna kutawa koyu ghatuma. ³⁹ Ame kushana matjangwa yoyishi amwe kughayara eshi mumwagho amwe kuwana moyo ghororuheya, no matjangwa ghofotji ghatongonona me, ⁴⁰ no kadi muna shana kwiya kukwange podiyo eshi muwane myo. ⁴¹ Ame kadi nawana nga mangcamu kwawanu, ⁴² ene nadimuka eshi kadi mwakara noruhakitho rwaNyambi mumwenu mwathinda. ⁴³ Ame neya mudina dyaTate, no kadi mwanitambura me. Ngeshi ghumwe ghakwiye mudina dyendi thinda, ngomwa mutambura. ⁴⁴ Ngepi di sho mutawe, amwe gho kutambura mangcamu ghokutunda kwenu mwathinda no kadi mwakushana mangcamu agha ghatunda kwaNyambi? ⁴⁵ Mwaghayara eshi ame nothinda nanyi nakumurundere kughutho waTate. Oyu gha murunderanga ne Mosesi, omu mwakurupere. ⁴⁶ Ngeshi mwatawire Mosesi, nanyi munitawe me, yoyishi ghatjangire kuhatera me. ⁴⁷ Ngeshi kadi mwatawa matjangwa ghendi, ngepi di mwakutawa manando ghange?''