¹ Bə gə yú mwəə y èpákὲ Gadara lyì bí tənà y wa. ² Yezu shí bǔ-bwəl re n du, lò mədù nə-cúúlí y'à zhe mo já n shí lú-bɔlà bέ w n du n jəl mo. ³ Ń yà ń nə ń zwὲ lú-bɔlà bέ yó. Lòlò yà ń wàr mɔ ń nə lyẽ ǹdə nyáná myɛ cìcì yé. ⁴ Twər nánzhəzhɔ bə y'a lyẽ ń nèsé ǹdə ń jὲsέ ǹdə nyáná ráá cὲbsɛ, n sə rə ga. Lò yà ń tὲnέ ń wɔ mɔ ń nə ń zal ń lyẽ nàná yé. ⁵ Ń yà ń ŋwέnέ lú-bɔlà bέ ǹdə pyààrέ yó, ń nə wǔrh ń mə ń zə nə-kuulí ń mə ń cὲmὲ ń cìnə. ⁶ Ń gə nɔ Yezu ǹdə ń gwẽ ŋwέnέ yé né yé né, n dùr n jòm ń nədwənə yó n wùlì ń yé né. ⁷ N wǔrh dέdέ n wɔ; Yezu, dὲέ cəbal byǐ, bəkɔn rə ŋwέnέ àmyέ ǹdə ǹmyέ cəcəl wə? À n'â lwəl mó, Yi yil ré yilə, ǹ bək'â wὲrhέ nɛ lwɛlɛ yé. ⁸ Bə Yezu yà ń nə ń ywəl wə, "du" ⁹ Wɔ rəmyέ rəmyέ rə ce bal mɔ wɔ èta. N bwərh w n wɔ, ǹ yil byẽ? bal mɔ wɔ mɔ, "à yil nánjəjóló" bə nə já dέdέ. ¹⁰ N lwəl Yezu ni bə ń bəká n jì nəcúúlí rə du bə tənà y w yé. ¹¹ Kùkúr nánzhəzhɔ y'à zhǐ pyɔ nəbán nɛ gàà rə n'ê dɔm gɔ. ¹² Nəcúúlí zὲ rə lwəl Yezu ni, bə ń yẽ rə vò rə zù kùkúúrí wẽ. ¹³ N zὲ n pə rɛ nyí, rə du rə zù kùkúúrí wẽ, Rə gakó j'â dùr rə cəcèlé pyɔ w rə ló mwəə wẽ, rə mɛ gàà rə cì. ¹⁴ Byὲbέ bə y'à n'ê yìlì kùkúúri ni mú dùr bə vò cɔ w ǹdə cə-byǐsi wẽ bə byili kɔn dὲbέ rə wὲrhέ mɔ. ¹⁵ Bə du bə bə Yezu sono, bə nə mɔbɔ nəcúúlí y'à zhe mó,ń zù gàndὲ ń jě wárhgáá, surhə né gakó wɔ dwã yó, ywẽ nánfɔlɔ zə lyì zhǎ bέ gakó. ¹⁶ Byὲbέ bə nɔ kɔn gə tó né bal mɔ mə n wárh mɔ, e súlí kùkúúrí gə tó né. ¹⁷ Bə zὲ bə n'ê lwəl Yezu ni bə ń du bə cɔ w wa. ¹⁸ Yezu gə tú n bə ń nə ń zhǐr ń la zù bǔ-bwəl ré wə bal mɔ nəcúúlí y'à zhe mó zὲ ń nə ń lwəl bə ń yẽ n tó mo. ¹⁹ Sə Yezu yə shὲnέ yé, n wɔ mɔ k'á vò jè n dǒ sõ, ń byili ǹ lyì bí ni kɔn dὲbέ Yi wὲrhέ ǹ yilə, n mə n dùr ǹ nɔnɔ. ²⁰ N já n zhǐr ń la ǹdə ń nə ń bwəl byili tənà y èmyέ cɛmɛ lyì bí ni kɔn dὲbέ Yi wὲrhέ yilə, kɔn jàr nə lyì bí gakó dέdέ. ²¹ Yezu zù bǔ-bwəl ré n byɛrhɛ n vò mwəə y èpákὲ, lyì nánjəjóló yà tú bə zhǐ bə kəkέlέ mɔ bù-cùú yó. ²² Dwã-gùlú jì y yó-cəbal mədù, ń yà ń yil Zəyuuri bə n tu ń nədwənə yó Yezu yé né. ²³ N lwəl mò ǹdə ń wu gakó n wɔ: bə nyǐ à bəkɔ bə jàn zhe ń nə yǎl n cì, bə cĩ jὲ ń yó, ń wárh mɔ, mùnì n yə nέ. ²⁴ Yezu zhǐr ń la, lyì nánjəjòló y'à tó mo, bə y'à n'ê pyέnέ mɔ. ²⁵ E jà kɛ mədù tu yó, o wὲrhέ byinə shí ǹdə nəlyè ǹdə jal mɔ n'ê dwi. ²⁶ Ń yà ń nwὲnὲ dέdέ lyì-twərə nánzhəzhɔ jɔwà, n kwè ń jὲ kɔn dὲbέ ń yà ń zhe mó gakó n mə shili ń cìnə, sə ń yə wárh yé, Címí gaga mɔ kwɛrhɛ è n'ê nyáásɛ. ²⁷ Ń gə nyὲὲ Yezu yò, n zù lyì zhǎ bέ wẽ, ń nə ń pyà sə n tó ń kwã n dwərh ń kàməzwǐ y bɔrhá nέ nɛ. ²⁸ Bə ń yà ń zhe ń wẽ, bə báá à gə y'à ŋwὲnέ a dwərh ń kàməzwǐ y bɔrhá nɛ nəmyɛ cìcì, a y'à m'à wárh. ²⁹ Rəmyέ yó cìcì, jal mɔ j'a kwi, n tó ń wẽ n lwar bə ń címí y zhὲ. ³⁰ Yezu já n lwar bə jàn shər ń yala nɛ. ³¹ N zὲ n bwərh n wɔ: mɔ ń dwərh à kàməzwǐ y ni? ń tùntúmə bé zὲ bə wɔ mɔ; Ǹ nə lyì-zhǎ bέ gə n'ê pyέnέ mɔ nέ, ń zὲ ǹ nə ǹ bwərh bə wɔ mɔ ń dwərh mó?. ³² N zὲ n pyìrhí ń nə ń nyǐ ń mə ń pyà mɔbɔ ń wὲrhέ èta mɔ. ³³ Ywẽ nánfɔlɔ j'a zə kɛ mɔ, n zὲ ń nə ń kəkə, ń gə lwar bə yò w du dὲ mɔ, n bə n tu ń nədwənə yó Yezu yé né, n byili mu zhən pamparɛɛ. ³⁴ Yezu wɔ mɔ; à bəkɔ, ǹ gə zhí ni mú ce n nɔ ǹ cìnə, zhəl ǹdə yə-zùlə, bə ǹ címí y j'a zὲ èta ³⁶ Yezu gə nyὲὲ rəmyέ, ǹ wɔ dwã-gùlú jì y yó-cəbal mɔ nɛ, ǹ bək'á dùr ywẽ yé, ǹmyέ wúrí ń zhí ni. ³⁷ Yezu shὲnέ lò dõ tó mó, è gə də Pyɛɛrɛ ǹdə Zhakɛ ǹdə Zhã, Zhakɛ da-byǐ mú dúdú yé. ³⁸ Bə gə yú dwã-gùlú jì y yó-cəbal mɔ sõ, Yezu púrí lyì nánzhəzhɔ sú kὲlέ y bə n'ê kúrh bə tətɛtɛrɛ tέ bə ce sɔ. ³⁹ N zὲ n wɔ: byè yil á n'á kúrh a m'á ce sɔ dέdέ èta mɔ? bəsɔbwὲlέ yə cì yé, wɔ dέ è dὲέ. Bə zὲ bə bə n'ê mɔn mɔ. ⁴⁰ N ce lyì bí gakó du pwèn nè, bə yẽ bəsɔbwὲlέ y da ǹdə è ná e súlí byὲbέ bə y'à tó mo. Bə zù bəsɔbwὲlέ y gə y'à pyě má mɔ. ⁴¹ N zə jὲ nὲ, n wɔ mɔ: "Təlitəkumi" rə kùr wɔ; kɛ-byǐ, à n'â ywəl mo, zὲ dὲέ. ⁴² bəkɔ mɔ j'á n zὲ ń nə ń zhələ, bə ń yà ń yú byinə shí ǹdə nəlyè. ⁴³ Kɔn jàr lyì bí dέdέ. Yezu zὲ n gwirhi ń yé, n pə bɛ nyí bə bək'â shὲnέ bə yẽ lò lwa rɛ yé. Bə pə kùjú kɛ-byǐ y ni e jí.