¹ Pano mathikuthiku thikuma diyuwa dyokutangera muthivike, oku shime makokore, Mari Magdalena gheyire kumbira no ghana monine diwe hana dighandumunako kumbira. ² Ghatjirire no gheyire kwaSimoni Petrusi no kwawamwe hakathishongero awa ghahakire Jesusi, noghawatongwere,''Hana mushimbi Fumu kutunda mumbira, no kadi shotudimuke eshi kupi hana kamutura.'' ³ Podiyo Petrusi nohakathishongero hayendire panunda, no hayendire kumbira. ⁴ Wahe hatjirire pofotji, no hamwe hakathishongero wangu hatjirire kughutho waPetrusi no kakuma kumbira hokutanga. ⁵ Nokakunyongamena, hamonine yitere yina kara paya, ene kadi ghangenine mwishi. ⁶ Simoni Petrusi ghana kumine kunyima dhendi no kuyenda kumbira. Ghakamonine yitere ngenyi yidipo ⁷ no thitere ethi thakarire kumutwi wendi. Kadi thararire no yitere yiene yakupetekire mudyango yathinda. ⁸ No hamwe hakathishongero, ghokutana yu ghana kumine kumbira, ghengenine mo, no ghakamonine nokutawa. ⁹ Kate ruya ruvedhe oku kadiko yi hadimukire yomatjangwa eshi nanyi ghakuvumbuke mwawafu. ¹⁰ Podiyo hakathishongero hahukire kudimbo karo. ¹¹ Ene Maria ghemanine kumbira ghudira. Oku yene pakudira, ghaghurumukire kumbira. ¹² Ghamonine ha engeli hawadi mughukenu hana hungumana, ghofotji kumutwi, no ghofotji kumaghuru oku yirama ya Jesusi hayiturire. ¹³ Hahambire kukwendi,''Mbuyama,Nye ghuna kudirera?'' Ghaghambire kukwagho,''Pamuranduhana shimbi Fumu wange, no kadi nadimuka eshi kupi hana kamutura.'' ¹⁴ Apa ghayighambire yi, ghathetukire no kumona Jesusi ghanemana, ene kadi ghayidimukire eshi oyane Jesusi. ¹⁵ Jesusi ghaghambire kukwendi,''Mbuyama, nye ghuna kudirera? Dye ghuna kushana?'' Ghaghayarire eshi ngwa mukanyamo, podiyo ghaghambire kukwendi,''Ghodikuto, ngeshi ghuna mutwara kumwe, nitongwere eshi kupi ghuna kamutura,no nanyi nikamushimbe.'' ¹⁶ Jesusi ghaghambirekukwendi,''Maria.'' Ghapirukire, no kughamba kukwendimuAramaic,''Muhongi''. ¹⁷ Jesusi ghaghambire kukwendi,''Wanikwata, ame shime kadi nadhini kwaTate, ene yende kohakurwange no kaghambekukwagho eshi ame nanyi nidhine kwaTate naWiho, no Nyambi wange no Nyambi ghoye.'' ¹⁸ Maria Magdalena gheyire no kunatongwera hakathishongero,''Namono Fumu,'' no ghana ghamba yino yinu kukwange. ¹⁹ Mughuthiku ghodiya diyuwa, diyuwa dyokutangera muthivike, mathero haghatjapere oku hakathishongero hayapireha Juda, Jesusi gheyire no kwimana mukatji kagho no kughamba kukwagho,''Thiraro papenu.'' ²⁰ Pakumana kughamba yi, ghawaneghedhire manyara ghendi nomutara wendi. Hakathishongero hahafire apa hamonine Fumu. ²¹ Jesusi karo ghaghambire kukwagho,''Thiraro papenu. Thika Tate ghayitumine kukwange, name kuna kumutuma mwe.'' ²² Apa Jesusi ghaghambire yi, ghawatothere no kughamba kukwagho,''Mutambure Mupepo ghoKupongoka. ²³ Keheyu gho kumuharwera mumuthiyerere, hawathiyerere; kehe yu gho kumuharwera muwature, hawatureka.'' ²⁴ Thomas, ghofotji ghopowa dikum nohawadi,heyire Didymus, kadi ghakarire nagho apa Jesusi gheyire. ²⁵ Hamwe haka thishongero haghambire kukwendi,''Tunamono Fumu.'' Ghaghambire kukwagho,''Shimengwa ni mone munyara dhendi thineghedhitho tho mandwara, no kutura munwe pathidimukitho tho mandwara kumutara wendi, kadi sho nitawe.'' ²⁶ Kunyina dhomayuwa kwoko nomawadi hakathishongero hakarire mwishi karo, na Thomas nawo ghakarire. Jesusi gheyire oku dhimuvero shime hadhiyandhera, no ghemanine mukatji kagho, no kughamba,''Thiraro kukwenu.'' ²⁷ No ghaghambire kwaThomas,''Kume kuno no munwe ghoye no mone manyara ghange. Kume kuno no nyara dhoye nodhiture kughunyonga wange. Kadi ghudhire ghatawedhi, ene wakona kutawa.'' ²⁸ Thomasi ghahuthire no kughamba kukwendi,''Fumu no Nyambi wange.'' ²⁹ Jesusi ghaghambire kukwendi,''Pamurandu ghuna nimono, ghuna tawa. Hakakutungeka ne waya hadhira kumona, no hatawa.'' ³⁰ Jesusi ghatendire yidimukitha yoyingi kughutho wawakathishongero, yineghedhotho yi hapira kutjanga modhi mbapira, ³¹ ene yino ne hayitjangire podiyo eshi mwakutawe eshiJesusi neKristusi, Mwana Nyambi, no karo kutawa,nanyi mwakukare no ghuparo mudina dyendi.