¹ Vamuna-nana, nga muntu umo vamu uana na vihitha mulonga, eni vaka mpundhi ya Kalunga mulongetheni ou na kumu handekela mua cili, evi muatha ku vipanga nakuli kehetha. Keho dhangameni, linga keti va mietheke. ² Likuatetheni umo na mukuavo ku viteli vieni, mukemo mu ka vipanga na ku hetethamo majiu a lishiko a Kilistu. ³ Muntu nga athinganieka nguendi napu vimo, ikeye kapuile na vimo viahi, a likuitha endi vavenia. ⁴ Muntu ku muntu a litale ku vipanga viendi, nga ikeye ci tava a li shangale ha kanda kendi keti hali mukuavo. ⁵ Mukemo muntu kumuntu a kambata vutengi vuendi va venia. ⁶ Muntu ou i va longetha majiu na pande ku tepa viuma vioshe via cili a hane kuli uje a li nakumu longetha. ⁷ Keti muli kuithe. Kalunga kuve kumu tsopa, vije vioshe via kuna muntu vikevio viaka uana mo muku kunguiya. ⁸ Kuli uje a kuna mbuto mu vuvi vuendi, kuje ku vuvi vuendi kukeko kua ka nona kunonga. Kuli uje a kuna ku Mpundhi, ku Mpundhi kuaka tia muono ua miaka ya yaye. ⁹ Keti tu hone mu kupanga via cili, muomu muje kunhsimbu ya cili tu ka tia, nga ku tu hono. ¹⁰ Mukemo vene, mu tu uana vukovelelo, tu pangeni via cili ku vantu voshe, muakama kuli vushoko va kundama ku limbo lia Luthsilielo. ¹¹ Taleni vukama vua mathona anji na mi thonekela na livoko liange vavenia. ¹² Vaje voshe va mithindiya kulovoka, ku mivila va yongola kuli shangala ngua vantu va cili. Vavi panga evi muku teua kuyanda ku cilindakano ca Yesu. ¹³ Nambe vaje va li lovola vakevo vavenia kuve kuniunga lishiko, vunoni va yongola yeni lika mu lovoke linga vali shangale via ha mivila. ¹⁴ Mukemo ange ku nje kulishangala kuvanga ha cilindakano ca Muene Yesu Kilistu, hali ikeye mavu va a shukika kuli yange nange ku akeo. ¹⁵ Nambe vulima, nambe kulovoka navimo viahi, vunoni vije vvili na konda via kutanga ca ciha. ¹⁶ Kuli vaje voshe veku yoya ngue muci sheteko eci, civovo na ngodhi vikale navo, na vaje va Isaleli va Kalunga. ¹⁷ Kutunda hano na umo uahi anji hane cishoti, kuli ange njambata vimuetho. ¹⁸ Kavumbi ka Yesu Kilistuka kale mupundhi, vamuna-nana. Ame.