लिउ ५
1
ती तिङ्ला हननिया सिरुप् मिज्यिकि खरे पेर्मि सफिरा ताँ डिङ्नी स्यिङ् टिक्पेज्यिक् चसुङ् ।
2
तेमे तिकि ती डेबि पार्ने चेज्यिक् खरे लला ज्याङ्नी तिनेसुर लुबु ती खनि लोमा क्षेतिबि दङ्ला ज्याङ् बिन्सुङ् ।
3
हिन्सिनाङ् पत्रुसकि हननियाला "हननिया, थु चेङिला जिनक जप्ला ताङ् ती स्यिङ्कि डेबि नाङ्नेसुर चेज्यिक् ज्यकुप्ला शैतानकि च्यिले केङ्सुङ् ?
4
दिला माचसिनाङ् दिति ख्यरेतिराङ् मे र? तेमे दिला चसिमा साङ् दि ख्यरे ओङ्ला राङ् मे र? ख्यरेकि सेम्ला चुक् क्यानि दिन्दक् नासाम् ताङ्गुप् ? ख्यरेकि मि तिबाला तिराङ् मिन्दाला कन्ज्यक्ला जिनक् जोसुङ्" सिनि सिक्यासुङ् ।
5
दि ताम् तिबा कोनि हननिया साला डिल्नि स्यिसुङ् तेमे दि ताम् कोतुप् तेर्ला ज्यिबा लासुङ् ।
6
मि ज्येन्दा तिबा गमाला वानि तिला रा थ्वनि टिल्सुङ् तेमे तिबिकि खोला पाङ्ला खुर्नि मिक्तुङ्ला ग्याप्सुङ् ।
7
तो मिन्सिन् तिकि क्षुज्यि सुम् तिङ्ला खरे पेर्मि ती ते खाङ् च्युङ्गुप् हिन् सिरुप् तिङ् क्षा माङ्येबा क्यानि नाङ्ला स्युसुङ् ।
8
पत्रुसकि तिला "खिरेकि ती स्यिङ् दि तोजोलाराङ् चबु हिन् ना मिन् सिरुप् ती ङाला स्येत् " सिनि सिक्यासुङ् । तेमे तिकि "तोजोलाराङ् चबु हिन्" सिनि सिक्यासुङ् ।
9
तेमे पत्रुसकि तिला"खिराङ् चुक् क्यानी चावा कन्ज्यक्कि थुला खक्पा ल्हाप्ला डिकुप् ? ल्होसा, ख्यरे ख्यवाला मिक्तुङ्ला ग्याकुप् तिबि काङ्बा हान्दा साङ् गोला राङ् वे तेमे तिबिकि ख्योरुङ्ला साङ् पाङ्ला खुन्डित" सिनि सिक्यासुङ् ।
10
तिति स्यारि डिल्नि स्यिसुङ् तेमे मि ज्येन्दातिबा नाङ्ला वुङ्सालेन्सिन् ती ती स्येप् ठेसुङ् । तिबिकि खोला पाङ्ला खुन्गाल्नि ख्यवातिकि चालाराङ् मिक्तुङ् ग्याप्सुङ् ।
11
क्षोछोक् ताङ् दि ताम् कोतुप् तेर्ला ज्यिबा लासुङ् ।
12
लोमा क्षेतिबि लाक्तुनेसुर मितिबि पार्ला ता ताङ् याम्छेन्कि लाका आला च्युङ्गिन् नक् । तिबा ते सोलोमनकि लाङाङ्ला क्षाज्यिक् नक् ।
13
तिबाला मितिबानेसुर ताङ्देन् आला ङेसिनाङ् सिसाङ् तिबि दाला स्युकुप् नावा माक्या ।
14
तारुङ् आला मोवा क्यिरुप् तिबा ङोमोथुपुप् कयानि पुम्पेजा ताङ् ख्यक्पेजातिबा नेन्दिन् नक् ।
15
पत्रुस ति लाम्ला उङ्गुप् ठला खरे ह्रिपच्याङ् ती तिबि पार्ला लालाकि खाला फक्स्यित् सिनि तिबिकि नेर्पुतिबाला लामतिबाला खुर्नि लेसुङ् तेमे तिबाला ठिका ताङ् दासा तिबाला ज्याक्सुङ् ।
16
ते यरुस्लेम् नामुस्याम्कि ग्यासातिबानेसुर साङ् नेर्पु ताङ् थु मेचेङा रेकुप मितिबा आला लेम्नि तिबा तेरिग् टेक्सुङ् ।
17
यिन्सिनाङ् क्षोने गेर्पु ताङ् तिबा तानि देतुप् सदुकितिबा तेरिग् लासुङ् तेमे हाम्बाकि केङ्सुङ् ।
18
तिबिकि लोमातिबि खाला लाक्पा ताङ्सुङ् तेमे तेरिग् मिमाङ्कि चोन्खाङ्ला उप्सुङ् ।
19
यिन्सिनाङ् नुप्किकुङ्ला कन्ज्यक्कि थुकि चोन्खाङ्कि गोतिबा खापेन्बिन्नि तिबाला पाङ्ला टिनि,
20
'ग्युक् तेमे क्षोखाङ्ला लानि दि मिजिकि तेरिग् सुङ्तिबा मितिबाला स्येत् ।' सिनि सिक्यासुङ् ।
21
तिबिकि दि ताम ती कोसिमा तिबा ङामुराङ् क्षोखाङ्ला स्युनी येन्देन् बिन्सुङ् । यिन्सिनाङ् क्षोने गेर्पु ताङ् तिबातानि वतुप्तिबा लेसुङ् तेमे छोक्पाला इस्राएलकि मितिबि क्षेतिबातानि का ताङ्सुङ् तेमे लोमातिबाला टि उङ् ज्यितुप्ला चोन्खाङ्ला ताङ्सुङ् ।
22
यिन्सिनाङ् ती गालुप् ओङ्क्षेम्बुतिबिकि तिबाला माठेबा लङ्नि लेम्नि चागो बिन्सुङ् ।
23
"ङिरेकि चोन्खाङ्ला लेमुक्यानि उपुप् थोङ्सुङ् तेमे ह्रिन्दुप्तिबा गोला लानि देन्नक् । यिन्सिनाङ् तिला खापेसिन् ङिरेकि नाङ्ला सुसाङ् माठे ।"
24
क्षोखाङ्कि ओङ्क्षेम्बु ताङ् क्षोनेक्षेम्बुकि दि ताम्तिबा कोसिन् चुक् डिताङ् सिनि तिबा खाङ् क्यिरुप्क्यिरुप् गाल्सिमा,
25
तिबाला "खिरेकि चोन्खाङ्ला ज्याकुप् ति मितिबा क्षोखाङ्ला लानि मितिबाला लोपिन् नक् ।" सिनि सिक्यासुङ् ।
26
तिकि क्यिसाला माक्मिक्षे ती ओङ्क्षेम्बुतिबातानि गाल्नि नेन्ले मेताराङ् लङ्नि टिनि लेसुङ् । च्यिले सिसिन् तिबा मितिबिकि दो थनि ग्याकिते सिनि ज्यिबा क्यासुङ् ।
27
तिबिकि खप्राङ्ला टिनि लेप्सिमा तिबिकि खप्राङ्ला छोक्पाकि दङ्ला ज्याक्सुङ् । क्षोने क्षेम्बुकि तिबाला,
28
"ङिरेकि खिराङ्ला दि मिन्ला मालोप् सिनि का क्षेम्बु बिन्सिनाङ् खिरेकि राङ्गि येन्देन्कि यरुस्लेम् केङ्सिन्वे तेमे ती मिकि ठाक् ङिरे खाला खुङ्गुप् नावा क्यिउ ।" सिनि टिसुङ् ।
29
हिन्सिनाङ् पत्रुस ताङ् लोमा तिबिकी खालेन् क्यानी 'अरेकि मितिबि ती सिनाङ् कन्ज्यककी काला ङ्येन् गोक्यु ।
30
खिरे काल्नी सेतुप येशुला ङिरे पागावातिबि कन्ज्यक्कि स्येप् नेसुर सेन्बु लाङ्सुङ् ।
31
कन्ज्यक्कि इस्राएलला सेम् ग्युरुप ताङ् दिक्पा पिताङ् तेरुप्ला खोला ग्याल्बि पुज्युङ् ताङ् थार्वा तेरुप् च्युङ्गुप्ला राङ्गी लाक्पा याबी थाकाला तेक्सुङ् ।
32
ङिराङ् दि ताम् तिबि पाङ्बु वे । तेमे खरे काला ङ्येन्दुब तिबाला कन्ज्यक्कि बिन्नि वतुप् थु चेङि साङ् दिकि पाङ्बु वे।
34
छक्पाकि मितिबि ती ताम् दि कोसिमा तिबा ती ङेर्मा लानि लोमा तिबाला सेतुप् नावा क्यासुङ् ।
33
हिन्सिनाङ् गमलिएल सिरुप् फरिसि ताङ् मि तेर्कि ताङ्देन् क्यिरुप् ठिम्गि लबेन् ज्यिक् नक् । खोति मि तेर्कि ताङ्देन् क्याबु मि नक् । खोति लानि लोमा तिबाला उकुर्ज्यिक् फिला देतुप् का बिन्सुङ् ।
35
तेमे खोकि तिबाला "इस्राएलकि मितिबो, खिरे दि मितिबाला क्यि सिनि वे, तिला लेमु क्यानी ल्हो ।
36
उकुर्ज्यिक गमाला, थुदास ती ङाराङ् हिन् सिनि लासुङ् तेमे तो मिन्सिन् मि मेरा ग्यास्यि तिकि दाला स्युसुङ् । तिति सेसुङ् तेमे तिकि काला ङ्येन्दुप तिबा तेरिग् थाराथुरा गाल्सुङ् ।
37
ती मि तिकि तिङ्ला मि ङोताङ्कि ग्याक्ला गालिलकि यहुदा लासुङ् तेमे मि लालाला खरे तिङ्ला थेन्सुङ् । तिङ् नासि गाल्सुङ् तेमे तिके काला ङ्येदिन् वाबुतिबा तेरिग् थाराथुरा गाल्सुङ् ।
38
ता ङा खिराङ्ला खाङ् सिउ सिसिन् दि मितिबा नेसुर थारेराङ् देत् तेमे दिबाला ताङ् तोङ्, च्यिलेसिसिन् दि नासाम् ताङ् लाका मितिबि ती हिन्सिन् दि ना डित ।
39
ती मिन्सिन् दि कन्ज्यककि हिन्सिन् खिरेकि तिबाला ना तोङ् मुथुपु । तेमे खिरेकि राङ्लाराङ् कन्ज्यक्कि खाला लानि थापिन् वतुप् ङ्येकित ।" सिनि सिक्यासुङ् । दुक् क्यानि तिबिकि ती कि काला ङ्येन्न्सुङ् ।
40
ती तिङ्ला तिबिकि लोमा तिबाला नाङ्ला काताङ्नि दुसुङ् तेमे येशुकि मिन्ला ताम् मालाप् सिनि का बिन्नि तिबाला डो च्यिसुङ् ।
41
खप्राङ् ती मिन्ला ङोप्स्युर सादिमु थोङ्नि तिबा गागाटोटो क्यिइँ ती छक्पा नेसुर थेन्सुङ् ।
42
ती तिङ्ला ङिमि टाङ् ल्हाङाङ् ताङ् खाङ्बा खाङ्बाला गाल्नि तिबिकि ताक्तु राङ् ख्रिष्टकि दके लोपिन् तााङ् स्येततिन् नक् ।