¹ Abagonzebwa mutaikiriza buli moyo baitu mulengege emioyo araba eri ya Ruhanga; habwokuba abanabi baingi bebisuba bali omunsi. ² Nuho tulikumanyiraOmoyo gwa Ruhanga: Omoyo gwona ogunyakwatura ngu Yesu Kristu akaija kutufwera, akaija omumubiri nugwo gwa Ruhanga. ³ Kandi omwoyo gwona gutayatura Yesu, tiguli gwa Ruhanga, kandi nugwo mwoyo gwa munyanzigwa wa kristu ogumwahulire ngu nugwija, nahati gumazire okuhika omunsi. ⁴ Inywe, bana bato muliba Ruhanga, kandi obumwamazire mwayomera,omuli uwe habwokuba anyakuli muli inywe mukoto kukera anyakuli munsi. ⁵ N'abo, bantu bensi, kandi ebikorwa byabo nabyo byensi, kandi n'ensi n'ebahuliriza. ⁶ Itwe tulibana ba Ruhanga, anyakumanyire Ruhanga n'atuhuliriza. Owatali wa Ruhanga tali kutuhuliriza nangwa nukwo ntwetegereza omoyo gwa mazima n'ogwebisiso. ⁷ Abagonzebwa, tugonzengana, engonzo zoba za Ruhanga, kandi anyakwikiriza kugonzangana azarwa Ruhanga, kandi Ruhanga nuwe ngonzi. ⁸ Owatakugonza tamanyere Ruhanga, obwokuba Ruhanga nuw'engonzi. ⁹ Engonzi za Ruhanga zikeyoleka hali itwe, Ruhanga akatuma Omwanawe omugonzebwa kutufwera munsi enu, hakumalira twomere muli uwe. ¹⁰ Kandi engonzi ezi, nzimanyisa tali nitwe twatandikire okugonza Ruhanga, baitu uwe akatandika n'okutuma omwanawe okutuchungura omubibi byetu. ¹¹ Abakugonzebwa Ruhanga, obwaraba natugonza hati, naitwe tuhikilire kugonzangana. ¹² Taroho omuntu owarozere Ruhanga; nturaba ntugonzangana omu hali ondi, Ruhanga naikara muli itwe, kandi okugonzakwe kuhikirire muli itwe. ¹³ Ntumanya ngu twikara muli uwe, kandi nawe muli itwe, muli uwe tukahebwa Omoyo alikwera. ¹⁴ Kandi naitwe, tukarora kandi ntugumia ngu Isitwe akatuma Omwanawe nkomujunu wensi. ¹⁵ Wena aliatura ngu Yesu Mwana wa Ruhanga, Ruhanga naikara muliwe nawe muli Ruhanga. ¹⁶ Kandi naitwe tukamanya engonzi za Ruhanga aina halitwe, kandi naitwe twakikiriza. Ruhanga ngonzi; kandi ogu wena arukwira mungonzi naikara muli Ruhanga, kandi Ruhanga naikara muli uwe. ¹⁷ Nukwo ali, nukwo tuli tunti omunsi: nukwo omwekyo engonzi zihikirire, nukwo tube n'obumanzi hakiro kyomusango. ¹⁸ Busaho kutina mungonzi, baitu okugonza okuhikirire kubingera hara okutina, habwokuba okutina kwina okubonabonesebwa. wena anyakutina tahikirizibwe mukugonza. ¹⁹ Habweitu, ntumugonza habwokuba akatugonza kubanza. ²⁰ Omuntu obwagamba ninginza Ruhanga, kandi n'anoba mugenziwe muc'ekisuba; habwokuba ogu atarukugonza mugenziwe arukurora n'asobora at kugonza Ruhanga atakurora? ²¹ Kandi twina muli uwe ekiragero kinu: ogu wena arukugonza Ruhanga agonze mutahiwe.