¹ Ngondo na mabhoo mafumia hii ghati yenyu? Kari jioho jifumia hena kulangwa kwenyu kubhibhi kiareha ngondo ghati yenyu ² ? Mulangwa kindu musihete. Mkoma na mkinya bhila musikarebhipate. Mdebherana na kubighana, na msikabhipate amu musioho mum'bhujanya Izubha. ³ mubhujanya na musiingwa amu muoho mubhujanya bhindi bhibhibhi,esa mubhihirie ubhibhi. ⁴ Nywi bhareshinda! Mtwarije iti kuketa bhumbuye na isanga ni kuoka mring'a na Izubha? hena hubho, ula eneketa bhumbuye na isanga akuketa mring'a na Izubha. ⁵ Kana mtegheshijia iti kitamo kisina mbucha mati kighamba iti iyo Ngoro ebhikie ghati yetu lungwara naswi? ⁶ Kake Izubha enatuinga mvono ukelie, ewo sabhundu kitamo kighamba, ''Izubha enabhakinda bhala bhekuanjela, kake enabhainga mvono bhala bhehoie.'' ⁷ Metae kubhikeni hakwe Izubha. Mkindeni mring'a naye enebhamatuka. ⁸ Msongerieni Izubha, naye enebhasongeria. Zerijeni maghaza menyu,bhala mnang'oki, na kuzerija ngoro jenyu, bhala muna zia mbiri. ⁹ okeni na longa ,na kushingira, na kuia! Kuseka kwenyu kuoke kushingira na kuizirihiwa kwenyu kuoke longa. ¹⁰ seeni sii hakwe Mzuri naye enebhakweja. ¹¹ Bham'ndwetu, musichungiane maungo. Ula enemchunganyia mndwabho kana kumchuia mndwabho eho eteta kifuri na sharia na kuchwa sharia yakwe Izubha. Ukachwa sharia, usioho uateria sharia, kake mchua wayo. ¹² Mngola sharia na mrechua ni mmwe,Izubha, niye ena lidimo lwa kukija na kunyamara. We uani mati uchuia bhengi? ¹³ Sikijeni, bhala mughamba, ''iyo kana yabho tunetonga shomba, na tuikae aho mwaka,na tumaze na kumoghesha.'' ¹⁴ Niani emaije kila kinefumiria yabho,na moo wenyu ni kini? Amu nywi ni saa narumbe ibhonekana hadori ade iteke. ¹⁵ Esibho iti mukighamba, '' Kakicha ni lukundo lwake Mzuri, tuneoka moo na tunehira iki na kila.'' ¹⁶ Kake iki muoho mukukweja wanga ya mibharirie yenyu. Kukukweja kwose uko ni kubhibhi. ¹⁷ Hena hubho ula emaije kuhira bhyedi kake asihire, hakwe ni ni ng'oki.