¹ Ame kuna kughamba eshi mukakupinga,mukehe ruvedhe ghadi shime mwanuke,mbadi ghakutjaka namupika, ngambi kenge eshi yothinda ghoyinu yoyiheya. ² Ene ghadi mumakungero no mumatakamithero kate mudatomu ghaturapo wihe. ³ Kemo karo,apa twakarire twahanuke, twakarire twapika kumiragho dhopakaye. ⁴ Ene apa gheyire makumitheromo ghoruvedhe, Nyambi ghatumine mwanendi,ghamushamuruka mbuyama,ghamushamuruka kwishi dhomuragho. ⁵ Podiyo eshi tuwane matambwero yira twahana. ⁶ Ndani pamurandu shi mwahana,Nyambi ghatuma mumitjima dhetu mupepo wa mwanendi,oyu ghetha eshi,''Abba,Tate.'' ⁷ Mbadi ghomupika keho,ene gho mwana,no ngeshi mwana,ndani nowe keho ghomukakupinga kupiterera mwaNyambi. ⁸ Ene poruya ruvedhe,opa mwapirire kudimuka Nyambi,mwapwire kutwenda mukare mwapika kowa hakara pamangcamu ghagho hathinda, mbadi ghaNyambi popaheya. ⁹ Ene kenge mweya mukudimuka Nyambi,ngeoi karo muna kupirukera kudhimuragho dhodhikashu nodhokupira mudyo? Muna shana hamuture mughupika karo ndi? ¹⁰ Amwe kukenga mayuwa no tughonda totupya ndani noyivaka nomwaka! ¹¹ Ame ne nayapa eshi pamwe yirughana yange nenu ne ya munyar-nyara. ¹² Nakumukumbera,mwayendha,mukare yira yame,ame name nakara yira yamwe. Mbadi mwatenda ghuyi kukwange. ¹³ Ene mwayidimuka eshi pamurandu ghodihamba dyonyama yona muyuvithere mbudhi dhodhiwa ruvedhe rokutangerera. ¹⁴ Ngambi kenge yirama yange yamuturire mumayerekero,mbadi mwaninyathire endi kunishwena. Ene mwanitamburire yira nomuEngeli waNyambi nakarire,yira yame nakarire Jesusi Kristusi thinda. ¹⁵ Kupi keho ghadi matungekero ghenu? Ame kushupa kukwenu eshi,ngeshi kukona,ngo mwakushwaghitha meho ghenu no kughatapa kukwange. ¹⁶ Keho ne, nakara no munyathi wenu ndi yoyishi ghushemwa nakumutongwera? ¹⁷ Awo hakuturamo mukumukona,ene mbadi muthitambo thothiwa. Hanashana kumuyandherako podiyo eshi mukuture mukwagho. ¹⁸ Ghuwa roruheya kukutura muthitambo thothiwa, ndani mbadi popangenyu nidi nenu. ¹⁹ Mwahanange hohambiru,shime karo mutjitji dhokushamuruka nidi mumwenu kate Kristus ghana pu kutunda mumwenu. ²⁰ Ame nahaka kukara nenu popano nokutjindja diywi dyange,yoyishi natetuka yokuhamena kukwenu. ²¹ Munitongwere, amwe mwahaka kukara kwishi dhomuragho, mbadi mwatereranga muragho ndi? ²² Yapwa kutjanga eshi Abraham ghakarire nohana hawadi,ghofotji ghopa mbuyama ghomupika noghotji ghopa mbuyama gho kushutuka. ²³ Ghofotji ghamushamurukire mbuyama ghomupika kukutha panyama,ene ghumweya ghamushamurukire mbuyama ghokushutuka kupitera mumatoyedhero. ²⁴ Yinu yine kukona kuyitoroka yira yokukuthimwetedha,hambuyama hawadi wa ne kunemanenapo maghundambo mawadi. Ghofoti ghopapagho ne ghokutundera kudirundu dyaSinayi nokuwana hana mughupika. Oyu ne Hagara. ²⁵ Hagara keho ne ghanemanenapo dirundu Sinayi,murabiya,nokuna kwimanenapo Jerusalema ghopopano,aye ghadi mughupika nohanendi. ²⁶ Ene oyu Jerusalema oyu ghadi kuwiru ne ghashutuka,ndani yodiye nyokwetu. ²⁷ Ayo yapwa kutjanga,''Shamberere,owe mbumi ghokupira kureta; dire nokuyerere no yihafa,owe ghuna kupira kunyanda tjitju dho kushamuruka;yoyishi hana hombuyama gho mbumi ne hengi kupitakana hana hombuyama oyu ghakara nakatughuru wendi.'' ²⁸ Ene amwe mwayendha,yira Isaki,mwahana ghomatoghedhero. ²⁹ Poruya ruvedhe oyu hashamurukire kukutha panyama ghakuthakuthire oyu hashamuruka kukutha pamupepo. Ayo yidi yinu yofotji keho. ³⁰ Ene nye ghaghamba matjangwa?''Tjidhe mukamadi ghomupika namwanendi. Mwana mukamadi ghomupika mbadi mbogha kutapera mughupingwa namwana gho mbuyama ghokushutuka.'' ³¹ Podiyo eshi,mwayendha,mbadi twa hana wambuyama ghomupika, ene ghombuyama gho kushutuka.