¹ Khu ludaalo lwo’khudatu oweeya waliwo mu Kaana esye Galiraaya. Nηηina Yesu kaliyo, ² ne Yesu nende abeeki baye boosi bali balangiiwe khu weeya. ³ . Efwinyo niyawa, nηηina Yesu kamuwoola ati, “Bawuma efwinyo yindi.’’ ⁴ . Yesu kakowolamo ati, “Aa omukhaye, lwasiina wunyingisamo?” “Ebikha byange bisiiri okhwoola.” ⁵ . Nηηina kawolera abakhosi ati, “Mukhole syoosi syabawoola.” ⁶ . Ambi awo aliwo entamu mukaaga echamaachi nichemire echabachiwa mumakina, echifwaana chiityo echakhosesewanga Abayudaaya khumisiro cho’khwoosa, wuli yitula nga yirimo amaachi akoola e galani okhutula khu makhumi kabiri okhwoola khu kadatu. ⁷ . Yesu kawoolera abakhosi ati, “Mwichuse entamu na’maachi;” manu bachiichusa okhwoola khuminwa. ⁸ . Namala abawoola ati, “Wunaanu mudayekho akandi muyirire omwemeresi wo’muyumo.” Bakhola baatyo, ⁹ . manu omwemeresi wo’muyumo kakhombakho khu maachi akali nikakalukhanisiiwe okhuba efwinyo. Byamukhasa okhumanya yiyitulire, asyakhaba mbo abakhosi abali nibadayire amaachi bamanya. Kamala kalanga wamwe yo’mweeya entulo. ¹⁰ . Kawoola ati, “Wuli mutu kekherera kakawula efwiinyo ye’ndikho kho kaleeta eya juule abakeni ni bekutire; nawe obiikhire endikho yikhenerekhe wunaanu.” ¹¹ . Sino, nje esya’maya esya’mberi syo’wuwonero, Yesu sikakholera mu Kaana esye Galiraaya. Atyo nje ni kakisula oluyaali lwaye, abeeki baye bamufukiririramo lukali. Yesu Atereesa Enyumba Ya Weere. ¹² . Sino nisyawa kekhirira e Kaperenaumu nende nηηina nende bamwananηηina na abeeki baye. Eyo baliyo endaalo ntono. ¹³ . Ebikha bya Pasaka ya Bayudaaya nibyali nibiri ambi okhwoola, Yesu kaniina kaacha e Yerusaalemi. ¹⁴ . Mu nyanyi che nyumba ya Weere kawukaanamo abasaacha nibakusa eηηoombe, amakoodi, nende nawuruuku, na’bandi nebekhaaye ambi na mameesa nibafunjisa erubbya. ¹⁶ Eyiri abali nibakusa nawuruku kawoola ati, “Bino mubituse ano! Munyala mutye okhukalukhaniya enyumba ya Bbabba okhuba akhatale!’’ ¹⁵ . Kawukula ensiya kalukhamo omukoye kabanaalanaala kaberusya kabatusa erwanyi we nyumba ya Weere, byombi amakondi ne ηηombe; kasalaaniya erubbya chesangasa echa bafunjisi kafunikha emeesa chawe. ¹⁷ . Abeeki baye bechulisa baati syawandiikiwa siiti: “Okhudakha lukali enyumba yawo khuliindiya.” ¹⁸ . Manu Abayudaaya bamudakhakho sino, “syamakana siina esyokhuwonerakho syunyala wekesa okhumanyisa owunyala wawo okhukhola bino byoosi?’’ ¹⁹ . Yesu kabakowolamo ati, “Mukwiise enyumba ya Weere yino, esse nayisiingise khandi mu ndaalo chidatu.” ²⁰ . Manu Abayudaaya bakowolamo baati, “Situyiriiye emyaaka amahumi kane nende mukaaga okhwombakha enyumba ya Weere yino, nawe ocha okhuyisiingisira mundaalo chidatu?” ²¹ . Naye enyumba ya Weere yikali nalomalomirekho kwali mubiri kwaye. ²² . Nikamala okhusyukhisiwa okhutula mu’bafu, abeeki baye bakhewulira bikali nawooye. Manu bafukiirira ebyawandiikiwa nende emboosi Yesu chikali nalomalomire. ²³ . Ne nikali nali mu Yerusalemi khu muyumo kwa Pasaka, abatu bangi bawona ebyamakana byo’wuwonero bikali nakhola bafukiirira mu liita lyaye. ²⁴ . Naye Yesu sikabewa okhumwesika, olwokhuba kaba abamanyire boosi. ²⁵ . Sikadakha owujjulisi woosi owo mutu, olwokhuba kamanya esiri mu mutu.