¹ Kakuli enwe mubeni muzyi, bashere, okuta ye okezya kwetu kali nkwabulyo. ² Muzyi ye mwi nako niya mana nitwa shanda mi nitwa tendiwa ke fwiso lye nshoni kwa Mafilipi. Katu gorete kwa nyambe oku amba kwenu ze zywi lya Nyambe mwi shando e nene. ³ Kakuli e nsusuezo zetu kali kazili zi tengamite, kapa kwezo zizywire o bubbi, kapa kwezo kazi chenete, kapa kuzo kuhoma. ⁴ Kunje ya bulyaho, shina Nyambe aho natu bona ye tubotere oku hewa e nsebelezo ze evangeli, mbo bulyaho tuamba. Tuamba, kali ko kutabisa bantu, kono ko kutabisa Nyambe. Ndeye a tatuba e myozyo yetu. ⁵ Mi kwaazya enako eyo nitwa berekisa a mazywi o kuneya, shina ha muzyi, kapa oku zika e ntakazo yo kufuma, shina Nyambe aho ali mpaki yetu. ⁶ shina ha kali nitwa shaka o kutembwa kuzwa kubatu, kapa oko kuzwa kwenu niba munya. Katu wora oku zeka e ntukero zetu shinaho tuli ba apositola ba Kiresite. ⁷ Kunje ya bulyaho, katwine chishemo mukati kenu shina ndi nyina wa bantu ozyo a shenga-shenga bane hawa. ⁸ Kenjira ya bulyanu twina e rato kwenu. Katu tabire oku libbatwira nenwe kali nji zywi lya Nyambe bulyo kono no buharo bwetu. Kakuli shemuli bantu ba shakiwa hawa kwetu. ⁹ Kakuli muazyara, bashere, e mitendo ne seheko lyetu. Masiku na kamwi katu bereka o kutiye tureke oku remesa zyumwi wahenu. Mweyo nako, nitwa mi kutaza o burumiwa bwa Nyambe. ¹⁰ Muli mpaki, ne Nyambe bulyaho, mbuti ku chenete, no kuruka, noku shaba necho chi nyansahara ko mukaliro wetu kwenu enwe mu zumina. ¹¹ Kenjira iswana, mwizyi buti zyumi no zyumwi wenu, shina ndishi na bane, nitwa miruta noku mi susueza. Nitwapaka ¹² ye mu botere o kuyenda ke mikwa ibotere kwa Nyambe, ozyo ami kuwa mu mubuso wakwe ne tubo. ¹³ Kebaka lya bulyanu tu litumera neswe kwa Nyambe enako yonshe. Kakuli aho nimwa tambura o burumiwa bwa Nyambe obo kabuzwa kwetu nimwa shuwa, nimwa bu tambura kali kokuta ye ndizywi lyo muntu. Kunje ya bulyaho, nimwa li tambura kuba lye niti komu li kalire, ezywi lya Nyambe. Ndi lyonya lili zywi hape elyo linaho libereka mukati kenu enwe mu zumina. ¹⁴ Kakuli enwe, bashere, nimwa ba bayerekezi be nkereke za Nyambe ezo zina mwa Judea mwi zina lya Jeso Kiresite. Kakuli nenwe nimwa shanda e zintu zi swana kwabo muzyakite nabo, shino mo niba tendera ku Bajuda. ¹⁵ Kaili Bajuda niba yaya Nfumu Jeso na baporofita. Kaili Bajuda niba tutanda. Kaba tabisi Nyambe. Ka bulyaho, mba kake kake ku bantu bonshe. ¹⁶ Ba tukanisa o kuamba ku bashi Zishi o kuta ye ba hazwe. Ama manikizo ngokuti ye ba bumbilizanga e zibbi zabo. O bukali bubotere ku sukira habo kuma maninikizo. ¹⁷ Nitwa bbaturwa kwenu, bakwangu, ke nako e nfwihi, ko buntu kali ko mozyo. Katu piherere hawa, netu shilire, oku bona ezi fateho zenu. ¹⁸ Kakuli katu shilire o kezya kwenu, eme, nde Paulusi, lyonke hape, kono Satani na tuzyimika. ¹⁹ Mi e nsepo yetu ya kubuso njeyi, kapa e ntabo, kapa o mushukwe wo kutembwa ha buso bo Nfumu Jeso haku kezya kwakwe? Kali ndinwe na bamwinya? ²⁰ Kakuli muli tubo ne ntabo yetu.