¹ Beraq Tuhan tauq kaleu ulutn-ulutn Farisi epuq dingaq amen Uhaq epuq ngahan dan ngebaptis lebeh deoq murid etepadaq Yohanes, ² (meskipun Yesus sendiri beaw ngebaptis, melainkan murid-murid-Uhaq), ³ Uhaq molak Yudea dan uli oliq la Galilea. ⁴ Namun, Uhaq harus lalo wilayah Samaria. ⁵ Lalo, Yesus empeq mo Samaria, mo erai kota yaq tenaq Sikhar, yaq letaq yaq diniq ampetn tana yaq ro denyeq Yakub la anak uhaq, Yusuf. ⁶ Sumur Yakub naan mo pede aro. Lipes iro, Yesus, yaq mole bayaq mo lalaq, tuet mo dirikng sumur iro. Saat iro, kira-kira jam 12. ⁷ Empetlah erai bawe Samaria kakatn nyaok danum. Yesus biongau la uhaq, “Meq ngahan nyeq Aap danum isep.” ⁸ (Sebeb, murid-murid-Uhaq epuq engko la kota kalaq moliq okatn.) ⁹ Bawe Samaria iro biongau la Yesus, “Kelemeq mungkin Ko, ulutn Yahudi, sake danum isep la aap yaq adalah bawe Samaria?” (Sebeb, ulutn Yahudi beaw bergaul ampetn ulutn Samaria.) ¹⁰ Yesus ngejawab dan biongau la uhaq, “Amen ko tauq tentang karunia Allah dan tauq enceq yaq biongau la ko, ‘Nyeqlah Aap isep,’ ko pasti akan sake la-Uhaq, dan Uhaq akan nyeq ko danum bolupm.” ¹¹ Bawe iro biongau la-Uhaq, “Tuen, Ko aweq naan timba dan sumur ohoq sangat takei, ete meq Ko ngeliatn danum bolupm iro? ¹² Meqkah Ko lebeh solai etepadaq itak kakah leluhur kaiq, Yakub, yaq nyeq sumur ohoq la kaiq dan yaq epuq pisep edotn ete sumur ohoq ampetn sekorekng anak dan pemolupm yaq?” ¹³ Yesus ngejawab dan biongau la uhaq, “Setiep ulutn yaq pisep dan ete danum ohoq akan lahatn oliq, ¹⁴ tetapiq ulutn yaq pisep ete danum yaq denyeq Aap la uhaq beaw antekng pernah lahatn oliq; melainkan danum yaq denyeq Aap la uhaq akan jadiq matern danum sua diriq uhaq yaq akan terus memancar sampei la bolupm yaq kekal.” ¹⁵ Bawe iro nokai la Yesus, “Tuen, nyeqlah aap danum iro nadeq aap beaw akan lahatn oliq dan aap beaw perlu engko oliq lahoq kalaq nyaok danum.” ¹⁶ Yesus biongau la Uhaq, “Engkolah, nogeq banen ko dan mulik lahoq.” ¹⁷ Bawe iro ngejawab, “Aap aweq naan banen.” Yesus nokai la uhaq, “Ko bujur saat nokai, ‘Aap aweq naan banen.’ ¹⁸ Sebeb, ko epuq pernah uputn limaq banen, dan sookng yaq nongko beroh ko bayaq ohoq abaq ete banen ko. Sua hal ohoq, ko biongau.” ¹⁹ Bawe iro biongau la-Uhaq, “Tuen, aap tauq amen Ko adalah nabi. ²⁰ Itak kakah kaiq menyembah mo saikng ohoq, tetapiq bangsa-Ko nokai amen Yerusalemlah antai ulutn harus menyembah.” ²¹ Yesus biongau la uhaq, “Persayalah la-Aap, hai bawe! Antekng empeq saatyaq watu abaq ete mo saikng ohoq ataupun mo Yerusalem ulutn menyembah Bapa. ²² Ka menyembah yaq beaw ka kener, tetapiq kaiq menyembah yaq kaiq kener kerna keselamatan empet ete bangsa Yahudi. ²³ Namun, antekng empet watuyaq, yaq iro bayaq ohoq, penyembah-penyembah bener akan menyembah Bapa sua roh dan kebenaran; sebeb Bapa menuntut yaq kiaq iro nengkalaq menyembah Uhaq. ²⁴ Allah adalah Roh dan Ulutn yaq menyembah Uhaq harus menyembah-Uhaq sua roh dan kebenaran.” ²⁵ Bawe iro nokai la-Uhaq, “Aap tauq amen Mesias antekng empet (Uhaq yaq tenokai Kristus). Beraq Uhaq empet, Uhaq akan petauq sekorekng esaq la kaiq.” ²⁶ Yesus biongau la uhaq, “Aap, yaq sedeng biongau la ko adalah Uhaq.” ²⁷ Beraq iro, murid-murid-Uhaq empet dan ulutn heren neaw Yesus sedeng mencareng ampetn bawe. Namun, aweq eraipun yaq penik la-Uhaq, “Oon yaq delo Ko?” atau “Oon lekaq Ko mencareng ampetn uhaq?” ²⁸ Lipes iro, bawe iro molak labuq danumyaq dan engko la kota serta nokai la ulutn-ulutn mo aro, ²⁹ “Ayoq, neaw naan ulutn yaq nokai la aap sekorekng esaq yaq epuq denen aap. Mungkinkah Uhaq iro Mesias?” ³⁰ Ulutn pun engko la luer kota dan beruku Yesus. ³¹ Sementara iro, murid-murid-Uhaq mendesak Yesus dan nokai, “Rabi, man lah.” ³² Namun, Yesus biongau la ulutn, “Aap naan okatn yaq beaw ka kener.” ³³ Lalu, murid-murid bekepenik la saman mali, “Meqkah naan ulutn oit esaq la-Uhaq kalaq dokatn?” ³⁴ Yesus biongau la ulutn, “Okatn-Aap adalah enaq pengakatn Uhaq yaq ngutus Aap dan nyolukng pekerjaan-Uhaq. ³⁵ Beawkah ka nokai, ‘Opat bulatn eso empet musim panen’? Perhatikanlah, Aap nokai la ka, mukelah mataq ka dan neaw umaq-umaq epuq ngelemit kalaq tenuai. ³⁶ Sekareng pun, uhaq yaq menuai epuq terima upahyaq dan ngumpur bua kalaq bolupm kekal sehingga penuai dan yaq ngulaq ngahan sama-sama ehew. ³⁷ v 37 Sua hal ohoq, ongau ohoq bujur, ‘Yaq erai ngulaq dan yaq bali menuai.’ ³⁸ Aap ngutus ka kalaq menuai esaq yaq beaw genamuhka; ulutn bali epuq enaqyaq dan ka epuq sua la amuh ulutn.” ³⁹ Deoq ulutn Samaria ete kota iro jadiq persaya la Yesus kerna ongau bawe iro, yaq bersaksi, “Uhaq petauq sekorekng esaq yaq epuq denen aap.” ⁴⁰ Jadiq, beraq ulutn-ulutn Samaria iro empeq la Yesus, ulutn sake-Uhaq nongko beroh ulutn dan Yesus nongko mo aro sekolatn duaq olo. ⁴¹ Dan, naan lebeh deoq oliq ulutn yaq persaya kerna ongau Yesus langsung. ⁴² Ulutn biongau la bawe iro, “Beaw eso kerna ongau ko kaiq jadiq persaya, melainkan kerna kaiq langsung epuq dingaq, dan kaiq tauq amen Uhaq ohoq bujur-bujur Juru Selamet dunia.” Anak Pegawei Istana Peneleheq (Mat.8:5-13; Luk.7:1-10) ⁴³ Lipes duaq olo, Yesus molak ongok iro dan nujuq la Galilea. ⁴⁴ (Semale iro, Yesus pernah nyeg kesaksian amen erai nabi beaw dihormati mo negeriyaq sendiri.) ⁴⁵ Beraq Yesus empeq mo Galilea, ulutn-ulutn Galilea nyamut-Uhaq kerna ulutn epuq kitaq sekorekng esaq yaq denaq Yesus sua perayaan Paskah mo Yerusalem kerna ulutn pun engko la perayaan iro. ⁴⁶ Kerna iro, Yesus empet oliq la Kana, Galilea, ongok Uhaq pernah enaq danum jadiq anggur. Mo Kapernaum naan erai pegawai istana yaq anak sookngyaq sedeng berotetn. ⁴⁷ Beraq pegawai istana iro dingaq amen Yesus epuq empet ete Yudea la Galilea, uhaq engko ruku dan mohon la Yesus nadeq empet dan peleheq anakyaq kerna anakyaq epuq hampir mate. ⁴⁸ Lalu, Yesus nokai la-Uhaq “Kaleu ko beaw kitaq tanaaq-tanaaq dan hal-hal ajaib, ko bawe mayu persaya.” ⁴⁹ Pegawai istana iro biongau, “Tuen, empetlah semale anakaap mate.” ⁵⁰ Yesus biongau la uhaq, “Ulilah, anakko bolupm!” Senarikng iro persaya la ongau yaq tenokai Yesus la uhaq dan ulilah senarikng iro. ⁵¹ Bayaq pegawai istana iro maseh sua perjalanan, hamba-hamba uhaq beruku ampetn uhaq dan nyeq tauq amen anak sookng uhaq bolupm. ⁵² Pegawai istana iro penik la ulutn bayaq jam berapa kondisi anakyaq mulei bueq. Dan, ulutn ngejawab, “Engkalepm, kira-kira jam erai bengkoyatnyaq tawaq.” ⁵³ Tamen tiaq iro tauq, pada watu irolah Yesus biongau la uhaq, “Anakko bolupm.” Jadiq, pegawai istana iro ampetn sekorekng keluargayaq jadiq persaya la Yesus. ⁵⁴ Irolah tanaaq ajaib keduaq yaq denaq Yesus setelah uli ete Yudea la Galilea.