¹ Ko ku manikiza, bayawe, tumi susuweza chaha ku Nfumu Jeso. Shinaho ni mwa tambura e ntaero izwa kwetu kuamana omo mubotere kuyendera noku tabisa Nyambe, mi munjira yiyi muyende, okuti ye mutende kuhitiliza. ² Kakuli muzyi e ntaero nitwa miha kuya ko Nfumu Jeso. ³ Kakuli ezi nzezo ashaka Nyambe, oku cheneswa kwenu, okuteye mu lizwise ku bushayi, ⁴ okuteye neni neni azyi omo ku kalirwa ne mukazi wakwe mu kuchena nomwi kute, ⁵ kali mwi ntakazo zo bushayi (shina bashi Zishi kabazyi Nyambe). ⁶ Mureke oku zuminiza o muntu ye a shotoke no kufosekeza ba rumeli bayenze mweyi ntaba. Kakuli o Nfumu ndeye a boozera obubbi mwezi zintu zoshe, shina omo nitwa miremusa ha ntanzi nokuha o bupaki. ⁷ Kakuli Nyambe kali na tu kuwira mu bubbi, kono na tu kuwira mu chenete. ⁸ Kabulyaho, yenshe ozyo a kana zi ka nakani bantu, kono ndi Nyambe, ozyo a miha o Muzya wakwe Wuchenete. ⁹ Kuamana ne rato lye chizware cho burumeli, kwaazye ntuso yokute ye zyumwi ami ñorere, kakuli enwe mu zyiizwa kwa Nyambe oku lishaka mubeni. ¹⁰ Ee, mu tendezi ku bonshe bashere benu abo bena mwa Masedonia. Kono tumi shonga, bakwetu, muzi tende ko kuhitiliza. ¹¹ Tumi ereza ye mulike kuhara nemu tontwere, mu twalize mihupuro yenu kuzenu, mi mutende ka maanja enu, shina mbulyaho nitwa mi raera. ¹² Mupange zi okute ye mwa kuyenda nenja mu ku kutika bena ka bazumini, mi nokute ye nemu siye kubura e chintu. ¹³ Katu shaki ye mube nokusha shuwisisa, bakwangu, kuamana nabo ba fwa, okute ye mwasha lili mbwee mbwabena baazya zumina zoku buso. ¹⁴ Haiba tu zumina ye Jeso naafwa noku buka hape, no bulyaho Nyambe nara reta ne Jeso abo niba fwira kwakwe. ¹⁵ Kezi tumita ke zywi lyo Nfumu, o kuteye eswe tuhara, abo ba siyere mani nakezye o Nfumu, kali shaka niba rake bena niba fwa. ¹⁶ Kakuli o Nfumu yemwini nara kezya hanshi, Nara kezya ka kashumpu, nezywi lye ngeloi e kuru, mi ne ntorombita ya Nyambe. mi abo niba fwira kwa Kiresite nibara tanga ku buka. ¹⁷ Cware eswe tuhara, tu siyalire, twenshe nabo tura hindirwa mu mazyoba tuka shangane o Nfumu muwiru. Mwinjira ya bulyena mbutwa ka kalilire no Nfumu. ¹⁸ Ka bulyaho, muli shenge-shenge naa mazywi.