6
1
కాబట్టి క్రేఎస్థు సందేశం గురించి ప్రారంబం కోరు నంబురు కేట అంశాలన ఉట్టు ,యింకా ఎక్కువ సంపూర్ణత సాధించుర్తుకు సాగి ఓమ్మో . నిర్జీవ క్రియల కోసం పచ్చాతాప బుగాటము ,దేవురి మేని విశ్వాసము ,
2
బాప్తీసంగా , తల మేని కీయగ ఎక్కాటం,చేత్తోనాయ ఎద్దిక్కాటం ,శాశ్వత మాన తీర్పు ఇసులుకు పునాది మల్లి ఒడుల్ల గుండా మిన్నుకు ఓమ్మో.
3
దేవురు అనుమతి తందికే అసల గూడా చేయుమ్మో.
4
అసుల జీవితాలకోరు ఉండు రక్క వెలుగున పొందనాయా, ఆనే పరలోక అనుభవాన్న అనుభవించనాయా, పరిశుద్దాత్మ కోరు భాగం పొందనాయా .
5
దేవురి నల్ల వాతన వారోగురు తరం ప్రభావాలన రుచి పాతాయా , ఉండు ఆలా ఎగి ఉట్టుఓటు తప్పోనికే అసలా తిరిగి పశ్చాత్తాప బుగురట్టుగా చేయాటం అసాధ్యం.
6
అంతుకిండుకే దేవురు మగుమున అయ్యే సిలువ ఓటు గాటి మళ్ళి సిలువ ఓటి గాటి అత్త అడ్డేరు మిన్ని ఎగతాళి చెయ్యాదు.
7
ఇదు ఏనా యిండికే ఎప్పుడూపేంజి గాటి యిక్కురు మగ తనని కోరు నంజ తర్ర , అదే తర్ర మేని వ్యవసాయం చేయురాసులకు ఉపయోగ బుగురు పంటగ తందిగాటి దేవురి దీవేనలన పొందాదు.
8
ఆనికే ముళ్ళు గా ముళ్ళ పొదగా ఆ తర్ర మేని పర్దికే శాపాలు ఎక్యారంగా ఆఖరికి అత్త సుట్టుఓడాకు.
9
ప్రియమాన సావాసుమారే , నంగ ఇన వాసిత్తందికే గూడా నింగ యిత్తు కంటే నల్ల స్థితి కోరు కీరంగా యిండు ,రక్షణకు సంబంధిన విషయలకోరు నల్ల స్థితి కోరే కీరంగా యిండు గట్టిగా నమ్మాకరో.
10
దేవురు అన్యాయం చేయురామల్లా . పరిశుద్దులకు నింగ సేవ చేందంగా పాతు గాటే కీరంగా దేవురి పేరోటి నింగ కాటన ప్రేమన నింగు సేవలన అదు అస్తోడుసు.
11
నింగులకోరు ప్రతి ఆము సంపూర్ణ నిశ్చయత ఓటి ,పూర్తి నమ్మకం ఓటి ఇంతనే శ్రద్ధ ఓటి ఆఖరి దాక సాగారంగా యిండు ఎంతనో ఆశించాకురే.
12
నింగ మందంగా యిక్కిం యిండు నంగ కోరి గాట్ల , విశ్వాసం ఓటి నమ్మకం ఓటి వాగ్దానాన్న వారసత్వంగా పొందనాసులనింగ అనుసరించుం యిండు నాను కోరి గాకరే.
13
దేవురు అబ్రహాముకు వాగ్దానం చేంధప్పుడు అత్తు కంటే గొప్పాము ఏదు ఇల్లా కాబట్టి '' నా తోడు యిండు ప్రమాణం చేంచు .
14
నిన్న ఖచ్చితంగా ఆశీర్వదించికే నిటు సంతతి న విస్తారం చేయకే యిండుసు .
15
ఈ విధంగా అబ్రహాము సహనం ఓటి వేచి ఇంద తరువాతా దేవురు అత్తుకు వాగ్దానం చేంద భూమిన పొందుసు.
16
సాధారణంగా మొనుసురు అసులకంటే గొప్పాసులమేని ప్రమాణం చేందు గాటి యిక్యాకు అసులకిక్కురు ప్రతి వివాదంకు పరిష్కారం కాటుర్దు ఈ ప్రమాణమే.
17
వాగ్దానంకు వారసులానాసులకు అత్తు సంకల్పం మారమాదు యిండు సొన్నుర్తుకు దేవురు అత్త ప్రమానాన్నే హామీగా తంచు. మార్పు చెందుల్లారాయ ఈ రెండూ కీదు ఇసుల విషయం కోరు
18
దేవురు అబద్ధం ఆడాటం అసాధ్యం అసలా బట్టి నంబురు మిన్ని యిక్కురు ఆశాభావంన అంది గుర్తుకు గట్టి ప్రోత్సాహం యిక్కిం యిండు అత్తు కోరిక.
19
ఈ ఆశాభావం నంబురు ఆత్మలకు చెక్కు చేదురుల్లారు , స్థిరమాన లంగరు లాగా యిందు ఉల్లికి ఓక్కు .
20
కల కాలం మెల్కీసెదెకు క్రమం కోరు ప్రధాన యాజకుడు ఆన యేసు నంబురు తరపున నంబురు కంటే మిన్నుగా అత్తుకోకు ఓసు.