¹ Wunaanu aliwo omusaacha mu Bafalisaayo eriita lyaye Nikodemu, omuna’sikanda mu lukhiikho lwa Bayudaaya olutuki. ² Keecha eyiri Yesu esiro kawoola ati, “Rabbi, khumanyire khuti oli omusomesa otula ewa Weere. Olwokhuba yiwuma onyala okhukhola ebyamakana byo’wuwonero byukhola Weere nataasi naye”. ³ Mukhukowolamo Yesu kaatula ati, “Nkhuwolera amasima, yiwuma onyala okhuwona owene’ngo wa Weere okhutusakho nikewuuywe khandi”. ⁴ Nikodemu kateeba ati, “Omutu anyala atye kewuulwa nimukhuluutu?” “Masima keene syanyala kengira ekhabi lyo’khubiri munda ya ηηina okhwiwulwa!” ⁵ Yesu kakowolamo ati, “Nkhuwoolera amasima, yiwuma onyala okhwiingira mu wene’ngo wa Weere okhutusakho nikewuuywe na’maachi no’mwoyo. ⁶ Omubiri kwiiwula omubiri, naye omwoyo kwewula omwoyo. ⁷ Syo’khoya okhwesiindukha khu simboola, ‘oteekwa okhwiiwulwa wuyaakha.’ ⁸ Embuunga yiwuchira yiyidakhira. Owulira embukuma yayo, naye syo’nyala okhuwoola yiyitula oba yiyicha. Siityo nje siri eyiri wuli wiiwulwa omwoyo.” ⁹ Nikodemu kateeba ati, “Sino sinyalikha siitye?” ¹⁰ “Oli musomesa wa Yisirayiri”, Yesu kawoola ati, “Ne syumanyire ebitu bino?” ¹¹ Nkhuwoolera amasima, khuwoola bikhumanyire, khandi khuwa owujjulisi khu bikhuweene, naye ne’lusiba siityo batu enywe simufukirira owujjulisi wefwe. ¹² Nomalomire yuli khu’bitu bye syalo ne syufukiirira; wunaanu onafukiirire otye ni nomalomire ebitu byo’mwikkulu? ¹³ Yiwuma mutu wachakho mwikkulu okhutusakho oyo owatula mwikkulu__ omwana wo mutu. ¹⁴ Nga wusa Musa nikasingisa enjokha mu sibbarara, siityo omwana wo’mutu ateekwa okhusiingisiwa, ¹⁵ kho nawuli omufukiriramo anyale okhufuna owulamu wutawawo. ¹⁶ “Atyo Weere nje lukadakha esyalo manu kawaayo omwana waye mulala yeηηene, kho nawuli omufukiiriramo akhaye okhukota naye abe no’wulamu owutaliwawo. ¹⁷ Olwokhuba Weere sikatuma mwana waye mu syalo okhukhengera esyalo omusango, naye esyalo silokolewe okhubitira muye. ¹⁸ Nawuli omufukiiriramo syakhengerwa musango, naye nawuli otamufukiiriramo asikala namalire okhukhengerwa olwokhuba syafukiriiye mu liita lyo’mwana wa Weere mulala yeηηene. ¹⁹ Yino nje enkhenga yo’musaango: owulafu wiichire mu syalo, naye abatu badakha esiirema musifwo syo mubasu olwokhuba ebikholwa byawe byali ebibi. ²⁰ Nawuli okhola esibi syadakha owulafu, khandi syanyala keecha mu’wulafu olwokhutya ati ebikholwa byaye banabyanjuluse. ²¹ Naye nawuli obawo mu masima keecha mu wulafu, kho siwonekhe lwatu siiti syakholire sikholikhire, nisibita mu Weere.” Owujulisi Wa YokanaOmubatiisi Khu Yesu. ²² Sino nisiweye, Yesu nende abeeki baye batula baacha mu syalo sye’Buyudaaya, yikamala ebikha nabo, kabatiisa. ²³ Wunaanu Yokana yesi kali abatiisa awutu alangiwa Ayenoni ambi nende Salimu, olwokhuba aliwo amaachi mangi, na batu bechaanga wuli sikha okhubabatiisa. ²⁴ . (Sino syaliwo Yokana ni batamuyira mu jeera.) ²⁵ Okhuyiingana ’khwabalukhawo akati wa balala khu bekesa ba Yokana nende omuyudaaya wundi ebidiira khu musiro kwo’khweyosa. ²⁶ Beecha eyiri Yokana bamuwoola baati, “Rabbi omusaacha ola yiwali naye khu luwande lula olwa Yorudaani__ omusaacha yiwatusirakho owujjulisi__ sirayi, abatiisa, khandi wuli mutu ali okhucha yali.” ²⁷ Khu sino Yokana kakowolamo ati, “Omutu anyala wusa okhufuna esimuweresewe okhutula mwikkulu. ²⁸ Enywe abene munyala okhujulira muti nawoola nti, ‘siniise Kurisito naye natumiwa emutwe waye.’ ²⁹ Omweeya aba wo’musaacha omudekhiisye. Omulobera okhola khu musaacha odekhiisye amulinda khandi kamutekeresera, khandi aba kechula esangaalo nawulira ekkono lyo musaacha odekhiisye, owusangaafu owo wange, ne khandi wichufu. ³⁰ Ateekwa okhuba amukkulu; esse nteekwa okhwiikha. ³¹ “Otula amukkulu ali amukkulu wa byoosi; otula khu syalo aba we syalo, khandi alomaloma ebyo mu syalo, otula mwikkulu ali amukkulu wa byoosi. ³² Ajulira khu bya wene nende bya wuliiye, ne yiwuma ofukiirira owujulisi waye. ³³ Omutu osifukiriiye komisiise ati Weere mwesikwa. ³⁴ Olwokhuba oyo Weere yikatuma alomaloma emboosi cha Weere, olwokhuba Weere amuwa omwoyo ataasi esyakamo. ³⁵ Lataηηene adakha omwana khandi katta wuli siitu mu makhono kaye. ³⁶ Nawuli ofukiirira mu mwana ali no wulamu owutawawo, naye nawuli okhaya omwana syaliwona owulamu, olwokhuba ettima lya Weere limusikalakho.