¹ . Awo omutumwa nananga omugera gwa maizi aga bwoomi, ogukupirikita nka endabirwamu, nga guzwa omu ntebe ya Kanca no mwana wa ntaama. ² . Nka gakulula akati wa nzira ya kibuga era okubuli ludda lwa mugera kwaliku omusaale gwa bwoomi, nga buli gumwei gukubala ebibala ikumi na bibiri ebyengeri ezidi buli mwezi, nebikoola bya musaale nga bikuwonya amaanga. ³ . Omu kibuga ekyo ti walibaayo mukyeno enteba ya Kanca no mwana wa ntaama yabanga omwo, abairu bamwei bamuwerezanga. ⁴ . Era bamubonanga namaiso gamwei; era neibara lyamwei ryabanga mu byenyi byabwe. ⁵ . Ate tiwabengawo bwiire te, nka ti bakwendya kumulika kwa itaala nakasana kaisana, kubbanga omukama OKanca yabanga eisana lyamwe, era bafuganga emirembe ne mirembe. ⁶ . Nakoba nti, ebigambo bini bya bwesigwa era bya mananu era omukama OKanca owa myoyo gya balangi, atumire ontumwa wamwei okulanga abaru bamwei ebikwiza okubawo amangu. ⁷ . Era, bona, nkwiiza mangu ago, awerebwe omukisa akwate ebigambo bya bantumwa obwa kitabo kinu. ⁸ . Njeena OYokaana,ninje nawuliire ni mbona bini. Ninawuliire nimbona, ningwa ansi okumagulu ga bantumwa oyo niye yabindangire okumuramya. ⁹ . Nankoba nti, "Bona tokola otyo;ndi mwiiru nka we era owa mu baganda baamu abalangi ; naabo abakwaata ebigambo ebya kitabo kini: ramya Kanca". ¹⁰ . Awo nankoba nti "Toteeka kamanyisyo ku bigambo bya bulangi obwa kitabo kinu, kubbanga obwiire buli ampi. ¹¹ . Akusiisa abe nga akusiisa, era omugwagwa abe nga akyaali mugwagwa, era nomwikiriiri, abe nka akyakola ebya bwikiriiri, era no mwikiiri abe nga akyaali mwikiiri". ¹² . "Bona, nkwiiza mangu; nempeera yange eri nanje, okusasula buli muntu nka omulimu gwamwe niguli". ¹³ . Nje Alufa no Omega, akusooka era akusembayo, okwekeera nenkomerero. ¹⁴ . Baweweibwe omukisa abo abayozere ebizwalo byabwe, balyoke babe nobukama oku musale ogwa bwoomi, era balyoke baingire omu kibuga nga bakwakala omu miryango. ¹⁵ . Enzai eriyo embwene, nabalogo, nabenzi, nabaiti, na baramya ebiisani, buli akwendya nakola ebyabubeyegi. ¹⁶ . "Nje OYesu ntumire ontumwa wange okubakoba nywe ebyo olwa iramyo. Nje ndi kikolo era omwizukulu wa Dawudi, akanyenyenzi akakwaaka emambya". ¹⁷ . Era omwoyo nomugole basimoole nti "Iza." Yeena awuura abaze nti, "Iza" .nabuli alina enkalamata aize,akwendya atwale amaizi aga bwoomi bwereere. ¹⁸ . Nkukoba buli muntu akuwuura ebigambo bya bunnabbi/oburangi obwa kitabo kinu nti omuntu yeena yeena nasimoolangaku okwe ebyo, OKanca alyongeraku oku ye ebibonerezo ebiwandikiibwe omu kitabo kinu. ¹⁹ . Era omuntu yeena yeena natolangamu omu bigambo ebya kitabo ekya bulangi bunu, OKanca alimutoolaku omugabo gwamwe oku musaale gwa bwoomi, no mu kibuga ekikiiri, ebyawandikiibwe omu kitabo kinu. ²⁰ . Oyo akutegeeza bini asimoole nti, "Niwo awo :nkwiiza mangu" .Amiina: Iza, omukama waswe OYesu. ²¹ . Ekisa kya mukama waiswe OYesu kibenga nabaikiiri. Amiina.