¹ Apa Jesusi ghadimukire haPharisee hana yuvu eyi ngatendanga nokuyogha thingi thawakathishongero kupiterera Johannesi ² (ngambi kenge Jesusi thinda kadi ngayoghanga, ene hakathishongero wendi ngahayoghanga), ³ ghatundire muJudeya no ghahukire kuGalilee. ⁴ Ene yorogherire kukwendi mukupita mu Samariya. ⁵ Podiyo gheyire mudoropa dhaSamariya, dhodina Sychar, pepi no dyango edi gha tapire Jakobusi kwa mwanendi Joseph. ⁶ Thikorongwa thaJacobusi pothakarire. Jesusi ghaghayire muruyendo no ghahungumane kuthikorongwa thi. Kwakarire viri dho ghukwoko nodhofotji. ⁷ Mbuyama ghomuSamaritan gheyire mukuna veta meyu, na Jesusi ghaghambire kukwendi,''Nipeko meyu ni nwe.'' ⁸ Hakathishongero wendi hanapiti mudoropa hakaghure yidya. ⁹ Podiyo mbuyama ghomukaSamaritan ghaghambire kukwendi,''Ngepi di ghudi we, kukara gho muJuda, kuna kuniromba me, ame mbuyama ghomuSamaritan, yimwe yokunwa?'' HaJuda kadi hakudya thidhiro nawaSamaritan. ¹⁰ Jesusi ghamuhuthire no kughamba kukwendi,''Ngo wadimuka yitapa yaNyambi, no dye oyu ghana kughamba kukoye,'Ni pe yokunwa,' ngo ghuna mwipura ye, no ngo ghanakupa meyu gho moyo.'' ¹¹ Mbuyama ghaghambire kukwendi,''Ghodikuto, kadi ghudi no thivani ndi thiviya thi thidi ghudhungi. Kupi ghadi meyu gho moyo? ¹² Kadi wapitakana, endi ngepi, kupiterera wihetu Jakobusi, oyu ghatupa diviya di no kunwa mo thinda,thika mwanendi no yimuna?'' ¹³ Jesusi ghahuthire no kughamba,''Keheyu gho kunwa kogha meyu nanyi ghakufe dinota karo, ¹⁴ ene keheyu gho kuna meyu agha nakumupa kadi ghakufa karo dinota. Ene, meyu gha nakumupa ye nanyi ghakukare matundero gho meyu mumwendi, ghakuyenda kate kuyipara yokuroruheya.'' ¹⁵ Mbuyama ghaghambire kukwendi,''Ghodikuto, nipe gha meyu podiyo kadinakufe dinota no kadi wakwiya kuno nonivete meyu.'' ¹⁶ Jesusi ghaghambire kukwendi,''Yende, kethe katughuru ghoye, no kahuke popano.'' ¹⁷ Mbuyama ghahuthire no kughamba kukwendi,''Kadi nidi no katughuru.'' Jesusi ghahuthire,''Ghuhunga muyighamba,'kadi nidi no katughuru,' ¹⁸ owe wakarire no hatutughuru hakwoko, no yu ghudi nendipano ne kadi mukafumu ghoye. Eyi ghuna ghamba ne ghushemwa.'' ¹⁹ Mbuyama ghaghambire kukwendi,''Ghodikuto, nakukumona ne ghomuporofeta. ²⁰ Hatukuruwetu harapererangire padirundu pa, ene we kuna kughamba eshi Jerusalema ne dyango edi hanu ghokukona kuraperera.'' ²¹ Jesusi ghaghambire kukwendi,''Tawe mumwange,mbuyama, viri ne kuna kwiya edhi sho rughanene Tate yikare podi dirundu endi muJerusalema. ²² Owe kuraperera eyi wapira kudimuka. Atwe kuraperera eyi twadimuka, mashutukero ne kwatunda kwaJuda. ²³ Ngambi kemo, viri ne kuna kwiya, no podhidi pano, apa hakukara hakakuraperera ghushemwa hakuraperere Tate mumupepo no ghushemwa, naTate yene kuna kushana hanu hokengeyo mukukara hakakumuraperera. ²⁴ Nyambi ne Mupepo, no hanu wa hamurapereranga ne hakona kuraperera mumupepo no ghushemwa.'' ²⁵ Mbuyama ghahambire kukwendi,''Nadimuka eshi Messiah ne kuna kwiya (oyu hetha eshi Kristusi). Apa mbo gheya, nanyi gha kuthothone yoyihe kukwetu.'' ²⁶ Jesusi ghaghambir kukwendi,''Yame yodiye, oyu ghana kughamba kukoye.'' ²⁷ Poruno ruvedhe hakathishongero wendi hakahukire. No hatetukire eshi pashanye ghaghambere no ya mbuyama, ene no yofotjitemba ghaghambire,''Nye ghuna kushana?'' endi ''Nye ghuna kughambera nendi?'' ²⁸ Mbuyama ghathighire poto wendi gho meyu, ghahukire mudoropa, no kaghamba kohanu, ²⁹ ''Mwiye, nomukamonekatughuru yughana ni tongwera yoyihe eyi na tenda. Oyu ne kadi kukona ghakare Kristusi, endi ngepi?'' ³⁰ Hathighire doropa no heyire kukwendiye. ³¹ Paruvedhe roro, hakathishongero hamukanane ye,ghughamba,''Muhongi,dye.'' ³² Ene gha ghambire kukwagho,''Nidi noyidya yokudya eyi mwadhira kudimuka.'' ³³ Podiyo hakathishongero haghambire kukwagho hathinda,''Kadiko yu ghana muretera yokudya, endi hana muretera?'' ³⁴ Jesusi ghaghambire kukwagho,''Yidya yange me ne kutenda mahimeno ghendi oyu ghanituma no kukumithamo yirughana yendi. ³⁵ Kadi mwaghambanga,'Tughonda tune totwingi tunathigharako podiyo mukesho wakwiya'? Na kaughamba kukwenu, mukenge kuwiru no mumone mapya, agho ne ghapya no ghana taterera mukesho! ³⁶ Oyu gho kukesha ne kuwana ndjambi no kukongawedha mbuyo dho moyo ghororuheya, podiyo keheyu gho kukuna noyu gho kukesha ghakona kohafa pofotji. ³⁷ Podiyo yi moyi yighamba,'Ghofotji kukuna, no ghumwe kukesha,'ndi ghushemwa. ³⁸ Namutuma mukuna kesha eyi mwadhira kurughanena. Hamwe ne harughana, no munengena muyirughana yawo.'' ³⁹ Thingi thawa kaSamaritan mu doropa hatawire mumwendi pamurandu ghoyitongora yambuyama oyu ghatongonone,''Ghana ni tongwera yoyihe eyi natenda.'' ⁴⁰ Apa haSamaritan heyire kukwendi, hamurombire ye mukukara nawo, noghakarireko mayuwa mawadi. ⁴¹ Thingi thawo hamutaawire pamurandu gho nando dhendi. ⁴² Haghambire kwambuyama,''Kadi twakutawa pamurandu ghoyi waghambire, atwe twathinda twayuva, notuna dimuka eshi oyu ne Mushuturi gho kaye.'' ⁴³ Kunyima dho mayuwa mawadi, ghayendire kuGalileya. ⁴⁴ Jesusi thinda ghaghambire eshi muporofeta kadi ghakara no dikuto muditunga dyendi. ⁴⁵ Apa gheyire kuGalileya, hakaGalileya hamutambure ye. Hamonine yinu yoyihe eyi ghatendire mJerusalema pamukandi, awo nawo hayendire kumukandi ghuya. ⁴⁶ Gheyire karo kuCana muGalileya, omu ghaka tendire meyu vinyu. Pakarire mukadikutogho mumbara mwanendi muCapernaum ghakarire tjitju. ⁴⁷ Apa ghayuvire eshi Jesusi ghaneya kutunda kuJudeya ghatambe kuGalileya. ghayendire kwaJesusi no kamwipura mukughurumuka no kerura mwanendi ghokatughuru, oyu ghashanine kufa. ⁴⁸ Jesusi podiyo ghaghambire kukwendi,''Kate ghumone yidimukitho no yitetukitha, kadi sho tawe.'' ⁴⁹ Mukadikuto yu ghaghambire kukwendi,''Muhongi, ghurumuke kughutho mwanange shafe.'' ⁵⁰ Jesusi ghamuhuthire,''Yende. Mwanoye kupara.'' Katughuru ghatawire nando edhi ghaghambire Jesusi kukwendi, no ghakayendire. ⁵¹ Oku yene pakughurumuka, hapika wendi hamuwanine, ghughamba eshi mwanendi ne kuna kupara. ⁵² Podiyo ghawepure viri dhighana tanga kukara hasha. Hamuhuthire,''Peghundha paviri dhokwoko noghuwadi ghupyu wamutundire.'' ⁵³ Podiyo wihe ghanongonone eshi dhodiyo viri Jesusi ghaghambire nendi,''Mwanoye kupara.'' Podiyo ye thinda no wahe hakadighumbo hatawire. ⁵⁴ Othi ne thothidimukitho thoghuwadi ethi Jesusi ghatendire apa ghatundire muJudeya ghayende kuGalileya.