1
उन्हा ने एह् इधेरे तांई कित्तेया कि से अपणी दया री महिमा री बड़याई करी सके जिस जो कि उन्हा ने असा जो, जे उसेरे प्यारे पुत्र मौजूद हिन मुफ्त बिच दित्तेया।
2
असा जो, उस बिच, उसेरे खून रे जरिये छुटकारा, मतलब असा रे पापां री माफी, उसेरी दया रे धन रे हिसाब कने मिल्ली है,
3
जे उस ने पूरे ज्ञान अत्ते समझ कने असा पर बड़ी जादा कित्ती है।
4
उस ने अपणी मर्जी रा भेद उस इरादे रे हिसाब कने असा जो दस्सेया जिस जो कि उस ने अपू बिच ई ठाणी लेया थिय्या।
5
परमेश्वर री एह् योजना थी कि सही बेल्ला आणे पर स्वर्ग री अत्ते धरती री सब चीजां जो मसीह बिच इकठ्ठा करन।
6
सब गल्लां योजना अत्ते परमेश्वर रे फैसले रे हिसाब कन्ने कित्ती जांदी। अत्ते परमेश्वर ने अपणी मर्जी री वजह कने ई असा जो मसीह बिच पवित्र होणे तांई चुणेया है। एह् उसेरे हिसाब कने ई होया जिस जो परमेश्वर ने सुरू का ई ठाणी लेरा थिय्या।
7
ताकि असी उसेरी महिमा री बड़याई री वजह बणी सकन, असी, यानी जिन्हा ने अपणी सारी उमेद मसीह पर रख्खे री है।
8
जां तुसी उस सच्च रा बसेख सुणेया जे म्हारे उद्धार रा शुभ-बसेख थिय्या, अत्ते जिस मसीह पर तुसी विस्वास कित्तेया थिय्या, ता जिस पवित्र आत्मा रा वचन दित्तेया थिय्या, मसीह रे जरिये उसेरी छाप परमेश्वर ने तुसां पर बी लगाई।
9
से आत्मा म्हारी उत्तराधिकार रे हिस्से री जमानत रे रूप बिच तिस बेल्ले तांई असा जो देई दित्तेया गेया, जां तांई से असा जो, जे तिसेरे अपणे हिन, पूरी तरह कने छुटकारा नी देई दिंदा। इसेरी वजह कने मह्णुआं ने उसेरी महिमा री बड़याई करणी।
10
इधेरे तांई जां का मैं प्रभु यीशु बिच तुम्हारे विस्वास अत्ते सब पवित्र मह्णुआं तांई तुम्हारे प्यार रे बारे सुणेया है,
11
मैं तुम्हारे तांई परमेश्वर रा सुकर लगातार करेया करदा है। अपणी प्रार्थना बिच मैं हमेसा तुसां जो याद रखदा।
12
मैं प्राथना करदा कि म्हारे प्रभु यीशु मसीह रा परमेश्वर तुसा जो सही गलत री समझ अत्ते दर्शन री इदेयी सक्ति दे जिस कने तुसी उस महिमावान परम पिता जो जाणी सको।
13
मेरी बिनती है कि तुम्हारे मन री हाख्खियां खुली जाये अत्ते तुसी लौ रा दर्शन करी सको ताकि तुसा जो पता लगी जाओ कि उमेद कै है जिसेरे तांई तुसा जो सद्देया है। अत्ते पवित्र लोकां बिच उसेरी विरासत री महिमा रा धन कदेया है।
14
अत्ते असा विस्वासियां तांई उसेरी सक्ति कितणी महान है। इस सक्ति रा असर उस कम्म रे हिसाब कने है,
15
जे उस ने मसीह बिच कित्तेया ताकि उस जो मरे रेयां बिच का फिरी जिंदा करी के स्वर्ग री जगह बिच अपणे सीद्धे पास्से,
16
हर तरह री प्रधानता, सब हक्क, सक्तियां, ते प्रभुत्ता रे , अत्ते हर इक नां रे ऊपर जे ना सिरफ इस जुग बिच, अपण आणे वाळे हर जुग बिच लित्तेया जाणा, बिठाया।
17
परमेश्वर ने सब किच्छ मसीह रे पैरा हेठ करी दित्तेया अत्ते उस जो हर चीजां पर शिरोमणि बणाया ते कलीसिया जो देई दित्तेया,
18
कलीसिया मसीह रा सरीर है, अत्ते उसेरी ई परिपूर्णता है, जे सब किच्छ पूरा करदा है।
19
इक बेल्ला थिय्या जां तुसा गुनाह बिच पाप री वजह कने मरे रे थिय्ये, उस ने तुसां जो बी जिंदा कित्तेया,
20
जिन्हा बिच तुसी पैल्ले, दुनियां रे बुरे रस्ते पर चलदे अत्ते उस आत्मा रे साह्ब कने चलदे थिय्ये जे इस धरती रे ऊपर री आत्मिक सक्तियां रा मालक है। सेह्ई मालक अवे उन्हा मह्णुआं बिच कम्म करेया करदी है जे परमेश्वर रा हुकमां जो नी मनदे।
21
इक बेल्ले असी बी उन्हेरे बिच जिंदे थिय्ये, ते सरीरिक अत्ते मन री जरूरतां जो पूरा करदे थिय्ये अत्ते दुनियां रे होर लोकाँ साह्ई परमेश्वर रे कोप रे साझी थिय्ये।
22
अपण परमेश्वर ने जे दया रे धनी हिन। अपणे उस महान प्यार री वजह कने जे उन्हा ने असा कने कित्तेया,
23
जां असी गुनाह री वजह कने मरे रे थिय्ये, मसीह कने असा जो बी जिंदगी दित्ती(परमेश्वर री दया कने ई तुम्हारा उद्धार होया है।)