¹ Kunima ya miaka likumi na iuana nja ile kuYelusalema na Mbalanambasa, nakuhitula Titu kuya nange. ² Nja ile mukonda lia vimo via kunji jomboluela na kuhaka kulutue mudhimbu ua cili uje unjamuluile ku vakua vifuti. Mukemo nja kaniene muvushueke na vaje kele na seho, muku jeneka kushatuka, nambe kushatuka mu ngoco. ³ Vunoni nambe Titu, uje ua kele nange na ikeye kaNgelengu, kuva muthindiyile kulovoka. ⁴ Va munaina va vishaki vedhile muvushueke mumuku tala-tala ku vuana vuetu muli Yesu Kilistu. Va yonguele kutupuitha vandungo. ⁵ Vunoni kutua tavele kutamunuka kuli vakevo nambe mukanthimbu, linga vushunga vua mudhimbu ua cili vukale neni. ⁶ Vunoni vaje va thsimanene ngue vali na seho, na muoshe muva puile ku ca kele na kamo kahi, Kalunga ka thingimikile muvila ua muntu. ⁷ Mukemo vamuene vana nji hana lukulahelo lua mudhimbu ua cili kuli vaje kanda va lovoka, ngue omo Petulu vamu kulahelele na mudhimbu ua cili ku vilima. ⁸ Kuli Kalunga ua pangele muli Petulu ku vupostolu kuli vaje va lovoka, ua pangele naua muli yange kuli vakua mafuti. ⁹ Muje Tiango, Sefase na Yoano, va kele na luthsimo ngue vingundhi, va muene kavumbi ka va nji hana. Va hanene livoko lia cilio ku hana ndhili kuli Mbalanambasa nange mu kupanga vipanga. Va tavele tuye kuli vakua lifuti na vaje vajeneka ku lovoka. ¹⁰ Va tulombele tuvuluke vuhutu, vije vinja dhangamene kuvipanga. ¹¹ Vunoni omo Sefase uedhile ku Antioka, nja muvianene ku luholo lueni mukonda ua hile. ¹² Mukonda te kanda vamo vaje va tundile kuli Tiang, Sefase va lile na vakua lifuti. Vunoni omo vamala ava vedhile, ua va va lekele kuli hangunuka, muje ua kele na liova lia vaje vaka ku lovola. ¹³ Keho vaYundeya vakuavo naua va lingile vutuath. Ngecije na Mbalanambasa vene ua tangukile na vutuathi vuavo. ¹⁴ Vunoni omo nja vimuene nge cije kuvendele mua cili kushuama vucili vua mudhimbu ua cili, nja kuaniene Sefase ku mesho avo voshe, "Nga u kaYundeya vunoni u yoya ngue mukua vifuti kulitha nava Yundeya, vati uka shuamangeya vakua vifuti muku kala ngue vaYundeya?" ¹⁵ Etu vavenia tuvaYundeya va cithemua, keti tu vakua vifuti vakua vupi, ¹⁶ kanda muna dhivuka ngecije muntu ka sambua ku vilinga via lishiko vunoni mukthselela Yesu Kilistu. Netu lalo tueja ku lutsilielo muli yesu Kilistu linga tu sambue ha ku thselela Kilistu, keti ku vilinga via lishiko. Mukemo, ku vilinga via lishiko uahi muvila u ka sambua. ¹⁷ Vunoni omo tuli na kutonda kusambua muli Kilistu, netu vene naua vatu uana mukupua va ka vupi, keho Kilistu ikeye nemanenaho vupi, ndi? Keti mukemo! ¹⁸ Muomu nga nji tungulula vije vinja vundula, keho nji soloka ngue mukua ku vulumuna. ¹⁹ Mukemo mu medhi a lishiko nja tsila, linga nji yoye kuli Kalunga. ²⁰ Vana nji shukika kumo na Kilistu. Ngoco vene kunji yoya ange naua, vunoni Kilistu a yoya muli ange. Ovu vuyoye vunji yoya navuo mu nsitu, nji yoya navuo muku tselela Muna Kalunga, uje ua nji yongola na kulihana endi vavenia muomu liange. ²¹ Kunji dhimangana kavumbi ka Kalunga, muomu nga vuviuke kuvu uana mu medhi a lishiko, nga na Kilistu ua tsila vungoco.